وقفات وسط الدار تدور في عينيها بحال المصدومة ، وهو مشا جلس على الفوتوي فسخ صدايف القاميجة ورجع راسو اللور حاس بيه تيحرقو وقال بلا ميشوف لعندها..
ادريس: دخلي لبيت ترتاحي..
شدات اطراف قفطانها وشافت فيه وهي حاسة باحاسيس مخربقين داخلها فرحة وخوف .. و ضيييم...
ياسمين: اشمن بيت ؟
جاوبها غي بيدو ! بلعت ريقها ومشات جرات لي فاليز ديالها الغرفة و شداتهت عليها .. وسرحت نظرها تتنهد..وقفت قدام مراية تتشوف في راسها .. مزال ممتيقة بلي صافي تزوجااات ! مشات جلست في طرف سرير معبسة معارفة واش خاص تفرح ! ولا خاص تتصرف كزوجة .. ولا تتصرف على طبيعتها.. كانت دائما تتسول راسها فاش العرسان تيسدو عليهم بابهم اول مرة بعد العرس شنو تيقولو !؟ و كفاش تيتصرفو مع بعضياتهم !؟ واش تيتعاملو برسمية ولا تتكون هي حشمانةوهو تيدير كلشي و تيقول كلشي؟
جلسات بزاف ديال الوقت فوق هذاك السرير بوحدها .. طافية و معارفاش شنو خصها دير .. فير تتسول راسها علاش هي دبا هنا في البيت بوحدها .. فين راجلها اللي حلمات باول ليلة ليهم كلها ورد و شموع ؟
وقفات رخفات حزام قفطانها ورماتو فوق السرير .. وقلبها تيضرب و كل خوفها كان من داكشي اللي فكرت فيه...
البرود .. البرود ديال معاها في فترة التعارف و الخطوبة .. يستمر حتى في الزواااج .. وما يكونش هذاك طبعو.. وما غاديش يتبدل مور الزواج كيف قالو ليها..
وقفت تتزول في هداك القفطان الابيض والاكسسوارات .. ديماكيات وجهها و جمعت شعرها ولبست غوب دونوي وهي حاسة بالحشمة .. رشت عطر بارد وخفيف وهزات تتعكر شفايفها وتبسم مع المرايا .. في ثواني تبدل ليها المورال وعجبها راسها.. هزات بغاسلي رقيق حطاتو في معصها وبدات تتشوف في يدها وظفار مصبوغين بالحمر ..
علات واحد الحاجب تتشوف في صدرها اللي كان حجمه صغير من ديما كان معقدها ومخليها تحس بالنقص .. تنهدت وفسخت شعرها حتى وصل ليها لمؤخرتها ..جمعت النفس وطلقاتو...
ياسمين: (تتشوف مع المرايا عاجبها راسها) الزن هاهو .. الراجل فيناهوا !! .. (حطت صبعها على خدها و وقفت وقفة استغراب...) يكما يكون تيتسناني انا ندخل عليه !!؟
فتحت الباب بشوية تتحاول تسمعو فين كاين .. الحس ديالو مقطوع .. غير ريحة الكارو لي كانت معمرة الدنيا..عقدت حجبانها وخرجت حفيانة تتسلت طلات براسها بان ليها متكي فين كان جالس ورجليه مطلعهم على الفوتوي غارق في النعاس .. عوجت فمها وخرجت حاطة يدها على خصرها تتشوف لعندو مفقوصة...
ياسمين: (تتهضر مع راسها) هدا من نيتو ناعس هنا !! مال لبيت جرا عليه (تنهدت) يكون غير داه نعاس ؟ نفيقو ينعس فبلاصتو ؟
رجعت الغرفة هزات واحد ليزار ورجعات غطاتو حتى بغات تمشي وهي توقف ..جلست قرفصاء ..تتأمل في شعرو المعنكش ورموشو الكثيفة.. شفايفه اللي لونهم غامغ بسباب الكارو ..وتعابير وجهو وهو ناعس ..حطت يدها على خدها ساهية فيه ..بلعت ريقها مكرهاتش غير امتى تقيسو وتعنقو وتبوسو... تيجذبها بلا متحس...
YOU ARE READING
تحزمت بحزام راشي
短篇故事تحزّمت بحزام راشي؛ قصة باينة من عنوانها ، عامرة حزامات راشية و بعيدة كل البعد على المثالية و الزواق و الحياة الفانيدية ! قراءة ممتعة..
