အထူးလုပ်ကြံရေးသမတစ်ယောက်ရဲ့ စာမျက်နှာသစ်

အပိုင်း (၁၀၁) အပေါက်ဆိုးတဲ့မိန်းမ

သည်အချိန်တွင် ရှန်ယွဲ့ကို စိတ်ပူပေးနေသည့် နောက်တစ်ယောက်က ရှိလေသည်။ ကျောင်းအုပ်ကြီး ချန်းယန်ပင်။ သူသည် ရှန်ယွဲ့ကို သိလေသည်။ အတိအကျဆိုရလျှင် သူသည် ရှန်ယွဲ့ကြောင့်သာ သည်ကျောင်း၏ ကျောင်းအုပ်အဖြစ် တာဝန်ပေးခံလိုက်ရခြင်းပင်။

ဟန်လင်းက ကျောင်းချိန်အတွင်း ရှန်ယွဲ့အား အထူးဂရုစိုက်ပေးပြီး သူမကို ဘာနစ်နာမှုမှ မခံစားရစေရန် မှာကြားခဲ့သည်။ နောက်ဆုံး ရှန်ယွဲ့သည် ဗဟိုမြို့တော်က ကျိုးမိသားစု၏ ကျေးဇူးရှင်တစ်ယောက်လည်း ဖြစ်လေသည်။

ရှန်ယွဲ့ တံခါးမှ ဝင်လာသည့်တခဏအတွင်း ချန်းယန်သည် သူမကို မှတ်မိသွားပြီး ရှန်ချန်က ရှန်ယွဲ့၏မောင်လေးမှန်း နားလည်သွားတော့သည်။ ရှန်ချန်သာ အနိုင်ကျင့်ခံခဲ့ရလျှင် ရှန်ယွဲ့ကို နစ်နာစေသည်နှင့် မခြားပေ။ ချန်းယန်၏နှလုံးမှာ တင်းကြပ်သွားတော့သည်။

ချန်းယန်က သူမကို နှုတ်ဆက်မည်ပြင်လိုက်စဥ်မှာပင် ရှန်ယွဲ့က အလျင်အမြန်လှုပ်ရှားလိုက်သည်ကို တွေ့လိုက်ရ၏။ သူမသည် ကိစ္စများကို လုံးဝ အစမဖော်ဘဲ သူ့ကို နေရာပင်မပေးချေ။ ကျန်းမိသားစုသည်လည်း Sမြို့တွင် နာမည်ကြီးမိသားစုတစ်ခုဖြစ်ပြီး အလွယ်တကူ အပြစ်လုပ်လို့ မရနိုင်သော်လည်း ကျိုးမိသားစုနှင့် ယှဥ်လျှင်တော့ ဘာမှမဟုတ်။

ထို့ကြောင့် သူသည် ရှန်ယွဲ့က လူကြမ်းများနှင့် စတင်တိုက်ခိုက်လိုက်သည်ကို မြင်လိုက်ရသည်နှင့် ချက်ချင်း ချန်းယန်က ဟန်လင်းကို မြန်မြန်ဖုန်းခေါ်လိုက်၏။

" ဟယ်လို မြို့တော်ဝန်ဟန် ကျန်းမိသားစုက....."

ဟန်လင်းသည် အစည်းအဝေးတစ်ခု လုပ်နေ၏။ ချန်းယန်ထံမှ ဖုန်းကို မြင်လိုက်ချိန်တွင် ရှန်ယွဲ့ တစ်ခုခုဖြစ်သွားပြီအထင်နှင့် စိတ်ပူသွားတော့သည်။ သူသည် လုံးဝ အချိန်မဆွဲရဲဘဲ ဖုန်းကို မြန်မြန် ကိုင်လိုက်၏။ ကျန်းမိသားစု ရှန်ယွဲ့လက်မောင်းအတွက် ယွမ်တစ်သိန်းပေးမည်ဟု ခြိမ်းခြောက်သံကြားလိုက်ရချိန်တွင်တော့ သူသည် ရုတ်ချည်းဆိုသလို ဒေါသူပုန်ထသွားတော့သည်။