Halatang nakakita ng katutuwaan niya si Melanie kaya dumayo agad siya sa kuwarto nina Shin sa main house, wala nang pakialam kung makisingit siya sa mga pusa roon ni Zhi.
"Hoy, Shin. Kaya pala tatahi-tahimik ka lang kanina," nakangising sabi ni Melanie nang dumapa sa kama, inaagawan ng puwesto ng mga Maine Coon at Siberian Cat na nakatambay rin doon.
"Ano na namang ginagawa mo rito?" tanong ni Shin, tutok sa pagsusuklay sa buhok ni Zhi na bagong ligo lang.
"Bahay ko 'to, ako pa talaga tatanungin mo niyan, ha?" Bumangon na si Mel at dumampot ng isang Turkish Van sa kama para lang laruin. "Shookt talaga ako kanina na napaiyak ni Chamee si Mine. Sabi ko pa, 'How?' Hindi pa pala nakakainom ng gamot yung isa bago pumunta rito."
"Halata namang hindi pa siya nakakainom. Tingin mo ba, mapapasuot siya ni Eugene ng onesie kung nakainom siya ng gamot?"
"'Yon nga rin ang naisip ko. Bakit si Eugene ang inaalala ni Chamee na pinipilit magsuot ng pajamas, e kahit pagsuotin mo naman si Eugene ng maid uniform, ayos lang sa kanya basta cute siya." Bine-baby na ni Melanie ang pusa at panguso-nguso pa habang kinakausap iyon kung nagugutom na ba. "Ay, wait! Wala pa namang picture si Mine na naka-onesie siya, tama?"
"Malay ko," sagot lang ni Shin.
"Baka kasi pagalitan ni Jun. Alam mo namang conscious na conscious 'yon sa anak niya." Inugoy-ugoy sa pagkarga ni Melanie ang pusa hanggang sa mapailag siya nang muntik na siyang sampalin ng paw nito. "Kinakalaban mo na 'ko?" banta niya sa pusa at pinanggigilan na naman ito. "Ako nagpapakain sa 'yo, ha? Gusto mong dalhin kita do'n sa kambingan?"
"Ba't nandito ka naman, Meng?!"
Napaangat ng tingin niya si Melanie nang humiyaw sa pintuan ng kuwarto si Calvin.
"Pakialam mo ba? Bahay ko 'to," masungit na sagot ni Melanie at binalikan ang pusang inaaway niya. "Ano? Matapang ka na?"
"Nakaalis na sina Divine?" tanong ni Shin kay Calvin.
"Kahahatid lang namin paalis ng farm." Lumapit sa kanila si Calvin at naghatak ng ottoman para upuan niya. Tumapat pa siya sa binatilyong sinusuklayan ni Shin. "Ano'ng pinakain sa 'yo nina Ate Ruby?" tanong niya kay Zhi.
"Vegetables and chicken."
"How's your throat?"
"It's getting better na. Hindi na siya itchy like kanina." Hinawakan naman ni Zhi ang leeg saka tumango sa daddy niya.
Hindi nakasabay sa kanila si Zhi sa pagkain dahil inatake na naman ng allergy niya sa tapang ng halo-halong mga pabango ng mga bisita nila. Mas mabuti na rin iyon para kina Calvin dahil ayaw nilang magtanong sa kanila ang anak tungkol sa nangyayari kina Eugene. Paborito pa naman itong kuya ni Zhi.
"Papa, can I play with Ahia?" tanong ni Zhi, at sigurado silang si Eugene ang tinutukoy nito. Kanina pa naman naghihintay si Zhi na makalaro ng chess ang Kuya Eugene niya, pero hindi matuloy-tuloy dahil galit nga ito noong hapon at wala na sa main house pagdating ng gabi.
"Kayo na lang muna ni Tito Pat ang maglaro tonight. Ahia's not feeling well. Tomorrow, check natin kung okay na siya," paliwanag ni Calvin sa anak at ginulo ang buhok nito. Pagtayo niya at pagtingin kay Shin, ang sama agad ng tingin sa kanya ng asawang ilang minuto nang sinusuklayan si Zhi tapos guguluhin lang niya ang buhok.
"HAHAHA!" Ang lakas tuloy ng tawa ni Melanie nang tingnan si Shin na sinusundan ng tingin si Calvin hanggang pagpunta nito sa bathroom. "Cookies, tingnan mo parents mo, parang mga timang." Binuhat ni Melanie ang isang black and white Ragamuffin na nananahimik sa kama. "Papasyal kami ni Cookies sa labas . . ." Pasayaw-sayaw pa si Melanie nang pumunta sa pintuan ng kuwarto.
