يتيــم الديـــار#اكتملت

البارت الرابع عشر

(الصاله)

عليا : شو فيك انتي بعد مهمومه ؟
اريا : يعني ما تعرفين ؟
عليا : حتى انتي ؟ يالليل ما بنخلص قلتلكم توبه اتكلم والله توبه خلاص سوا اللي تبون كلمي بلعرب خلها تكلم ميثا
اريا : بعد شو عليا ؟ اعرف مالك دخل فالموضوع ولا توقعتي كلام ميثا بس كان ممكن نتفاداه لو هديتي اللعب شويه
عليا تتلوم : روحي ضميري مأنبني لا تزيدينه دخيلك
اريا : احاتي زينه والله احس الصدامت يالسه تتبهعا وكل شوي تنهار اكثر ولا من متى زينه تبكي هالشكل ع حد
عليا : مب ضعف عادي تبكي ترا
اريا : فاهمه بس ها يعني انها انهارت خلاص ولا هي م تبكي عندنا ولا قدامنا اصلا لو ما كانت متأثره وايد ما بكت
عليا : بس ترا اللي صارلها وايد طبيعي نشوف رد الفعل هذا لا تعظمين من زينه وايد تراها بشر فالنهايه مهما كابرت
اريا تتنهد : ليش ما تفهميني عليا ؟ ما قلت انه مب طبيعي قلتلك زينه تتضايق وتزعل لكن عمرها ما انهارت ! هي حتى لما خلصت من الحجز اللي الكل ينهار عقبه ويتعالج ومدري شو ما وضحتلنا شيء مع انها مليون بالميه ما تتشافت منه
عليا : الخلاصه شو الحل الحين ؟ نكلم ميثا ولا شو نسوي بالضبط ؟
اريا : لا ما نكلم احد ابد هذا بيضايق زينه دبل
عليا : عيل شنسوي ؟
اريا : مدري ما تشوفيني متنحه لي ساعه ! احاول احصل موضوع سالفه اروح افتحها مع زينه لكن مافي فايده
عليا : انا احس انها تحتاج وقت لنفسها شوي فلا نشدها نخليها ع راحتها يكفي اللي صار لو طول الموضوع بنتدخل ونبدا نكلمها
اريا : مافي حل ثاني اصلا نصبر ونشوف
............

اما الوضع فالمكتبه كان مزري ميثا وسط كومة الشغل وفي نص زحمة افكارها وخوفها من عمق الجرح اللي تركته في قلب زينه ذا لو بقى لها قلب بعد كل اللي واجهته ولكن ميثا كانت تشوف ان غلط تخلي زينه تتأمل زياده وكل مالها المشاعر تزيد وقربها واي اهتمام من ميثا بيخلي زينه تفكر بعيد هذا غير عن فارق السن اللي شاغل بال ميثا وفعلا زينه تعتبر قاصر وحبها جريمه رسميه !

اريا تدخل : سلام
ميثا : عليكم السلام
اريا : شو مستوي ليش هالعفسه كلها ؟
ميثا : وصلت كتب جديده ومب قادره احصل شفرتها فالارشيف فما اعرف كيف اطلعها
اريا : ليش ماتعرفين؟ مب انتي امينة مكتبه والخرابيط هاي كلها ولا ؟
ميثا : زينه شغاله عليه من البدايه والشفرات عندها للحين ما خلصتهم كلهم فما انرسلوا لي عشان اعرف انسه اريا
اريا : بسيطه أسالي زينه ليش كل هالحوسه واللخبطه معقول بتخلصين ها كله يدوي ؟
ميثا تخزها : تتوقعيني اقدر اطلب منها شيء ! ولا انتي تستهبلين
اريا : ما قلنا لكم لا تزرعون الدرب شوك يمكن تمرونه حافين !
ميثا : استغفرالله ممكن تسون شغلكم وبس ؟ خلوني انا فحالي بخلصه
اريا : ترا مب تحدي وعادي ترومين تكلمين زينه تسوي شغلها العلاقات الشخصيه مالها دخل
عليا : لو تبين نروم نكلمها عنك
اريا : هيه عادي
ميثا : انا بكلمها مب حلوه ارسلكم انتوا وكأننا يهال
اريا : والله اللي تشوفينه المهم انا بسير اخلص شغلي - تروح -
ميثا لعليا : كيفها زينه ؟
عليا : اسأليها هي انا مدري عن شي ولا ابي ادري بعد اللي صار بسببي
ميثا : شو فيكم كلكم ما تتحاكون ؟
عليا : لان ميثا حتى ولو كان الصح فبعدكم في انسانيه عنبو كنتي تقدرين تقولينها بطريقه ارحم شوي ومب قدامنا
ميثا : استغفرالله انزين انا غلطت وبتصرف بس ما ينفع تتم متعلقه !
عليا : كان الأولى تفكرين فيها وتعرفين زين ان نحن ما تعودنا ع اللي سويتيه لزينه اكيد بيروح فكرها لبعيد ! ليتك عاملتيها مثلنا وخلص
ميثا : بس ماكاتنت بوضعكم هي طالعه من حجز ومضروبه طبيعي بهتم لها اكثر
عليا : اوكيه وشكرا لانك سويتي كذا بس غلط لشخص يتيم عمره محد ابتسم له فهالمكان الا لمصلحه وكان الأولى ان تحطين حدود مب الحين عقب ما طاح الفاس فالراس تسولفين
ميثا : طيب طيب صار اللي صار وكلام المشرفات اصلا كان صحيح انا ما المفروض احتك
عليا : ميثا لا تسسببيلي انهيار من متى كلام المشرفات صح ؟ قلتلك مب غلط اللي سويتيه بس كان المفروض ما تعطينها اهتمام اكثر من اللي جانا عشان ما تفهم غلط مع انتي ماكان مقصدك شي ولكن عمره هذا ما يخلي المشرفات كلامهم اصلا صحيح !!
ميثا : انزين عليا شسوي الحين ؟ كيف اتصرف ؟
عليا : والله مدري بس بخصوص الارشهف ترا ها شغلها ماله علاقه زعلكم ولو عرفت الاداره انه ما سوته ولا كملته وفيه مشكله بتتورط زينه دبل ف سيري لها وكلميها او خلينا نروح نناديها للشغل
ميثا : بروح الحين - تروح -
عليا : يارب صبرني بس وخرجني من هالمكان سالمه غانمه
اريا تجي : شو فيك تتحلطمين ؟
عليا : مدري كنت احسب ميثا عاقله اثرها العن منكم انتوا الثنتين المهم هي راحت لزينه عشان الشغل
اريا : الله يستر من المناحه اللي بتستوي هناك
عليا : ما احس تراهنين ؟
اريا مصدومه : ع شو؟
عليا : لو زينه انهارت وقلبتها مناحه لك اللي تبين ولو العكس وخلت ميثا نفس الهواء لي اللي ابا شقلتي ؟
اريا : عليا اعقلي ! احس انتي فيوزاتك ضربت يسار
عليا : ليش اللي يتم وياكم يعقل؟ الا بيجن مصيره
المشرفه تجي : يا سلام سوالف وسوالف والمكان معفوس ولا خلص شغله
اريا : تونا قايلين بسم الله وترا الشغل وايد واتوقع ميث وضحتلكم انها تبي تقلب هالمكتبه لشيء يسوى
المشرفه : كلها كتب وتصفصف ليش كل هالمده ؟
ميثا تدخل : لان هالكتب علم والصفصفه ع قولك علم ثاني ف لو سمحتوا لا تتدخلون فشغلي عشان اسوي مكتبه تسوى ونثقف البنات بدل ما كل وقتهم ضايع ع الفاضي
المشرفه : لما نشوف اخرها معكم بعدين ليش الاخت توها تجي !
ميثا : من قالك توها تجي ؟ كانت موجوده من اول الشفت بس جاها دوار شوي وخليتها تريح والحين جبتها ثاني
المشرفه : زين عيل يلا انا بكمل شغلي خلونا نشوف المكتبه اللي تسوى ف اسرع وقت عاد - تستهزء فيهم -
ميثا : بتشوفين قريب تأكدي
اريا : يععع يا شين الشوفه والله ليتها ما يات ع ويهه الصبح
ميثا : ماعليكم منها خ نكمل شغل
زينه : وين الجهاز ؟
ميثا : داخل المكتب
زينه تدخل : طيب
عليا : ها بشري ؟ عسى الامور طيبه
ميثا : ما كلمتني بس دخلت وقلتلها تعالي عشان نظام الارشفه وجات
اريا : زين انها جات
عليا : فزت بالرهان يلا لي الطلب
اريا : ما دخلت معك برهات قلتلك اعقلي وياليت تطبيقن اللي اقوله
ميثا : رهان شو ما فهمت ؟؟
عليا : والله تحديتها هل زينه بتخليك هواء لا يرى ولا بتنهار عليك ؟ وفزت
ميثا : مبروك لانها فعلا خلتني هواء المهم تخلص الشغل بعدها بتفهم مع الوقت ان كلامي صحيح
عليا : كلامك صحيح اما اسلوبك فحدث ولا حرج
ميثا : الحين ما كنتي ضد اننا نكون قراب وتهددين ؟ وببلغ وبسوي ؟ كيف تتوقعين انه يصير اللي تبينه بدون زعل ؟ فهميني
عليا : والله انا ما قلتلكم ابعدوا بشين نفس وكلام زفت قلتلكم خفوا مارضيتوا
ميثا : لا تضحكين ع عمرك عليا عمره الفراق ما ستوى بشكل حلو ابشرك يعني لكن الغلط مني انا كان المفروض اعرف ان حد مثلك مستحيل يبلغ اصلا انتي تخافين من الهواء
عليا : لا والله ؟ خلصتي من زينه جاء دوري ؟ اقول خلينا نخلص شغل بدال ما نبدأ نفر حكي صح ماشي ي حبابة القصر
ميثا : والله لو تزيدين بعطيك ع ويهك بالكتب ! انا لو حبابة قصر ع قولك ماكان انهيت العلاقه معها وبهالقساوه ف اكسري الشر
عليا : تبين اصفق لك ؟ ترا ذا المفروض اللي يصير اما اسلوبك لا تحطينه علي !
ميثا: محد حط عليك شيء بس ثاني مره اذا شفتي ربعك مستانسين حاولي تلاقيلك شيء تستانسين فيه بدال ما تخربين عليهم وتصايحين ببلغ ببلغ
اريا : انتي وهي!!!!! خلاص عاد كم اعماركم انتوا ؟ كل وحده تعاير الثانيه بشيء وين عايشين ؟ مب كافي علينا الميتم والمشرفات انتوا زود ع ها بعد
ميثا : والله لو تخلينها تلم لسانها ما بيصير شيء لكنها كل ماتحكي تجيب مصيبه
اريا : خلاص ميثا قلنا ! اسكتوا كل وحده تشوف شغلها

............ ميثا تدخل المكتب ..................

عليا : هذا اللي ناقص
اريا : تراك غلطانه عليا والله وبس وقفي هالاعياد اللي تجيبينها
عليا : انا بعد غلطانه هنا؟ انتوا شو ؟ تشوفون شيء ماشوفه ولا شو ؟
اريا : عليا انتي بنفسك معترفه لي ضميرك انبك وانك ما قصدتي كذا وكلامها ترا ما طلع عن هالموضوع كله وفعلا مافي فراق بدون زعل
عليا : لا والله ؟ انا قلتلها كلمي زينه ققدامنا وقوليلها كل هاك الكلام ؟
اريا : انتي سبب فها بعدين محد يبعد عن حد وهو فرحان ومبتسم عليا ! اكيد حتى لو قالته ب الطف الكلام واخفه بتزعل زينه
عليا : شو تبيني اسوي ؟ ارد بالزمن يعني ترا صار
اريا : اباك تسكتين وبطلي تقولين اشياء تزيد الطين بله دخيل الله تقبلي انك غلطتي ولين يتصلح هالغلط تحملي الكلام اللي يقوله المتأذي !
عليا تسكت : ...

............... داخل المكتب ...................

ميثا : خلصتي ؟
زينه : فيه مليون كتاب برا يحتاج لي ساعتين ع الاقل
ميثا : طيب انا بس اسأل
زينه : اوكي ما خلصت
ميثا : سوري ع اللي قلته قدام البنات كان المفروض بيننا بس وبطريقه غير جي انا كان اسلوبي وقح وايد
زينه تسكت : ....
ميثا : ما بتردين يعني ؟
زينه تسكت :.....
ميثا : ترا مهما كنا مختلفين من الاحترام تردين علي ! عيب الي تسويه
زينه : اذا بيريحك ف ردي هو اوكي
ميثا : قلتلك اني اسفه
زينه : اوكي
ميثا : اه هذا نوع عقابك لي ع اللي صار يعني ؟
زينه : لا ابد لكن اوكي كل اللي عندي
ميثا : انا اعرف انه كان جارح لك لكن انا اسفه ياليت ارجع واغير الطريقه اللي قلتها فيها
زينه : اوكي
ميثا تعصب : زينه يوم اكلمك احترميني وردي ع كلامي شو اوكي شو شايفتني ؟
زينه تضحك : كان احترمتيني بالأول
ميثا : قلتلك اني اسفه واحاول اتناقش معك عشان افهم !
زينه : تفهمين شو ميثا ؟ كلامك واضح وانا ع قولك كنت اتلصق وما صدقت ع الله خلاص انا بعيد حاليا وما بيننا الا الشغل شو تبين مني بعد ؟
ميثا : مابا منك شيء بس ابا تفهمين اني ما قصدت ولا كانت نيتي انه تنجرحين بس كان ضغط عليا من جهه والمشرفات وتهديدهم وكل شيء خلاني انهار
زينه : اوكي ميثا صار اللي صار وانا ببقى بعيد مثل ما تبين اما ع الاسلوب ف عادي انا وحده تربت فميتم هذا ولا شيء عند اللي عشته
ميثا : بس ..
زينه تقاطعها : خلاص ميثا لاتطولينها وهي قصيره انا مافخاطري شيء لو هذا اللي تبينه ولا من بينا زعل نحن من اليوم اصلا ما بيكون بيننا شيء !

كملت زينه شغلها وميثا متنحه تطالع كيف انها جرحت زينه بشكل عميق خلاها تتكلم وياها بهالشكل وتوصل لمرحله انها تكون بهالتبلد وانها حتى ما تبا تجادل او تطلع اللي فخاطرها او حتى ترد الجرح لميثا ! شافت ان زينه تأذت لدرجة انها ساكته وترد بالحرف الواحد عليها واللي فهم ميثا ان فات الاوان ع الاعتذار او حتى جبر خاطرها !

#يتبع