تحزمت بحزام راشي

الجزء 31

كانت عاد دوشات .. لابسة بجامة ديال الحرير وريحة النقا طالعة منها .. واقفة عند المرايا تتنشف شعرها .. حتى سمعت الدقان في الباب علات حاجبها باستغراب .. حيث مكاين اللي يجي عندها..

فتحات الباب وهي تبسم بشوفتها ..

احلام: (بفرحة تتسلم عليها.) هاي هاي شكون جا عندي.. فاش قلتيلي واش راك في الدار ميحسابلي غاتجي...

خيرة:(معنقاها) قلت نجي نشوفك لاتقولي ما تنجيش.. وخا نتي متتسوليش..

احلام: (سدات الباب ودخلو) كنت مشغوولة هاد الايام حتى الخرووج شحال هادي مخررجت..

حطت خيرة صاشيات ديال الماكلة اللي جابت معها .. و جلسو في الصالون تيتعاودو..

احلام: شووفي باش نقوولها ليك من دابا .. صوني على داك راجلك قولي ليه ميزرربش عليك بحال ديما بغيناا نهضروو ونضحكو في خاطرنا اختيي..

خيرة: (زولات فولارها وطلقات شعرها على راحتو) ههه مابقى راجل...

احلام: (عقدت حجبانها) علاه مالو..

خيرة: (تنهدت) وصلنا لطريق مشدود اناوياه..

احلام: نتي شتك كلمة جوووج تقولي ليا طلاق... ولفتييها؟ شدار ليك داك الزمر عاوتانيي..

خيرة: داار لييه.. قالك بغا يتزووج وانا خاص نقبل ههه

احلام: (بقات غير تتشوف مفاهمة والو) ههه سفيان باغي يتزوج .. اه ونتي ؟

خيرة؛ اناا نعاود لراسي .. غير حيت لقاني كناخد الكينة بلا خباروو.. دار هاد لحالة .. باغي لي تولد ليه (يعصبية) اه مكانش عليا ناخدها بلا شوار .. ولكن هدا ماشي سبب..

احلام: تلقايه قاليك هكا غير باش يعصبك .. ولا يكون هو براسو قالها وهو معصب اشمن يتزوج؟؟ سفيان تنعرفو ماشي من هاد نوع ديال زوح نسا..

خيرة: الله يجيبك على الف خير.. لقيت تريكتو كاملها في راسهم الا انا .. وسطهم بحال ضبع (ساطت بفقصة) اودي معرررفتش فيين كان عقلييي نهااار نضت نتزووج..

احلام: قتلاتك الوحدانية ههه (طبطب على كتفها) بلا متعصبي راسك الى مصدق ليك .. سوسيه بقاي تبدلي في الرجال حتى طيحي في سييدهم مالك شنو خاسرة..

خيرة: ههه تضحكي عليا ههه انا عاد مزاال نعاود ندور بالرجال مالي حمقة ..

احلام: وشنو فيها ؟ مزال صغيرة و الحياة قدامك .. علاش توقفيها غير حيت واحد ولا زوج مصدقوش.. ضروري يكون شي واحد لي صادق..

خيرة: وطنزي عليا نتي لي جات معاك..

احلام: ندوي معاك بصح.. بغا يتزووج الله بعاونو يعطيك طلاقك وكل واحد في طرييق .. ولكن باش تبقاي تمرضي راسك لا واش نتي لي جا تحزني عليه..

خيرة: (بقهرة) نحزززن على راسيي..

احلام: (عنقاتها) من الخيير شي حوايح تطراو ليناا كنقولو علاش ونمرضو راسنا في الاخير تلقاوهم خير لينا والله .. هاد سفيان لا مكانش فيه الخير الله يعاونو..