Unicode Version
အခန်း - ၄၀
ငါတို့ပြန်ဆုံဖြစ်ကြမှာလော့ ? ? ?
"ရပြီ စက်ကွင်း။ ဒီနားမှာရပ်လည်းအဆင်ပြေတယ်။"
အလုပ်ရှိသည့်အဆောက်အဦးကြီးရဲ့မလှမ်းမကမ်းတွင်ပဲရွက်ကြွေ,စက်ကွင်းကားကိုရပ်ခိုင်းလိုက်သည်။ စက်ကွင်းကားလေးရပ်သွားသည်နှင့်ကားနောက်ခန်းထဲမှနေ့တေးဆိုအရင်ဆင်းသွားသဖြင့်ရွက်ကြွေလည်းသူ့နောက်မှလိုက်ဆင်းလာခဲ့သည်။
နေ့တေးဆိုနဲ့အတူရွက်ကြွေလမ်းတစ်ဖက်တွင်ရှိနေသောအလုပ်ခွင်ထဲသို့ဝင်ရန်လျှောက်နေပြီးမှစက်ကွင်းကိုကျေးဇူးတင်စကားပြောရန်ကျန်နေသည်ကိုရွက်ကြွေသတိရသွားသဖြင့်
"ကိုနေ့တေးဆို ဝင်နှင့်။"
ရွက်ကြွေဘေးတွင်အတူလျှောက်နေသောနေ့တေးဆိုကိုပြောပြီးရပ်နေသေးသည့်စက်ကွင်းကားလေးဆီသို့ခပ်သွက်သွက်ပြန်လျှောက်ကာ
"ဟေ့ စက်ကွင်း။ ဒီနေ့ငါကိုကူညီပေးလို့ကျေးဇူးပဲနော်။ ငါနောက်ကျနေလို့အခုတော့ဒီလောက်ပဲ။"
စက်ကွင်းဆီကပြန်ဖြေစကားကိုရွက်ကြွေဆက်နားမထောင်နေတော့ပဲအလုပ်ခွင်၏ဝင်ပေါက်ရှေ့ရှိနေသောနေ့တေးဆိုရှိရာသို့အမြန်ပြေးလာခဲ့သည်။
အလုပ်ထဲဝင်ရန်နေ့တေးဆိုပြင်နေစဥ်အဆောက်အဦးမှထွက်လာသည့်ညို့စက်ဝန်းကိုမြင်လိုက်ရ၍နေ့တေးဆိုနောက်သို့အကြည့်လွှဲလိုက်တော့နေ့တေးဆိုရပ်နေသည့်နေရာသို့အပြေးလာနေသည့်ရွက်ကြွေဝေကိုတွေ့လိုက်ရသည့်အပြင်ရွက်ကြွေဝေဆီသို့အရှိန်ပြင်းပြင်းဖြင့်မောင်းနှင်လာသောကားတစ်စီးကိုပါတွေ့လိုက်ရသဖြင့်နေ့တေးဆိုလည်းမိမိရပ်နေရာသို့ရောက်ရန်ခြေလှမ်းအလှမ်းငယ်သာလိုတော့သောရွက်ကြွေဝေရှေ့သို့ခြေလှမ်းအနည်းငယ်တိုးလိုက်ပြီးရွက်ကြွေဝေ၏လက်ကိုမိမိဘက်သို့အရှိန်ဖြင့်ဆွဲလိုက်သည်။
အရှိန်ကြောင့်မိမိရင်ခွင်ထဲရောက်လာတော့မည့်ရွက်ကြွေဝေကြောင့်နေ့တေးဆိုဘေးသို့တစ်ချက်ရှောင်ကာရွက်ကြွေဝေလဲကျမသွားအောင်သာထိန်းမတ်ပေးလိုက်သည်။
