聽日的故事 (廣東口語版本)

雪崩

小寶看著電視, 大叫：「爸爸快過來看，雪崩啊。大雪嘩拉嘩拉的衝下來，很嚇人。」

我看著畫面白茫茫一片，樹木石頭都給砸倒，雪像瀑布奔騰，又像西部的野牛群蠻衝。

小寶又嚷道：「雪崩啊。若果我站在那裡肯定給沖成一個大雪人，爸爸對不？」我有點發呆的聽著。小寶又喚道：「爸爸，你怎麼麼拉？雪崩嘛，不怕，我在哩。」

我又聽著小寶輕喚的一句：「雪崩。」我飄到遠遠的那一天。

＊＊　　＊＊　　＊＊　　＊＊

我坐係病床邊，輕牽著她的手安慰道：「忍下痛，聽醫生講，吸氣、呼氣；寶寶好快就會出陪我們拉。」

她把手拉到咀邊咬住：「聽日，我好痛呀。我唔生拉，我唔要寶寶拉，我唔生拉。」

我手上傳來一圈痛楚，我安慰道：「無事拉，等陣寶寶出來，我們食雪糕補番。好快，一、二、三；三、二、一，就出來架拉。忍多陣。我催下醫生同姑娘他們，一陣就生完，眨下眼就搞掂。」

她咬著手：「快，快你條命。我都痛左成晚，他正衰仔來架，搞到我咁痛，陣間出來，要醫生大力啲打他屁股，喊大聲啲我先平穩得番。」

我心又亂，口又亂：「好呀，打大力啲。唔大力打過他，我就跟他姓。」

她忍唔住笑，咬住的牙鬆左下：「唓，他姓明，你唔跟他姓，唔通跟我姓呀。」她望住我雙眼帶著愧疚：「聽日。我好想抱住你，多謝你。我無其他野可以給你，我就只有寶寶可以送給你。你真係會要他？你唔好一時衝動呀。」

我起身埋床雙手抱住她，額頭碰著她額頭：「我人生本來就衝動拉，唔好擔心我；以後有你同寶寶陪我，我不知幾開心。飯都食多二碗。我好想再錫你一啖，好唔好。」

她面紅腼腆：「好多人呀。」旁邊一大堆聲音：「我哋乜睇唔到。」「今日的電視節目真係好睇。」「你們隨便呀，我睇緊報紙好忙架，秒秒鐘幾十萬上落，唔得閒睇其他野。」

她抬起上半身，紅著面：「最衰係你，咸濕鬼。」她係我面頰輕輕啄一下。我傻笑：「我覺得你錫我嗰陣，我充滿力量，好舒服。」旁邊又一陣口哨和大笑。她帶點慍帶點怒帶點嬌羞：「你重講，收聲。唔準嘈。」她對住旁邊大叫：「重有你們，唔准笑我的聽日。聽日只係可以給我取笑，他係我的玩具，係我的寶。」她一邊鬧，一邊抱實我：「聽日，我個肚好痛呀，不如唔生咯，下次無咁痛，我先再生過拉。」

我聽落總覺得有少少問題，一時間諗唔到問題係邊度。醫生和護士開始巡房，我放低她隻手跑過去：「醫生你快啲過來望下溫妮，她話好痛呀，已經痛左成晚；不如唔好生住咯，過幾日唔痛至生啦。」醫生同護士望住我，又望下溫妮，醫生開聲：「明生、明太。你們唔好擔心，臨產前陣痛都正常既，雖然你的時間比較偏長，我們會密切監視住。生產時間係依照生理時鐘，唔到你自由控制架，今日都痛左咁耐，唔通你想過幾日又痛一次？我諗時間都差唔多，到時你們見到肥肥白白的小朋友，乜野都值番拉。」

她扁住咀瞪住我：「他若果真係對我好，我至考慮做明太，依家都繼續做住溫小姐先。」

我小跑番埋去，拿毛巾同她抹汗：「知道，遵命，溫妮女王。」我開始照背河東獅吼的經典對白：「由而家開始我只會錫曬你一個，縱壞你，唔會呃你，應承你嘅每一件事都會做到，對你講嘅每一句說話都會係真心既，唔做得恰你、話你，要信曬你，人哋蝦你我會第一時間出黎撐你，你開心我會替你開心，你唔開心我都會氹翻你開心，永遠都覺得你最靚，發夢都要見到你，係我心入面只有你，就係咁之嘛！溫怩，對唔住」＊註一

「好凍呀，姑娘唔該給張被我。」「姑娘，我汗毛豎晒；有無藥食呀。」「唔得拉，太幸福呀；我都要分啲呀。」醫生同姑娘望住我們，我見醫生都有少少忍唔到笑：「醫生，你想笑就笑拉。但係我係真心架。」我擰番轉頭，捉實她隻手，望住她雙眼，我覺得好幸福，有一個人可以給我去愛，她無離開我。我望到她流眼淚，我話：「溫妮，你做乜喊呀。好痛呀？」我伸隻手埋去：「給你咬拉，痛就咬我，我皮厚脂肪厚，咬完你就鬆番架拉。」她眼淚好似水喉咁停唔到：「我都無喊，樓上無閂水喉之嘛。」我用另一隻手幫她掃頭髮，幫她抹汗：「無乸乸又喊，都話女人水做拉。唔好喊拉，喊就唔靚，唔靚就無人要拉。」她大力咬我：「你敢，我醜死你都唔准走，唔准唔要我。岩岩先講完愛我，依家就變心。」她大力摔開我隻手：「全世界男人都係衰人，我唔要拉，我都話唔要架拉，做乜咁唔公平，做乜要我受尼啲苦。我唔要呀。」