聽日的故事 (廣東口語版本)

肥叉飯

我無神無氣咁同亞媽講：「亞媽我肚痛，疴左好多次，肚好痛呀。」亞媽乃乃閒咁話：「抵你呀，叫你唔好飲咁多綠寶；死命咁飲，失禮人。好在彩叔係自己人，如果唔係亞媽第時點見人呀。」

我聽到亞媽鬧，都唔敢駁嘴，但個肚真係痛到無乜辦法，唯有再同亞媽求救：「亞媽，唔係呢，我個肚真係好痛，個屁股又痛，你快啲救下我啦。」亞媽好似開始原諒我：「你唔聽教，疴死都抵你架，拿拿臨過來搽油，搽完油就唔痛啦。」

我聽到亞媽肯救我，我就拿高件衫行過去：「亞媽快啲搽啦，好痛呀！」亞媽好擔心咁話：「快腳瞓上床啦，企係度點幫你搽呀？」我拿拿聲走上床度瞓，然後亞媽將藥油倒係我肚腩上面，一路捽一路笑話：「你個大肚腩，半支油都唔夠你搽，仲係咁肥，下次唔同你搽啦，費事用晒我的藥油呀。」

我開始嬲亞媽：「我都唔肥，都話我唔肥咯；亞財仔佢地瘦之嘛。大舊話俾我聽架，我仲細隻個的豬同大笨象好多架，有排都唔肥呀。」亞媽知我嬲，走過來攬番我條頸：「聽日唔會嬲老母既，老母攬番、錫番，明日俾多十蚊你買飯食，唔好嬲老母啦。」

我聽到聽日有多一個飯盒食，我就話：「我唔嬲亞媽你都得，你話番我唔肥先，唔係我重會嬲架。」亞媽笑住話：「係啦，聽日唔肥。聽日重係最瘦添。拿，呢度二十蚊，唔准食二盒肥叉呀，只准食一盒。」

我聽到亞媽話我瘦，我梗係開心番啦，不過聽到他只准我食一盒肥叉飯，我又有啲唔開心。不過我心諗聽日食一盒肥燒肉飯啦，亞媽又無話唔俾，我諗到呢度就忍唔住笑左出來：「哈，哈，哈。」亞媽好似知我心事咁，竟然話：「都係咪啦，明日食一盒肥叉、一盒油雞飯好啦，你都唔准食肥燒肉飯呀！」我聽到亞媽咁講，心入面只可以話自己黑仔啦。

第二日起身我就攞錢去肥叔叔度買飯盒食，我話：「肥叔叔，唔該你一盒肥叉飯、一盒油雞飯。」肥叔叔問我：「聽日，做乜買兩盒飯，老豆番左來呀？」我答肥叔叔話：「唔係，亞媽俾左二十蚊我食飯，你睇下。」我係褲袋度想拿兩張十蚊紙出來給肥叔叔睇，點知搵來搵去都搵唔到。

肥叔叔見我搵來搵去都搵唔到，就話啦：「聽日你個大炮王呀，又話亞媽俾二十蚊你買飯食？」我索性除左條褲來搵、除埋件衫、拖鞋，光脫脫搵，但都係無。我開始因為無飯食想喊：「肥叔叔，真係有架，沉晚我肚痛疴左好多次，亞媽幫我搽藥油，搽完之後佢俾我架。」

肥叔叔話：「係喇，係喇，我知道有喇，你唔好喊，依家肥叔叔請你食呢兩盒飯。你要乖，唔好喊啦。」我喊住話：「唔得架，亞媽話唔可以立亂要人野。佢知道實鬧我架。」肥叔叔面口好為難，佢忽然話：「聽日呀，你幫肥叔叔忙好唔好？」我諗起亞媽教，人地有事就一定要幫忙，我就答：「好，肥叔叔你要聽日點幫你呀？」

肥叔叔話：「聽日呀，今日肥叔叔用左啲新叉燒同燒肉，但係又唔知好唔好味道，你幫肥叔叔試食下，睇下味道得唔得？肥叔叔請你飲汽水呀。」我聽到只係試食咁簡單就話：「嗚...試食，好...嗚...肥叔叔，我梗係可以幫你；不過，嗚...我想飲綠寶呀，嗚...」肥叔叔笑住話：「好，飲綠寶，梗係得啦。拿，依家你坐係度慢慢食，我去隔離士多買汽水返來你飲。」

我一路食一路等，咁啱見到大舊同亞財仔行過，大舊大聲叫我：「聽日，你做乜係度食飯呀？唔返屋企食？」我就話俾大舊聽：「肥叔叔叫我試下食啲叉燒和燒肉好唔好唔食丫嘛，佢重話請我飲綠寶呀。」大舊同亞財仔聽到我有綠寶飲，佢地個樣不知幾恨：「綠寶呀，係咪少爺仔飲個支呀。」

我好得戚咁話：「綠寶喎，梗係啦。」我哋一路係度講，都未曾講完噚日飲綠寶肚疴啲野，肥叔叔就已經攞住支綠寶返來。肥叔叔開口話：「聽日，點呀？我啲肥叉燒同油雞好唔好味呀？」我照直同肥叔叔講：「好味呀，不過咪同平時嗰啲一樣味道。」肥叔叔眨眨眼話：「乜一樣味道咩？你快啲飲綠寶啦。」

我好開心咁揸住樽綠寶飲，我望到大舊同亞財仔猛咁吞口水，我就問肥叔叔：「肥叔叔，我可唔可以請啲綠寶朋友飲呀？」肥叔叔笑笑口話：「梗係得啦。」我於是問大舊和亞財仔，但都未開口，大舊就攞左我支綠寶話：「多謝。」大舊俾支綠寶亞財仔：「財仔，你飲啖啦。」亞財仔飲完之後，大舊又攞支綠寶俾我話：「聽日你都飲啖啦。」我飲完一啖，大舊就話：「咁我都飲一啖啦。」我們睇住大舊唔停口咁將啲綠寶倒入個口度，兩邊面漲到好似個飽咁。

大舊俾返支重有少少的綠寶我，我見佢骨骨骨咁將面入邊嗰啲綠寶吞晒。大舊好滿足咁話：「呢啖綠寶，真係好味。」我和亞財仔聽到大舊話"一啖"，都忍唔住笑左出來，大舊見我們笑，佢又笑埋一份。

我們三個手拉手行返屋企，我返到屋企開門，見到亞媽坐係度，我就叫聲佢。亞媽同我講：「聽日，做乜你今日無帶錢去食飯呀？減......唔肚餓呀？」我倔住亞媽：「哼，你話減乜呀！」亞媽笑笑口話：「無，我見你無攞嗰二十蚊，我驚你無食飯肚餓嘛。」我詫異道：「我無攞二十蚊咩？我漏左二十蚊係屋企呀？」亞媽答：「係呀！我返來係地下見到架。」

我係亞媽手度攞左二十蚊衝出門口，好快咁跑去肥叔叔度。肥叔叔問我：「聽日，做乜呀？唔夠飽呀？」我氣喘喘咁話：「**...**...唔係呀，肥叔叔，**...原來我個二十蚊漏左係屋企地下，頭先返屋企亞媽執左俾返我啦。**...依家過來俾返你架。」肥叔叔眨眨眼話：「聽日，你唔記得左啦，頭先係肥叔叔叫你幫我試食架嘛，做乜要收你錢呀？你係咪想食多一盒肥叉同一盒油雞呀？」

我傻更更係度笑：「肥叔叔......哈哈哈哈......」

＊＊＊　　　＊＊＊　　　＊＊＊　　　＊＊＊

小兒子神秘的拉著我說：「爸爸給我二十塊，我要買雞塊你吃。」我好奇問：「怎麼對爸那麼好，買雞塊給我吃？」他咪著眼睛笑道：「雞塊你吃，玩具車我玩。爸爸你替我吃那些雞塊好嗎？」我笑著道：「我知道天下沒那麼好的事。」隨手拿二十塊給小兒子，他歡天喜地的拿著錢，拉著我出門去。

小兒子一邊走一邊說：「爸爸你喜歡那一輛？我們換三號好嗎？」我忍著笑道：「爸爸喜歡三號，我們買三號好嗎？」小兒子說道：「三號好，不過看上去四號也不錯。」我說道：「我們只選一款好啦，不然待會吃不下飯，明天才再選四號，好嗎？」

小兒子聽著我的提議，滿心歡喜的答道：「那好吧，今天先要三號，爸爸你答應我啦，明天我要四號的。」小兒子抱著我的雞塊和他的汽車包，笑著道：「爸爸，今天我們吃肥叉燒和油雞好嗎？」我說道：「怎麼今天對爸爸那麼好，又有雞塊，又陪爸爸吃燒味？」

小兒子正色的道：「我想爸爸開心嘛，你愛吃肥叉燒我便陪你吃咯。」看著小兒子又教自己想起那些舊事，二十塊、肥叉燒、油雞。我還想起一件事，我向小兒子問道：「你要喝汽水嗎？」小兒子笑道：「好啊，我要喝可樂！」我笑著問小兒子：「怎麼愛喝可樂？黑黑的顏色。」小兒子收起笑容正式道：「No Coke, No Hope.」只聽著小兒子拿著兩小包，一邊跑一邊笑：「爸爸跑快一點，外婆在家裡等我們吃飯呢。」看著小兒子的笑臉，我一臉滿足的起勁跟著跑。