聽日的故事 (廣東口語版本)

陽光

啱啱放工。我第一次有自己的收入，手心拿住自己賺的人工，一共一百二十蚊。我問左陳老師好多次，她先准我今年加入做暑期工隊伍，我去左蒸餾水廠做跟車工人。之前好多年，她總係話：「聽日，你重係細路仔，唔准返工住；你最重要既任務係讀好書，學更多有用既知識。」

我一直希望自己都能夠出份力，我知道每日的飯餐、校服同其他大大小小的開支雜費，都係探望我們既叔叔、姨姨捐助；我重知道尼啲捐助並唔穩定。我希望其他細佬妹，同我以前一樣，可以食到肥肥白白、健健康康。

我沿住馬路行返學校，行下行下見到有間新開的舖頭，望清楚係間漫畫舖。我停係門口望入去裝下。入面突然沖舊野出來撞跌我。我定定神，抬高頭見到二個女仔紅住面，伸手想拉起我。我對她們大笑：「我成三個妳哋咁重，邊拉得我郁呀。」我慢慢企返起身，捽下個屁股：「妳咁亂來架，好似係我咋。若果係陳老師，實給妳們撞親。」

她們一路拍走我衫褲上面的塵，一路介紹自己。長頭髮係五月(伍悅)，短頭髮係陽光(楊光)。五月猛呻陽光起勢追住她，躲躲鬧鬧先會撞到我。她重好凝重咁同我話：「我們係淑女，平時好端莊。」都未講完，她同陽光就猛笑。我望住她們係度笑，我望左眼陽光，我忽然間覺得自己塊面又紅又熱。

我眼尾望到陽光企係五月後面，輕輕拉住她裙尾。五月見到我面紅，笑我：「你咁唔紳士架，我們講左名俾你聽，你都唔介紹番自己。」我話：「聽日呀。」五月拉長把聲：「你今日唔係忙成咁呀？介紹自己，都要等到聽日。我們要唔要掛號添呀。你唔想同我們做朋友，咁你過主拉。」我覺得自己塊面越來越紅：「聽日，聽日，真珠無咁真，聽日。」五月大叫：「你走呀，我們唔歡迎你。」我望到陽光拉左下五月衫尾：「五月，你冷靜啲。成個鴉烏婆咁，嚇親人拉。」

五月瞪住我，她笑陽光：「好拉。咁快就已經嚇『親人』。」陽光成面紅晒：「我講『嚇親』人。」五月大笑：「唔好客氣，『親人』你要就得拉，唔使預我。」陽光一邊拉住五月，一邊唧她：「係你『親人』，總之就係你『親人』。」五月舉起雙手，笑到停唔到口：「好拉，好拉。我投降拉。」陽光紅住面：「你正正經經咁講番先。」五月清左清喉嚨：「嚇『親人』。」，她一邊笑一邊走番入舖頭，陽光就舉高拳頭係後面追。

我企係門口，望住她們係入面走左幾個圈。五月叫停陽光，二個人拖住手走埋我度：「你叫乜名？若果你亂講，我們以後都唔同你做朋友。」我口窒窒：「我係聽日，我真係叫聽日。我姓明，全名明天。不過所有朋友都叫我聽日。」五月笑住話：「咁好拉，我以後叫你明天；我倆唔係朋友。陽光就要叫你聽日，你重係她『親人』添。」

我遞起隻手想同五月握手：「我係明天，不過你一定要叫我聽日。」五月輕輕敲我隻手：「明天，好高興認識你。」我一臉尷尬向陽光伸手：「我係明天，不過你一定要叫我聽日。」陽光小手同我一握：「我叫楊光。」陽光同我握手，唔知點解，我好唔習慣，周身唔聚財。她望到我成面關公紅，她好關心咁問：「聽日，你無野丫嘛？你成面紅晒，係咪唔舒服呀。」

五月用手掠我額頭：「好熱喎，你肯定發燒。」她大叫：「老禾，攞退燒藥出來呀。」有個好高大的哥哥行左出來，五月指一指：「明天。我大佬，伍禾。未來的大醫生。有他喺度，你實無事。」「老禾，明天額頭好熱呀，他實係發燒。」大佬禾望下我，掠下我額頭，又搞下我眼肚，重叫我伸條脷出來。他笑笑口：「明天，唔使擔心。你乜事都無，應該係天氣熱。入來飲杯水，靜一靜，休息陣就得拉。」

我話：「我叫聽日，個個朋友都叫我聽日。唔好叫明天。」大佬禾笑住應我：「好拉，聽日，入來休息陣先。」我望左眼陽光，她垂低頭望住地。五月走過來，她分開我和陽光拖住既手：「快脆入去抖下，我真係唔要你係禾醫生第一個病人。」她拖住陽光入舖頭，離我遠一遠。

我坐埋一邊，大佬禾不停係度放書上架，五月拿住毛巾四圍抹，陽光紅住面淨係望地下。我行埋陽光身邊問：「有乜野我可以幫手？」陽光：「我好忙，你無野幫到手。」我話：「就係忙，先要我幫手。」陽光口窒窒：「唔使，你幫唔到手。我，我，我係度數緊地下行既螞蟻。」大佬禾大叫：「哎，撞到我個頭，好痛。」另一邊轟一聲，我聽到五月叫：「哎唷，老禾。」我望到大佬禾腳邊散開幾本書，應該由書架跌落他頭度。我又望下五月，她身邊嗰展架空晒，跌到成地書。

我行去大佬禾身邊要幫他，他個樣好恐怖，似好痛但又猛笑：「我得架，唔好擔心，你招咪自己得拉。」我走埋五月度，雙手擺來擺去扮抹塵，周不時望二眼陽光。五月一邊推我走，一邊鬧：「明天，得拉。你去幫陽光，她數學差，計數即喺拿她命。」