يتيــم الديـــار#اكتملت

بارت ٢

غربت شمس يوم وبدأ يوم ثاني .. يوم ما قاموا فيه البنات على وقتهم من السهر على الفون واللعب اللي كان صاير واصوات الضحك وتبادل الصور وغيرها، ماكان قايم الا عليا اللي ضد اللي سوه وكل شوي توصيهم من خوفها انهم يروحون بداهيه او يمكن فكرة التحرر من سلطه فُرضت من ادارة الدار مخيفه الى درجة اي شيء خارجها يعتبر غلط وعيب ؟

عليا تصحيهم : قوموا ؟ يا بنات يلا
زينه بصوت مليان نعاس : تكفين خلاص
عليا : شو خلاص قوموا ورانا شغل اليوم كلنا بالمطبخ
آريا تصحصح وتقوم : يالله ما شبعت رقاد والله
عليا : من فراغ؟؟ ماهو من فراغ من هاللعب حق امس امداكم تدمنون هذا فون ترا مب مخدرات عشان جي تسون بعماركم
آريا : انا قمت انزين خلاص - تتمدد -
عليا : والعيون مقفله شالفايده؟ والثانيه هذي انتيييي هييييي قومي - تصرخ بإذن زينه -
زينه : ياربي انا القاها من الاداره ولا من عليا ياربي ليش ليش جي تسوي فيني
عليا تسحب اللحاف : قومي ورانا شغل مالي خلق نتدبل بشغل المطبخ اسبوع هو يوم وننهار من كثر التعب
زينه : دخيلكم ابدوا قبلي
عليا : وفالحضور؟ نجيب خيالك يحضر عنك صح قومي يلا فكيني
زينه تقوم بصعوبه : اخخ طيب قمنا قمناااااا يلعن هالحياه
آريا تشوف فونها : خيبه كل ها رسايل ؟ ٣٥٦ ليش !
عليا : ليش ؟ ومستغربه يعني ؟ ليش حضرتكم خليتوا شيء ما دخلتوه امس طول الليل وضحك ومصخره م قدرنا نرقد
زينه : خيبه خيبه كلتيها ما سوت عليها ترا عادي هذي اغلبها اشعارات مب رسايل خاصه
عليا : العبوا انتوا وورطونا بعدين
زينه : يا بنت الناس انتي بس فكينا من الوسواس وخلاص ما بيصير شيء

في نص حديثهم دخلت المشرفه غرفتهم وبدت تهاوش وماخلت شيء ما قالته لانهم كانوا متأخرين ع الحضور، هنا عليا كانت تطالعهم بنظرة اللي شفتوا كان معي حق لكن سرعان ما صدمتهم المشرفه بأنهم تدبلوا بشغل المطبخ وبيتمون يشتغلون فيه اسبوعين

المطبخ يمكن انه سهل ظاهره ولكنه اكثر الاماكن كرهًا من الطلبه لانه متعب وشغله كثير ولا يخلص هذا غير الوصاخه وانهم يضطرون ينظفون ورا كل اللي بالدار والشغل فيه بدون استراحات

عليا تعصب : شو قلت؟ بالله شو قلت لكم انا ؟ بنروح فداهيه من ورا هالفونات وهاي البدايه
زينه : عليا ليش بتصيحين؟ ترا كله شغل مطبخ اسبوعين فكل الحالات نحن نكرف شتتفرق معك فقسم المطبخ ولا مكان ثاني
عليا : بسكت انا دامكم منزعجين هالكثر مني لكني مابا غير مصلحتكم
آريا تحضنها : يا حياتي انتي يا عليا والله اعرف تحاتينا وخايفه علينا وكل شيء لكن يا روحي ما بيصير الا الخييير اهديي بس وتطمني - تحاول تروقها -
عليا : كيفكم ما بتدخل خلاص
زينه : علوي ترا ما تهونين علينا بس هديها شوي ما بيصير شيء بنستانس وخلص

سكتت عليا لأنها عارفه انها زاعجتهم بكلامها ويبون بس يستانسون من دون ما يفكرون باللي ممكن يصير، هي بدت بالتأخير وهوشة مشرفه لكن الصدق البنات مش عارفين انه دخولهم بهالشكل وهالاندفاع بيوديهم لأكثر من الداهيه مثل ما قالت عليا