အမျိုးသားခုနစ်ယောက်ကို ချစ်ခွင့်ပန်ရမယ်တဲ့..! ဘယ်လိုလုပ်ရမလဲ..? [ 2 ]

189

ခန့်မှန်းမိသလောက် ကျွင်းမော့ တစ်ခုခုလုပ်ထားတာ ဖြစ်ရမည်။ ခြူးမုယွင်ခမျာ မိန်းမောနေသည့်ကြားမှ သက်ပြင်းချလိုက်မိသည်။

အန္တိမဆေးကျမ်းကို ‘လှည့်ဖျားလိမ်လည်ခြင်း’ ဆေးကျမ်းလို့သာ နာမည်ပြောင်းလိုက်ပါတော့..!

ကျွင်းမော့ရဲ့ ပင်ကိုပါရမီနဲ့ ကောင်းကင်ဘုံကိုတောင် အံတုနိုင်တဲ့ ဒီဆေးကျမ်း… နှစ်ခုပေါင်းလိုက်လို့ကတော့ သူ မကြာခင် ကောင်းကင်ဘုံရောက်သွားမှာတောင် ကြောက်မိပါရဲ့..!

ခြူးမုယွင်က အလျင်မလိုခဲ့ပေ။ ယဲ့သမ့်သမ့်လေးလည်း ယခုတလော ဗိုက်သိပ်မဆာပေ။ အစားအသောက်နည်းခြင်းက ဖွံ့ဖြိုးကြီးထွားမှု လျော့ကျလာခြင်းကို ရည်ညွှန်းနေသည်။ ထို့အပြင် ယဲ့သမ့်သမ့်လေးသည် ရှို့လော်နယ်မြေမှ လုံးဝကွဲထွက်သွားခြင်း မရှိသေးရာ လစဥ်လတိုင်း ခြူးမုယွင်နှင့် ရှို့လော်နယ်မြေ ပေါင်းစည်းရာမှ ထွက်ပေါ်လာသော စွမ်းအင်များသည် သူ အသက်ရှင်ရန် အလုံအလောက် ထောက်ပံ့ပေးနိုင်သည်။

အပြင်လောကမှာ ဖြစ်ပျက်နေသမျှကတော့…

ပုံရိပ်ယောင်နန်းတော်တွင် ဇာတ်ရှုပ်ခဲ့ပြီးနောက် ရှန်ရွှိန်ယန်းနှင့် ရှဲ့ချင်းလန်တို့သည့် ‘လင်းမု’ အား ယောင်မိစ္ဆာနယ်မြေအတွင်း မြေလှန်ရှာကြတော့သည်။ သို့ဖြစ်ရာ သူ့အတွက် အချိန်ရသေးသည်။

ရှန်ရွှိန်ယန်း၏အာရုံက ‘အသက်တံခါး’ဘက် လှည့်မသွားသရွှေ့ ခြူးမုယွင်အတွက် အကွက်ရွှေ့ရန် အချိန်ရသေးသည့် သဘောပင်။

ကျွင်းမော့၏ လက်ရှိအခြေအနေက သိပ်မဟန်ပေ။ ခြူးမုယွင်သာ ဆက်ပြီးနာခံနေလျှင် ကျွင်းမော့က သူ့ကို တစ်သက်လုံး လှောင်ပိတ်ထားလိမ့်မည်။ သို့သော် ဆန့်ကျင်လိုက်ပြန်လျှင်လည်း… တစ်ခုခုလုပ်ပစ်လိုက်မှာ စိုးရသည်။

ထို့ကြောင့် ဖြည်းဖြည်းချင်းသာ အချိန်ယူရတော့မည်။

ခြူးမုယွင်တစ်ယောက် စိတ်အေးလက်အေး အိပ်ပျော်နေခဲ့၏။ ဘယ်တုန်းကမှ အခုလို စိတ်ချလက်ချ အိပ်မပျော်ခဲ့ဖူးပေ။

သူ နိုးလာသောအခါ ကျွင်းမော့၏ အနမ်းဖွဖွလေးက စောင့်ကြိုနေခဲ့သည်။