_ داعت الخبار في العائلة .. ديال طلاقهم ، طلقت راسها براسها و عمر خبارها عرفها من هذاك النهار... حتى الطلاق ما كانوش كيتلاقاو في الجلسات .. دارت الطلاق الخلعي ، تنازلت على كاع حقوقها و زادت خلصت المستحقات.... مقابل تتفك و ترتاح .. ما تبقاش مكتوبة عليها مزوجة من انسان كتشمئز من ذكر اسمه... كارهة سميتو .. كارهة سيرتو .. كارهة ذكرياتها معه بحلوها و مرها... كانت في مرحلة كتحاول تتخلص من كاع بقاياه.... وتبدا من جديد.. كتحاول ترمم نفسها .. واخا كانت وسط مجتمع مضطرب مع راسو .. بداية من عائلتها اللي تيلومها على طلاقها منو... كيقولو عليها قبيحة وماشي صبارة .. ولفت الفشوش .. وما قدراتش على الزواج و محاينو .. تيهددوها بالندامة... حيث تيبان ليهم راجل ما يتعوضش .. راجل اللي بغاتو الوقت .. كانت تتجاوبهم بضحكة وتكمل طريقها .. عاذراهم..!! حتى هي قبل هكاك كانت تتشوفو ، حيث كان مفرش ليها الورد .. و شاري خاطرها بالغلا .. كان عاطيها وجه اللي خلاها تسمع وتشوف منو العيب و تتجاوزو !! .. ستغباها لعب بيها و وبمشاعرها... واطاها و لعب بها بحال الكراكيز.... لكن ربي كبير وراها وجهو الثاني بلا مجهود .. في اللحظات اللي كانت تتفكر تعطي لراسها وليه فرصة ثانية .. شافت خيانتو وحقارتو بين عينيها..! بكات .. غوتات .. تعذبت .. تقسحات .. ومرضات و مزال مريضة .. مزال حرقة هذاك النهار و صدمتو بين عينيها... لكن كل يوم تتحمد الله حيث ربي فكها منو... واخا كيتو مزال محفورة فيها.. مزال الشمتة تطلع وتنزل .. حيث كانت حاسبة راسها مطورة ! عمر ولد المراة يديرها بيها .. كانت حاسبة راسها قافزة ساعة لقات راسها غير نعجة وهو ذيب مصيدها بالساهل...
طلقت وبعدت وخلات كلشي حاير هو بنفسه خلاتو حاير ! ولكن ماشي هي لي تخلي بنادم يشوفها بنظرة شفقة ..ماشي هي لي تخلي بنادم يتشفى فيها وتبان ليهم ضحكة ..هربات باش تعيش حزنها وضعفها بينها وبين راسها ..عمرها تخلي لي أداوها يشوفها مدلولة وحانية الراس ...
_ الصيف .. البحر الصخب .. كانت لابسة شورت ابيض قصير تتعلي يديها تتبان سرتها .. لابسة من الفوق كاب طويل شفاف .. شعرها زعيعر مسرح على ظهرها مبوكلي تيبان طبيعي... بشرتها البيضاء غماقت شويش مع البحر و الشمس...
ماشية في اتجاه صحاباتها اللي جالسين جنب البحر .. غير الضحك و النشاط... ضحكهم تيتسمع من بعيد و بعيييد... كانو تيهضرو .. غير جلست حداهم و هما يسكتو...
أحلام: مالكم سكتوو.. !!
_ ههه حيت بلان ما تيهمكش..
أحلام: (بعدم اهتمام) اوكي
_ بغينا نمشيو الليلة نسهرو..
أحلام: انا ما عنديش مع الصداع .. مسافرة باش نريح دماغي ..
دورت وجهها تتشوف في الغروب .. و امواج البحر الهادئة بحال ملامحها...
شافو فيها البنات طول سفرهم وهما تيلمسو باللي شي حاجة ناقصة فيها . معرفوش شنو هي ..!! تيعرفوها مزيان .. من ايام الجامعة .. عارفين طبعها عارفينها فاش تتكون في قمة سعادتها .. دبا واخا تضحك تيحسو باللي شي حاجة ناقصة فيها... شي حاجة مفقودة.. وخا تيسولوها ما تتعاودش .. من طبعها كتومة وما تتعاودش اللي كان .. عندها قناعة باللي سرك دفنو و نساه .. وما توري لحد فين دفنتيه....
DU LIEST GERADE
تحزمت بحزام راشي
Kurzgeschichtenتحزّمت بحزام راشي؛ قصة باينة من عنوانها ، عامرة حزامات راشية و بعيدة كل البعد على المثالية و الزواق و الحياة الفانيدية ! قراءة ممتعة..
