قلوب بني نافع

١٥

الفصل الخامس عشر

قالت فايزة وهى تتطلع حولها ببعض الرهبة وبعض الحرص: مفيش، معنديش حد يچيب كيف قبل سابق، اتصرف واعمل بالاسامى.

قال الدجال بغضب:
- ما تاچي تشتغليها انتي مكاني!!
- انت على راسنا يا عم الشيخ.
- يبقى تسمعي الحديت وتنفذيه، عايز أطرها عشان نعرف نچدد العمل .

- طيب سيبك من بهية هى كده ولا كده محدش هيبص في خلقتها واصل بعد فضيحتها ومن غير اعمال..... المهم عندي دلوكت العمل الچديد اللي چيالك فيه، مهد واد الشيخ زايد يتچوز بنتي حسنة، ومعايا أطرها.

- مش كفاية اطر بنتك، لازمن اطره هو كمان.

- انت مش شيخ!، ما تتصرف من غير الطلبات دي!

- وانتى مش كنتي بتچيبي أطر البنية كل مرة في ميعاد تچديد العمل؟، اللي كنتي بتبعتيه كل مرة ابعتيه المرة دى كمان يچيب اطر الاخوات التنين اللي چاية تربطيهم واحدة من غير چواز والتاني لبنتك.

- اللي كنت ببعتها ماعدتش بتروح دارهم.

فكرت قليلا ثم قالت:
- طيب خلاص، لو وصلت لحاچة هرچعلك تاني.

وما ان وصلت الى الباب حتى استوقفها الدجال قائلا:
- خدي بالك ومترميش تكالك على ان حالها وقف من سيرتها العفشة، طول ما العمل منتهي ومتچددش كل شيء چايز انه يحصل.

خرجت من عنده وهى لا تهتم كثيرا بما قال فهي تعلم انه يقول ذلك من الاجل المال الكثير الذي كانت تعطيه له نصفه من أجل العمل والنصف الاخر من اجل التكتم على سرها....

نعم ففايزة هى من كانت السبب في تعاسة بهية وكل ما جرى لها....

"""""""""""""""""""""""""""""""
حزينة جدا، ينقسم قلبها منها الى شطرين كلما تذكرت ذلك اليوم، تجلس چمانة تتسائل بألم هل أتى بها الى هنا كى يكمل ما بدئه هناك ولم تعطيه فرصة في استكماله حيث انها اكتشفت حقيقته!!

"فلاش باك"

سافر مهد الى الصعيد بعدما أتاه خبر وفاة خاله، جلست چمانة على المكتب في الوحدة الصحية التي تؤدي تكليفها بها، كانت شاردة في قصتها مع مهد، قلبها يتمزق كلما تذكرت ان قوانين قبيلته تمنعه من الزواج بالغريبات، وهل هى سوى غريبة؟!

وفجأة قطع حبل افكارها دخول زميلها ماجد، والذي سألها بسخرية: سرحانة في مين يا چمانة؟

انتبهت له وسألته بتعجب:
- الناس بتسأل تقول سرحان في ايه مش في مين!!
- لا مانا عارف انك سرحانة في حد مش في حاجة.
- هل ده يفرق معاك؟
- طبعا يفرق معايا.
- ليه؟!!!
- عشان للأسف انتى مخدوعة ومن واجبي ناحية زميلة ليا انى اكشفلها الحقيقة ما دمت اعرفها.

ضيقت چمانة ما بين حاجبيها وهى تقول بعدم فهم:
- مخدوعة ايه وتكشفلي حقيقة ايه!!، انت بتحاول تقول ايه يا ماجد؟!