聽日的故事 (廣東口語版本)

奧運選手

呢排成日都睇到人寫勵志雋言，我又寫左一個。人地話榕書頭講古佬，講故仔都會有開場白，我諗左好耐，就尼句拉：「你哋好，我英文名叫two 摩盧，中文名叫明天，不過人人都叫我聽日。」

亞媽話我個名好威，係大醫生同我改架，佢話以前同親老豆拿攞錢，做乜都好，佢緊係話聽日，到我出世嗰陣，醫生問要同我改乜名，我老豆又同人講聽日。亞媽急起上來，就叫醫生幫我改個好聽既名；醫生話聽日都好好聽，就幫我改左做明天，重起埋個英文名俾我，叫Tomorrow。

好咯，威水史唔講咁多住，講下我噚日睇電視先啦。噚日睇完李麗珊風帆奪標，我就有個新志願，要做奧運金牌選手。我滿心歡喜把新志願話俾老豆聽，老豆聽完就兩巴掌打埋黎：「老母，都叫你咪成日俾個仔睇電視啦；係咪呢，搞到佢成日發埋晒啲白日夢。」

我重未講得切給亞媽聽，亞媽就跟手鬧我：「金牌，廚房罐油就金牌啦，咁鍾意金，我依家就打你一鑊金。」我邊學朱健華的背越式躲避亞媽的籐條，邊用劉易斯的三步跳，跳離重災區，手急眼快咁將鐵閘同門打開，都唔記得晒平時亞媽教嗰啲乜鬼：冬防、防賊、出街閂門，我真係乜都唔記得晒。

我話咁快咁走到去村口，見到老死大舊，我第一時間講俾大舊聽我既新志願，大舊一邊聽一邊笑，佢話：「你參加奧運。哈哈哈，你去做相撲選手呀，哈哈哈。」大舊一邊笑一邊幫我發表新志願，懋叔和順嫂聽到都甜入心，最厲害的是八姨婆，她笑到牙骹甩左，要打三條九叫救傷車。

我的志願俾全村人奉為金句，忽然間全條村都興講：「你以後都唔使乜乜物物，你大個仔做金牌選手就得啦。」Ｂ仔唔食飯，Ｂ嬸就話：「依家你食飯唔食飯呀？唔食，我俾埋金牌選手食，你大個係咪想好似佢咁呀。都唔湊米氣架，大就搵錢拉，做律師、做醫生，走去發個死人夢．．．．．．」就係咁，Ｂ仔話因為怕我食埋佢碗飯，所以佢都唔記得老母講乜，拿拿林就成碗食晒。

早兩日我行過二叔公屋企，二叔公一見到我，就大大力咁閂門，我聽到佢大聲咁同財仔講：「亞財，我話過你呀，你以後重係同呢啲白癡一齊玩，就以後都唔好番唻。」由個日開始財仔就無乜同我玩，佢話阿爺唔准佢同我玩，佢仲學二叔公講野：「呸，埃宅發冷，緊係矛東西考左，一天到暗都採哋講賣鬼。」我聽來聽去都唔知佢嗡乜，財仔話，二叔公講我一日到晚都唔做正經野，淨係度嗡埋晒唔等駛既野。

經過成條村老老少少、大大小小的教訓，有人用巴掌、有人用口水、有人笑、有人鬧，我都唔明，點解我想去攞金牌都唔得？我行行行，行左出村口，見到隔離村個傻佬，亞媽話過千祈唔好同傻佬玩，佢食人架，我哋條村有一年好多細路仔唔見左，就係俾佢食左。我一見到傻佬，我好驚，好想掉頭走，但隻腳係咁係度震，震到我都行唔到，連身都擰唔番轉頭。

我以為死梗，我諗起亞媽講過既故仔～熊人唔食死人，我腳軟軟順勢瞓係地下，停止呼吸，成身唔郁。過左一陣，我單開左眼望下，發覺傻佬唔見左，心神定番落黎，我單開埋右眼，見到傻佬瞓係我隔離。我好驚。嚇到大嗌，傻佬到見到我嗌，佢又一路笑一路嗌。我不停咁嗌，又聽到佢不停咁嗌，我覺得好好笑；佢見到我笑，又跟著我笑。我大笑、佢大笑；我大嗌、佢大嗌；然後輪到佢大嗌我大嗌、佢大笑我大笑。到後尾唔知笑左同嗌左幾耐，因為我都驚到無晒氣，坐左係地度抖大氣。

我問佢：「傻佬，你係度做乜？」傻佬話：「傻佬，你係度做乜？」我話：「我叫明天，唔係傻佬。我係度練習做奧運選手。」佢話：「我叫明天，唔係傻佬。我係度練習做奧運選手。」我奇道：「咦，乜你又想做奧運選手咩？」佢話：「咦，乜你又想奧運選手咩？」我話：「係呀，我要做奧運選手，我要跳高做豬健嘩、要跳遠做流二Ｃ、要游水做屎忽支，重要．．．哎，重有一個，重要，我記得啦，重要坐係度講野做何手信。」佢話：「係呀，我要做奧運選手，我要高、斯、支，要坐；我唔要坐，我要飛，要飛。嗚。飛。」

佢一邊行一邊伸開手係度飛，我大聲叫住佢：「唔係斯，唔係支呀，喂，喂。。」點知佢越走越遠，我忽然好開心，我都唔想再教番啱佢，我跟住佢，我大嗌：「係呀，我要做奧運選手，我要飛，嗚。嗚。我要飛，飛，飛。」

返到屋企，我同亞媽講：「亞媽，今日我係村口見到傻佬。你知唔知佢講乜呀？」亞媽一聽到我同傻佬玩，就舉起手作勢要打我，她大聲鬧：「又出去玩，叫左你幾多次唔好同傻佬玩？你硬係唔聽，好呀，來呀；我依家就打死你，好過聽日你俾佢食左。」

我一邊走，一邊逃離亞媽的追捕，心裡邊係度諗，點解亞媽你硬係要打我，我有志願都唔得？然後跑，跑左好遠，又跑到去村口，我諗番今日同傻佬玩，傻佬同我講既所有野，我一路走一路跳，大叫：「係呀，我要做奧運選手，我要飛，我要飛，我要飛。。。。」

＊＊＊　　　＊＊＊　　　＊＊＊　　　＊＊＊

故仔講完咯，唔知你係邊一個？老豆？亞媽？大舊？Ｂ仔？Ｂ嬸？懋叔？順嫂？八姨婆？二叔公？財仔？傻佬？

我好希望你係傻佬，咁最起碼我唔使俾人打，又唔使俾人鬧，又唔使俾人笑。嗚......飛呀，我要飛啦，下次再同你玩過，拜拜。

＊＊＊　　　＊＊＊　　　＊＊＊　　　＊＊＊

小兒子跑來跟我說道：「爸爸，我長大要作個奧運選手。」這句無心話讓我想起小時候的一段往事。回過神來，小兒子使勁搖著我手臂說道：「爸爸，我將來長大要作奧運選手哩。」我想了好一會，溫柔地跟他說：「小寶，你要做奧運選手可以；爸爸小時候也跟你一樣有志氣。那你以後要努力一點，不多練習的話，別說金牌，就選手也當不來。」

我以小兒子跟我相同的理想感到溫馨，我問他：「那你想當那一種比賽的選手，要拿那一面金牌？」小兒子傲氣地說道：「我要贏跳水，要拿金牌冠軍，像伏明霞一樣的棒。」我一邊聽一邊想，小兒子為甚麼不要像孫偉、熊倪。他續道：「我要嫁給董伯伯，要比伏明霞更厲害耶。」

我呷在口中的茶全都給噴洒，小兒子未經浪花，先經口水花的洗禮。我笑著說：「你是男孩子，咋嫁給董伯伯。」他笑嘻嘻：「咭，我騙你玩嘛。」我抓著小兒子，用下把在他身上搔來搔去，笑道：「好哩，你做最能忍癢的金牌選手吧，現下爸爸替你訓練。來。呵．呵．呵．來。呵．呵．呵。」