يوسف قدم منها و ايديه الاثنين وراه في محاولة لضبط اعصابه
هي كانت حاسة عليه ان معصب هلبة لهذا تراجعت
ضرب ع صدره: بهكي نفهم و بوضوح ان في غيري في قلبك يا خنساء..كل شي عندك علم توقعته درت حسابه الاالحاجة هذه ان غيري ياخذ قلبك ..حتى وقت قررتي تحرقي قلبي و حرقتيه كنت عارف ان ممكن ياخذك صح بس قلبك عندي و ملكي ..(سكت شوية)
حبيتيه يا خنساء؟
خنساء كلامه ذكرها بايوب و رجعت لذات الاحساس الخاص بالشعور بالذنب :يوسف شخص مات الله يرحمه رجاء ما تدخله بيني و بينك و قولي من الاخير انت شني تبي ؟
يوسف لا اراديا حس بغيرة كبيرة ناحية ايوب مع ان خلاص ميت بس الواضح ان مازال حي عندها: نبي نكملوا من وين ما وقفنا لو انت فعلا مقتنعة ان اللي سالت؛ عنه مش موجود بيناتنا
خنساء تفاجئت بطلبه اللي كان صريح و مباشر: انا حاليا مش مستعدة نرتبط باي حد
يوسف مش مصدق برودها : يعني انا صرت اي حد شخص عابر ممكن ترفضيه بسهولة و ع شان مني شخص عرفتيه في ايام
استفزتها المقارنة: انت تشوف الموضوع بمقياس الزمن و انا نشوفه فيه بمقياس الاثر اللي خلاه في نفسي يا يوسف الشخص هدا وقف جنبي وقت انت لاهي مع غيري ايا كان السبب انقذني من كوارث حقيقية و كبيرة وانت وقتها وين مع مرتك خذيتها بالمكر فيا و سافرت ترجيتك و ما عمري درتها قلتلك ما تسافرش ما اعطيتني اي اهمية بسببك انت غلطت اكبر غلطة في حياتي و وافقت ع واحد تافه زي صفوان و تعرضلي اول ما سيبته بس من وقفه عند حده من خلاه يعتذرلي قدام كل الناس هو اللي ع قولك حد معرفتي بيه ايام...ايام كان واقف زي الصقر حماني من حاجات انا نفسي ما كان عندي بيهم علم...
انت وقتها وين؟ في مصر مع مرتك ممكن تدهوروا او غيره
اليوم نجحت انها تحرق قلبه: يلعن حتى فيتها مرة وحدة الكلبة اللي تتكلمي عليها هذه مشيت معاها مضطر انفذ اتفاقي مع بوها لان لو ما درت هكي لا كنت قدرت نطلقها و لا نربيها ع اللي داراته فيا و فيك لا تدهورت معاها و لا عندي ليها خلوق من الاصل و انت عارفة الشيء هذا كويس بس هكي سبحان الله تبي تباني ضحية وانا الظالم و يا ستي حاضر انا ظالم و ظلمتك معاي و فعلا كل اللي صار معاك بسببي انا من لما خشيت لحياتك و دخلت معاي مشاكل و هموم من اللي ما تتسمى بينما هو كان المنقد فطبيعي جدا يطلعني من قلبك و يقعد فيه بروحه تي انت في يوم في وجهي قلتيهالي ان هو ارجل مني .... و مشيتها ... تعرفي كيف يلعن حتى شكلي مرة وحدة اللي مسيب قرائتي و جايك ... يلعن شكلي لاني حتى البعثة قلت ما نبيها طالما انت انحرمتي منها و يلعن شكلي لو ما حرقت قلبك حق المرة هادي ... لاني ح نحب غيرك يا خنساء مش بس منتزوج لا ح ندور ع البنت اللي تستاهلني و نحبها و نعيش معاها قدام عيونك ح تشوفيني عريس فرحان مش زعلان و متنكد و ح تتلاقي معاي و معاها و نقوللها نشكرك لانك خشيتي حياتي و انقذتيني من اكبر غلطة غلطتها في حق نفسي
