(سامحوني و الله نتأخر بظروف خارجة عن ارادتي )
و مع بداية رحلة علاج حسين
اللي كانت صح مش اصعب من علاج رويدة
بس صعبة و هلبة
صعب راهو صراخ الراجل ع طول حسه
صعب وقت تشوفه ضعيف
و وقت تشوفه زي المجنون
و تارة زي السكران مش داري بالدنيا
صعب تشوفه ينفر من احب شي ع قلب المؤمن و خاصة في شهر رمضان
صوت الاذان او صوت القران
شيء فعلا يمزق القلب
يعني الا تعقلون هذا ؟
الا تشعرون بحجم الدمار النفسي و الاذى العميق ع نفوس الناس و مدى اذيتهم !!
و الله و الله ان لمثل هؤلاء الحق في القصاص باشد انواعه لان لا نظير لما يعانوه هو شي اشبه بالموت الاف المرات في اليوم الواحد
و الموت وانت ع قيد الحياة قاسي جدا
و العيش كالحيوانات اكرمكم الله بدون صلاة بدون ايمان بدون محاكاة و تعايش مع المحيطين بك موت
حسبنا الله و نعم الوكيل في كل ساحر و في كل من يذهب اليه !!
خنساء في اليوم اللي روحت فيه من حوش اخ هلالية انتظرت لعند روحوا برويدة و كانت منهكة و دايخة
خذت ابناء اختها و روحت معاهم للحوش
اول ما وصلوا
ابوبكر : قال الشيخ الليلة ممكن ترقد للصبح تعبت هلبة لانها
جميلة بحزن : يا ناري يا خنساء رجعت شيء يرعش
خنساء تنهدت : لا حول ولا قوة الا بالله ... باذن الله خير و كل يوم للاحسن ... منقولك يا ابوبكر حسين...
وجهه تغير و عصب : خنساء انت ع العين و الراس لكن البنادم هذا سيرته معش نبي نسمعها و فوقها ماشي لطرابلس منتقل غادي مش هذا السبب اللي خلاه يفسخ من بنت خاله
خنساء : غير اصبر بس يا ولد عمي و اعطيني معاك كلمة
هو حاول يهدا : نسمع فيك
خنساء : حسين في وضع زي رويدة راهو و لو سمعته اليوم كيف يعيط كنت قلت رويدة ما شافت شي !! واعر هلبة وقت الراجل يبدا يعيط و يستنجد قال طارق وقت شافه بدي يقوله روح انت ما نبيكش و مرض عليهم ما يبي منهم حد زي ما رويدة ما تبي من اهلك و حتى انت توا بس بدت اتقبل فيك
ابوبكر مصدوم : يعني مسحور حتى هو !!
خنساء باحباط : للاسف
ابوبكر عصب : معناها حوش خاله والا ؟
خنساء : اي اكيد هما ... بس خلاص حليناه الموضوع
ابوبكر بدي يريش في شعره : و كيف انحل الموضوع ان شاء الله
خنساء تبيه يهدا : هو ما في عليهم شي يا ابوبكر يعني ما عندك كيف تثبت عليهم السحرو لولا ان اجبرناهم يخبروا باللي صار ما كنا عرفنا شي و المثل يقول خنقة الكلب حاشا السامعين خير من قتلته احني خوفناهم يا يردوا كل شي خذوه منها و داروا بيه البلي هذا يا اما نديروا فيهم شي ما يتوقعوه و اللي شفناه انهم خافوا وقرروا يوخروا خلينا نشوفًوا علاجهم مشي او لا و هما قاعدين ما عندهم وين يمشوا و صلاح ولدهم ما عنده علم بشي واضح من ضربه لخواته و صوت عياطهم اللي وصلنا لبرا بعد طلعنا ... انا مش نبيك تسامحهم اقسم بالله كبدي دم عليهم اكثر منك لكن لو ضريت ولدهم او اي حد و بدون دليل تخاف تنحبس انت و يستمر الشي اللي دايرينه هذا غير رويدة اللي بدت تتحسن تبيها تنتكس من جديد !!
