- اتأخرت عليك ..
- لا ابدًا ساعة ونص مش مشكلة بسيطة
- آسفة بجد، مكنتش اعرف الطريق هيبقي زحمة كده
- ما قولتلك اعدي عليكي وانتى قولتي لا ..
- ماهو انا لازم اتعود ..
- بقالك ٣ اسابيع وكل مره بتتأخري ع فكرة ..
- وانت بتستناني ..
- لو مستنتكيش هستني مين..
- بس ايه أحساسك وانت قاعد فى حاله من الإنتظار ..؟
- إحساس خنيق، لكن الل بيهونه انى عارف ان أخر الإنتظار دا هتيجي ..
- تخيل بقي إحساسي وانا بستناك ،استنيتك تتكلم ، استنيتك تاخد خطوة ، استنيتك تقرب، ولسه هستناك لما تسافر وترجع، متخيل إحساسي ايه ؟
- مسافرش ..
- لا سافر دا مستقبلك وحياتك وخطوة انت سعيت عليها كتير وهتفرق معانا ، وهي فترة وهنكون مع بعض ، بس مش هقدر انكر إحساسي وخوفي عليك ومنك
- خايفة مني ؟
- خايفة تنساني، خايفة تتغير، الل هيكون بينا بحور وبلاد، لما هتوحشني هنتكلم فيديو وصوت هفتقد وجودك قدامي ومعايا ..لما احب اهرب من الدنيا اروح فين وانت بعيد ، متخيل علاقتنا هتبقي أزاي ..؟
- وقت ما تحبي تهربي هتلاقيني فى إنتظارك ، مفيش حاجة هتتغير أوعدك ، الل بينا مش سهل يتبخر، يوميًا هكون معاكي وهتعيشي معايا كل لحظة وكل موقف ، المده دى هتعدي سوا لغاية ما نبقي مع بعض ونفتكرها ونضحك ، أنا وعدتك ان مهما حصل ومر عليا انتى زى ماانتي مش هتتغيري لأنك أساس كل حاجة فى حياتي ، متخافيش
- يعني هوحشك ..؟!
- انتى وحشاني وانتي قدامك ..
- ايه اكتر حاجة هتوحشك فيا ..؟!
- كوباية الشاي بالنعناع الل بنشربها مع بعض ع البحر ع أنغام الست ام كلثوم وهي بتقول أنت عمري إللى ابتدي بنورك صباحه انت انت عمري ..
ضحكت على صوته قرب مني وقالي : هتوحشيني ..
- انت هتوحشني أكتر
- خليكي واثقه من حاجة واحدة ، انا قبلك كنت تايهه، لقيت نفسي لما لقيتك، فمستحيل اسيبك لأنه مش بمزاجي ، انت هنا (على قلبه ) مربعة ، بحبك وهفضل أحبك لاخر يوم فى عمري ..
- يلا اطلب لينا حاجة بقي
- شاى بنعناع
- شاى بنعناع
نزل لينا كوبيتين شاي بنعناع وفى الخلفية أم كلثوم بتغني وهو بيدندن معاها وباصصلي وبيقول :
أمل حياتي يا حب غالي ما ينتهيش
يا أحلى غنوة، غنوة سمعها قلبي ولا تتنسيش ❤
مشاهد بقلمي #يارا_سمير ✨🤎
