يتيــم الديـــار#اكتملت

البارت الخامس

وفعلا صاروا مثل ما خططت بلعرب وآريا وانحجزت اول جلسه، بس القصه كانت في اقناع زينه انها تتكلم مع الدكتور وبفكره ثانيه من بلعرب انهم يحطون الفون مقابلها والدكتور يبدإ يتكلم معها بدون سابق انذار وبطريقته وخبرته يقنعها تتكلم معاه وتدخل فالجلسه ويبدإ علاجها .. لكن عليا كانت رافضه تدخل بلعرب وكانت تحس ان اللي صاير ما بيوديهم الا فداهيه وان آريا بتورطهم وتورط نفسها قبل كل حذ وفالنهايه مافي احد يلوم عليا ع خوفها تخيل انك تعيش في مكان انت محكوم فيه ٢٤ ساعه ولا تقدر تسوي شيء وفجأه يصير لك مخرج للعالم ؟ كيف بتكون ردة الفعل ؟

ما كثير ناس مجرد ذكرى الضرب والتعذيب والطفوله الصعبه اثرت فيهم ولا هم قادرين يتخطون ومن ضمنهم عليا ولا تنلام ، صار اللي اتفقت عليه اريا وبلعربو فعلا صار هالشيء مع زينه لكن كان فيه رفض تام ولا ردت ع الدكتور ابد طول الجلسه وما كان فيه فايده من علاجها هذا ولا افكارهم لكن انعكس شيء واحد بس واللي هو ان زينه تكلمت ويا البنات

زينه : انا مابا منكم دكتور وحلسات انا احتاجكم انتوا معي وبس
آريا : وانا معك طيب عليا بعد ولا بنخليك ياروحي بس انتي قوليلنا شو نقدر نسوي كيف نخفف عنك كل ها ؟
زينه : مب لازم تسون شيء بس خلكم حولي وسولفولي عن اي شيء الا هالموضوع لا تسألوني عنه ولا تفتحوه خلوه فزاويه ولا ابا اذكره
عليا : حاضر من عيوننا بعد بس المهم لا تتمين جي ساكته عنا وتصيحين خليلنا مجال نكلممك فيه ونحاول
زينه : ان شاءالله
آريا تحضنها : كل شيء بيتعدل ويرجع احسن من قبل ان شاءالله
زينه بتعب : منو هالبنت اللي كانت تحاول تقنعني ويا الدكتور ؟
اريا : بلعرب
زينه : هيه منو بلعرب يعني من وين عرفتيها واي مجمع هذي؟
عليا : اي مجمع ؟ هذي ربيعتها من تويتر عرفتها من كم يوم
زينه : من جدك آريا ؟
عليا : قوليلها تكفين تعبت انصح وتقولي اني ابالغ
زينه : آريا تراهم ما يمزحون بالحجز وانتي مستحيل تتحملين اللي يصير هناك فلا تسوين شيء جي يوديك فداهيه
آريا : شو فيكم ما اسوي غلط نتكلم ونسولف
زينه : منو طرا الغلط؟ انا اعرفك واعرف النيه بس ترا ما يصير هم معطينا عشان الاتصالات وتسجيل الثانوي وبعدهم تحت المراقبه يعني اي وقت يسحبونه ولو في شيء تنتلين تل
آريا : شسوي يعني ؟
زينه : تصرفي آريا خففي كلام وياها او سوي شيء المهم يحميك من السوالف اللي مالها داعي
آريا : ماريد اخفف شيء مش غلط قضينا عمارنا خايفين ع الفاضي والبنت ماتسوي شيء بس نسولف شو المشكله
زينه : تستغبين آريا؟ تقوليلنا نحن هالكلام؟ فاهمين ترا ومن زمان وهذا لي دخلني الحجز لو نسيتي انا اقولك هم بيشوفونها مشكله
آريا : خلهم يشوفون لي يبونه انا بحاول م يكشفوني
عليا : وكشفوك كيف الترتيب ؟ وقتها شو بينفعك فيه هالهياط ؟ بتدشين الحجز واشك انك تطلعين منه حيه
آريا : ما بيكشفوني وبفهم بلعرب وضعي وبتتساعد وياي ما بتتم تدق او شيء
زينه تتنهد : والله اللي تشوفينه لكن علي قلتلك لاني شفت الويل داخل وما اظنك تستحملين ربعه
آريا : زينه شو هالكلام! انا كنت الوم عليا ع انها بارده وياهم جي ومعاهم ع اي كلمه قمتي تسوين نفسها !!
زينه : لا والله بس عرفت ان ما المفروض اعطيهم فرصه يذلوني الذل هاك لو اني قاتله ولا شيء م كان صار كذا بس اللي صار داخل خلاني استحقر نفسي واحسني نكره جد
آريا : خلاص اهدي طيب - تحس ان زينه تألمت -
زينه : لا مش خلاص مابا تجربين هاك الشعور والسكوت عنهم عشاننا نحن وعشان م نعطيهم فرصه يقللون من قيمتنا وشخصياتنا
عليا : قلتلكم من زمان بس تحريتوه خوف انا شخص حذر وماحب حد يتععرض لي لو بحرف فما اعطيهم فرصه ولا اخليهم يمسكون علي شيء وها اللي لازم تسونه
زينه : نبعد قدر الامكان عن الاداره ونلتزم بالقوانين لين نخلص هالفصل ونطلع نعيش حياه زينه
عليا : وهاي بلعرب مهما كان تبين انها زينه يمكن ولد؟ يمكن حد خيالي ؟ يمكن شخص مكذب بمعلوماته م تدرين
زينه : صح كلامها ويمكن حد من الدار اصلا يحاول يختبرك ويورطك بعدها بمشكله مالها اول ولا تالي
آريا : لا شفت صورها وكل شيء وشفت جنسيتها دليل واسمها وكله حتى جنسها وكل شيء صح
زينه : انتبهي آريا لا تدخلين ف دهاليز مالك فيها