تحزمت بحزام راشي

الجزء 16

مزال جالس هو و سفيان.. كان تيبان مزال مقلق من داكشي اللي طرا..

محمد: حشومة هادشي ديال دراري صغار.. بنادم كبير بعقلوو و يدير هاكا... معجبنيش هادشي لي دارت مرت كمال...

خيرة: ولكن اعمي...

قبل ما تكمل كلامها شاف فيها سفيان شوفة خلاتها .. تحبس كلامها في حلقها و تتراجع على شنو كانت غادة تقول .. ما كانتش باغية ياخذو فكرة خايبة على أحلام .. حيث هي اللي كانت حاسة بيها و عارفة ليها أسبابها اللي خلاوها دارت هاكاك..

ميمة: الله يهديك على راسك آ محمد نسى هادشي غادي غير تعصب راسك .. ان شاء الله مايتعاودشاي .. ساعتوو الله بنادم بعض المرات كيطلع ليه زعاااف...

محمد: حنا نبقاو غير فين ما كان شي مجمع نوضوها...

مينة: واا دير الما منين يدوز راعي لصحتك..

سفيان: (سد عينيه وفتحهم بتعب) تصبحو على خير

مينة: تصبح على خير اولدي...

خيرة تبعاتلو العين حتى خرج.. و بلعت ريقها بصعوبة .. كانت حاسة بحرقة في قلبها من تعامله البارد و الجاف معاها.. تلتيام وهو غابر فاش جا حتى السلام ما قالهاش .. بل حتى الشوفة ما كانش كيشوف فيها... حست بقلبها غادي يطرطق ، وندمت على هادوك المساجات اللي كانت تصيفطلو في اليومين الاولى باش تسول فيه ، و هو ما دار لها حتى اعتبار خلاها بين قوسين...

خلاو محمد على راحتو كيتفرج .. و مشاو عند مباركة اللي كانت ناعسة مريضة و سهيلة متكية حداها... شافتهم وهي تجلس مقادة وهي منزلة عينيها...

مينة: خالتك شوية..

سهيلة: طونسيون طالعة ليها بزاف 16 !

مينة: كلات الملح الييوووم .. درنا ليها الخبز مسوس حلفات لا كلاتو...

سهيلة: خاصها دير ريجييم نهار تنين ونديها لطبيب..

مينة: (شافت في خيرة) نوضي ابنيتي طلعي عند راجلك..

خيرة: (وقفات و تبسمت فوق خاطرها) تصبحو على خير...

مشات هزات ياقوت كانت ناعسة وطلعات.. حطات بنتها في بلاصتها وخرجات كترخف في شالها.. سمعات الما مطلوق في الدوش وكملت طريقها دخلات لغرفتها بدلات عليها و جمعات شعرها الفوق .. و مشات للحمام كتغسل في وجهها وتبروسي سنانها .. تيبان ليها غير الخيال دياله من الزاج و صوت الما اللي تقطع... فتح الزاج و خرج تيلوي في الفوطة... كانت تتبروسي سنانها بالثقالة... و كتشوف في انعكاسه في المرايا من تحت رموشها .. حتى خرج بلا ما يعطي لوجودها حتى اهتمام .. خلاها كترعد بالاعصاب.. غسلات فمها.. و مشات تبعاتو جلسات في طرف السرير.. كتسناه يكمل اللباس .. لبس شورت قصير وتكا ينعس...

خيرة: واخا نسولك

سفيان: (ببرود بلا مايشوف عندها) لا

خيرة: (طوات رجل فوق السرير ورجل طالقاها في الارض) انا لي حمقة كنتشاور معاك.. اصلا خاصك تسمع سؤالي وخاصك تجاوبني... حيت انا ماشي ديكور عندك في دار... فين كنتي هاد تلتيام ؟