عَــــقــاقــّـيـــّـر

[ مشهد ]

واگفة حايرة بأمري أروح و اجي بتوتر
و گلبي يرجف من الخوف عليهم

ابتعدت مسافة و صوت بچي واحد منهم يهز جدران گلبي
تقربت بفزع اركض للغرفة و صوت بكائهم شگ صدري

بعدت ايد بارق عنهم ما متحملة الموقف
و عيوني تبچي وياهم

-- شگلت موو گلت اطلعي

-- ما اگدر بارق مااا اگدر حباب خليني يمهم

-- من يشوفوج يجنون أكثر اطلعي براا

هزيت راسي معاندة و عيوني تصب عليهم
وهم متمددين بتعب
سودة بوجهي كون، شلون خليتكم بهذا الحال
أول و آخر مرة ادزكم بيد أحد

تلسمت جبهتهم واحد واحد
و أخذت أصغرهم حاظنته على صدري بخوف وقلق

-- يمه يمه أبني ابني، تعبت ماما، توجعت وصرت واوا أمي أنت، گلبي و روحي، صرت واوا
بعد أبد ما اتركك والله، أبوس عيونك الحلوة هااي
امي أنت

احچي معاه مقربته على گلبي ازيد وادحگ على ايده الصغيرة بيها المغذي
تلمستها واني متوسطة السرير و الاثنين حولي
و بارق يدحگ من بعيد بتعب

بعدته عن صدري يشهك بوجع
عدلت شعره الناعم الخفيف بأطراف أصابعي بهدوء
و خليته بمكانه
و توجهت على أكبرهم
نفس الحالة، بيده المغذي و يبچي بهدوء متوجع مفتح عيونه بتعب

بست جبهته برجفة، مسدت على وجهه بقلق

-- هاا أمي هااا،
شبيك أنت يا روح امك، يوجعك شيي، ياذيك شي

اشر على بطنه و روحي فحطت

-- بارق شلوون ترجعهم للبيت شلوووون تسمح نطلعهم

رد بتعب

-- لعد شلون بس أريد افتهم، الدكتور گال طلعهم هذوا شلون اعصى بيهم بالطوارئ

سكتت و ايدي صارت على ملكتهم، نايمة بهدوء و عيونها متروسة دموع

همست بوهن

-- اريد ابدللهم، مو زين يبقون بهاي الملابس هسه كلها جراثيم

هز رأسه مأيد كلامي و رحت بسرعة اجيب ملابسهم من الغرفة
و بيدي مناديل معطرة ندية، بودرة أطفال و غطيات جديدة
كلها دخلتها على الغرفة و بديت ابدل ألهم ملابسهم و امسح ايديهم بالمناديل
و اعدل شعرهم
خليتهم ثلاثتهم على التخت واحد يم الثاني و غطيتهم زين و سكتوا بهدوء

تقرب بارق متوضي و گعد يم رأسهم يقرأ قرآن بصوت خافت ترتاح له المسامع
دقائق و ثلاثهم ناموا بعمق مرتاحين
واني بالجهة الثانية گاعدة على الأرض أراقبهم بقلق
أخاف وأحد منهم يفز وأني ما موجودة