_ ما رضاش الناس يقولو طلقاتو مرتو .. مبغاتش تبرد ليه.. ولا على سيرة كاع ناس .. قال ما قال فلان طلقاتو مراتو .. كان عارفها عافية و متترضاش .. ونفسها عزيزة وعندها زايد ناقص .. لكن كان ثايق في راسو زيادة ...! ما كانش حاط في بالو باللي غتمشي طلق راسها .. كان تيقول دور حتى تعيا و توليلي... الشي اللي خلاه يرجع اعتبارو بالزواج بغيرها.. ورا طلاقهم مباشرة بلا ما يفكر بزاف..
عائلته تقبلت الموضوع عادي بنسبة ليهم كيبقى راجل ضروري يتزوج و احلام هي لي خاسرة !
مباركة جالسة بقميص هماوي مضمة الذهب مزينة خصرها .. و حويلقات اللويز في وذنها تيبانو يبريو تحت شالها الشفاف... تتصفق بيدها وتغني ليها بشوية تضحك و نابها ذهبي تيبري .. مزال محترمين موت مينة...
مباركة: عاجباني بنتي .. واا سهيلة هي بنتي .. عاجباني بنتي بالعيون كبار .. عاجباني بنتي...
في المقابل سهيلة تتحط اخر اللمسات مكياجها وتبسيمة ممفارقاش وجهها...
مباركة: واشفتي هانتي بقيتي حتى داك... طلعتي ما سويهلاش!! اش درتي ليهم تا تفارقو؟ (ضيقت عينيها) يكما سحرتي ليهم (خنزرت فيها) عنداك تكوني وكلتي ليا ولدي شي عجب....
سهيلة: ( ضحكات و وقفت تتلبس قفطانها لي واتاها ..) ما سحرتلو ما قربت ليه.. بحدو عرف شنو يصلاحلو اخالتي...
مباركة: وهكاك ولايني جمعي راسك.. واخ وقفتو على زواج دبا.. ماشي كيبحال كون داك بعزززك هازة راسك لسما .. دبا واخا يديك راه يبقا يعايرك بيها...
سهيلة: هضرتك ولات سم اخالتي .. خليني نفرح بهاد نهار كيف لبنات!
لبسات قفطانها فالغوز بارد... لبسات اكسسوارات و بلغة .. و شعرها خلاتو مطلوق جمعات غير خصلات من الوسط...
مباركة: كون مشيتو تكاتبتوو ورحتي لدويرتك.. لاش هاد كثرة البجوق...
سهيلة: وخليني ندير العز لراسي..
مباركة: باغية تزيريه على لعرس؟ والله لا دارو ليك.. مرت خوه يلاه ماتت .. و دار مرونة تواحد ما فگانتو... دار لك خاطرك يخطبك من عزيزك تكاتبي شري دهازك وسيري لدارك....
سهيلة ما جوبتهاش خرجات تتشوف على برا كلشي مقاد دنيا في الكوزينة تطيب العشا على قلبها عيات تتهرب لكن ما لقات كيف دير!! ولا فين ترجع الراس كيبقى عم راجلها واللومة راداها لختها لي فرطات في راجل بحال كمال ..
خيرة الفوق تتعاونها شوية وتنزل معندها خاطر بالها مع احلام...
دخل كمال و سفيان قالو السلام سفيان طلع و سهيلة جرات كمال لواحد القنت....
سهيلة: فين الورد؟!
كمال: (تيطلعها ينزلها بنظراته اللعوبة لابس الكلاص مأنق كعادته ) مشيت نجيبو .. قالو ليا راه عندك في دار...
YOU ARE READING
تحزمت بحزام راشي
Short Storyتحزّمت بحزام راشي؛ قصة باينة من عنوانها ، عامرة حزامات راشية و بعيدة كل البعد على المثالية و الزواق و الحياة الفانيدية ! قراءة ممتعة..
الجزء 25
Start from the beginning
