စစ်ဘက်ဆိုင်ရာတိုင်ပင်ခံ မျိုးဆက်များ

Chapter 14.1/14.2

အနက်ရောင်မျက်လုံးများက အရင်အတိုင်း ရန်လိုနေသေးပေမယ့် သူတို့၏အမူအရာများက မူလလောက် ဆိုးရွားခြင်း မရှိတော့ချေ။

ကုယွင်က အံကြိတ်ထားလိုက်သည်။ သူ မနေ့က သူမကို ကယ်တင်ပေးခဲ့ပြီး ဒီနေ့လည်း ဒဏ်ရာရှိနေသေးတာကို တွေးမိတာကြောင့် ကုယွင်က ဒီတစ်ကြိမ် သည်းခံလိုက်မည်ဟု ဆုံးဖြတ်လိုက်သည်။ ကုယွင်က စားပွဲဆီသို့ လျှောက်သွားကာ ထိုင်ခုံတစ်လုံး ဆွဲထုတ်ပြီး ထိုင်ချလိုက်သည်။ သူမ၏ မျက်နှာပေါ်မှ မကျေနပ်မှုများကို ဖုံးကွယ်မထားသော်လည်း ဘာမှတော့ ပြန်မပြောတော့ဘူး။

ကံကောင်းထောက်မစွာနဲ့ စုလင်းက ကုယွင်၏ဒေါသကို နှိုးဆွနိုင်မယ့် စိတ်တိုစရာ စကားလုံးများကို ထပ်မံ မပြောတော့ဘဲ နောက်ဆုံးတွင် လူတစ်စုက စားပွဲခုံရှည်ကြီးတွင် ဝိုင်းထိုင်နေကြသည်။ စစ်ဦးစီးချုပ်အနေဖြင့် စုလင်းက တပ်ဖွဲ့ဝင်များနှင့် စစ်သူကြီးများ၏ တပ်ဖြန့်ရမည့် အစီအစဉ်များကို သဘာဝကျကျ လမ်းညွှန်ပေးနေသည်။ သူက တိုက်ခိုက်ရမည့် အသေးစိတ်ပုံစံများကို ဆွေးနွေးနေပြီး သူပုန်စခန်း၏တည်နေရာကို ညွှန်ပြကာ "လို့မူဟိုင်ရဲ့စကားတွေအရ သူပုန်အရေအတွက်က အနည်းဆုံး တစ်သောင်းရှိတယ်။ နက်ဖြန်ရောက်ရင် စစ်သူကြီးယုက ထိပ်တန်းစစ်သည် ငါးထောင်ကို ဦးဆောင်ပြီး လမ်းဖွင့်ပေးရမယ်၊ တောကို မီးရှို့ပြီး သူပုန်တွေ ထွက်မပြေးအောင် တားဆီးဖို့ လက်ရွေးစင်စစ်သည် နှစ်သောင်းကို ငါ ဦးဆောင်မယ်၊ သူခိုးတွေရဲ့ နေရာကို လုံးဝ ဝိုင်းထားပြီး ပိုက်ကွန်ကို ဖြည်းဖြည်းချင်း ပိတ်မယ်၊ သူပုန်တွေကို လုံးဝ လွတ်မြောက်ခွင့် မပေးဘူး"

စုရန်က စုလင်းပခုံးပေါ်မှ ဒဏ်ရာအပေါက်က မည်မျှ နက်သည်ကို သူ့မျက်လုံးများဖြင့် မြင်ခဲ့ရတာကြောင့် စိုးရိမ်စိတ်ကို မထိန်းနိုင်ဘဲ "တာ့ကော၊ တာ့ကောက ဒဏ်ရာ ရနေတယ်-"

"ကိစ္စ မရှိဘူး၊ ငါ့မှာ ငါ့အတိုင်းအဆနဲ့ ငါ ရှိတယ်" စုလင်းက စုရန်ရဲ့ စကားကို အေးစက်မောက်မာစွာ တားဆီးလိုက်ပြီး "ရွှေတွေရဲ့တည်နေရာက နေရာပေါင်းစုံကို ပြန့်နှံ့နေနိုင်တယ်။ ရန်... မင်းက ထိပ်တန်းစစ်သည်တစ်သောင်းကို အုပ်စုလေးခုခွဲပြီး လမ်းကြောင်းလေးခုကနေ စေလွတ်ပေးဖို့ ဦးဆောင်ရမယ်၊ သူတို့ ရွှေတွေကို ကြားဖြတ်ပြီး ပြန်ယူသွားခွင့် မပေးဘူး။ ရွှေတွေကို တွေ့ပြီးတာနဲ့ ချက်ချင်း သယ်ထုတ်ပြီး လို့မူဟိုင်ကို လာယူဖို့ စီစဉ်ပေးလိုက်မယ်"