( ح يكون في تابع للحلقة اول ما نكلمه ينزل بعون الله ❤️🌹)
سيمر المر وينجبر الكسر
وتلتأم الجراح ويتيسر العسر
وتخضر الاشجار ويتفتح الزهر
وتنجلي الغيوم وتتبدد السحب
جميلتي دخلتي دون استئدان
وضعتي قلبي بين المطرقة والسندان
اهتز كياني تبعثرت افكاري للتغيير ان الاوان
سكنت الروح سلبتي العقل يا زهرة الاقحوان
كوني لي اكون شاكرا لك
وسحقا للكبرياء والعنفوان
#عادل
بقلم العزيزة ... حجر العقيق ❤️🌹
و كانت المرة الاولى ليها في السفر ...
و الاولى ليه في السفر مع رفيق زيها و مش اي رفيقة شريكة حياته اللي قاعدة تتسلل بهدوء في خلايا جسمه في محاولة للوصول لقلبه ....
و توقع عادل انها ح تخاف من الطيارة
ح تتمسك بيه ...
بس اللي صار العكس
رحلتها معاه نستها الصدمة اللي تلقتها بخبر تأجيل الانجاب حاليا
كانت زي الطفلة اللي تستكشف مكان لاول مرة
اشبه بالفراشة
تطير هنا و هناك
كل مرة توجه سبابتها لشيء : عادل شوف سبحان الله منظر البحر كيف من فوق
قبل ما يرد
: عادل شوف السحاب الله هذا شني اللي يبان زي الورقة زعمه نوع من الطيور
عادل حاول يرد
بس : يا ربي شوف شوف كيف زي الخريطة زمان وقت نقروا فيها في الجغرافيا و انا نقول علاش هكي يحطوا في صورها الارض تاريته حق
جت بتقول حاجة ثانية
شد ايدها : فرحان لفرحتك هذه
هي استاقضت لانها تكلمت هلبة شافت للي حاواليها في اللي كانوا يشوفولها و في اللي مش معاها بكل : قصدك صوتي عالي و دوشتي هلبة ما سكتش والا
عادل رجع بظهره ع الكرسي و غمض عيونه و مازال شاد ايدها : ما تدوري شي المهم انت فرحانة طز
تنهدت و دارت زيه : قصدك بترقد
عادل بنفس الوضعية : استرخاء بس رحلة قصيرة هلبة ما فيها نوم
استمر الصمت بينهم لحظات
لعند: صدقيني ايدك اللي شاد فيها توا مستحيل يجي يوم وًنطلقها حطي ثقتك في ربي و بعدها فيا و انا عادل اللي وقت يطلع كلمة من فمه يلتزم بيها
هي قلبها قريب طار من فرحته : ماهو قلتلك حبيتك غصبا عني
عادل هالمرة فتح عيونه : ح يجي اليوم اللي نحبك فيه بس مش غصبا عني لاني نبي نحب وحدة زيك فيها كل الصفات اللي نتمناها و الاهم انها حبتني غصبا عنها
سرحوا في بعض شوية
بس قاطعهم صوت المضيفة اللي اعطتهم وجبة الافطار
ساعدها تفطر لان جلوسها و حركتها مازال عندها فيهم نوع من الصعوبة .......
