بسم الله الرحمن الرحيم
في الديرة
مبسوطين وصارت الزفة وزفوا العروسه وصار وقت العشاء الكل تقدمو للعشاء وسما والبنات مجتمعين
بمكان واحد ويضحكون وحرفيا سما نست موضوع ان اختها مغصوبه وانبسطو حتى العروسه انبسطت وكثير
البنات كانو ياكلون الا سما الي بس تتكلم وتضحك وتطقطق على الكل
مرام وهي تاكل بهدوء: وراك ماتاكلين
سما تناظر الأكل: والله شبعانه
سمر تقدم لها اكل: كلي كلي بلا هبال انتي اخت العروس لازم تشبعين
سما ضحكت عليها وهي مره انبسطت وحبت البنات
شافت رغد وقالت: رغد وين اختك نوف
رغد تاكل: نـوف؟ ليش ماهي عند المعازيم
سما عقدت حواجبها: لا ليه ماجت معاك
رغد هزت كتوفها: انا جيت قبل امي ونوف يمكن انها مع امي
سما هزت راسها بأيه ورجعت تطقطق على الحريم وسمر ومرام ميتات ضحك عليها ويشاركوها
جدة نواف كانت بين الحريم ويتعشون شافت موضي جالسه بأخر السفره وهي تتكلم مع مجموعة حريم لفت نظرها لسفرة البنات ماكانت نوف بينهم عقدت حواجبها وقالت بصوت مرتفع: موضي
موضي رفعت راسها في اخر السفره: هلا
الجده:وينها بنت رجلك نوف
موضي تلخبطت وقالت بتسليك: ياقلبي عليها كانت مبسوطه تجي الزواج بعدين تعبت وماقدرت تجي
الجده وهي مو مصدقه: الله يشفيها كان بودي اشوفها
موضي ابتسمت بتسليك: الجايات كثار
الجده: وانتي الصادقه
الجده الهنوف (بيت النقاشي) تكلم ام نواف: منهي ذي
الجده تهمس لها وتكلمها بقصة نوف
الهنوف حزنت عليها..
وكملو عشاهم
زفو العروسه لبيت زوجها ورجعت سما وهي تبكي ومرام تضمها وتهديها: تراها ببيت زوجها شفيك بعدين من طول المسافه هذا هي عندكم بنفس الحاره خلاص حبيبتي
سمر تجلس عندهم وتمسح على ضهر سما: حبيبي انتي خلاص تكفين قطعتي قلوبنا
سما تبكي وهي الحين صارت وحيده خواتها الثنتين تزوجو من بتسهر معاه من بتضحك معاه من بتتكلم وتشكي لمين شهقت ببكاء ومرام وسمر صارو يبكو معاها دخلت غصون وشهقت: الله واكبر شفيكم حبيبتي سما وش فيك تراها تزوجت بسم الله عليها ماماتت
وقعدو يهدونها لين سكتت وهدت
في خيمة الرجال بعد ماراح العريس لعروسته
وقف الجد عبد المحسن وقال: اكرمكم الله ودامت افراحكم واحنا نستأذنكم بنرجع ديارنا وكثر الله خيركم ودامها الله افراح في بيوتكم
وقف ابو سعود ورما شماغه عند رجول الجد: حلفت بلله ان ليلتكم الليله هنا ماتمدو خطوه برا الديره انتو بدياركم والحين ماهوب وقت سفر
الجد نزل واخذ شماغه ورفعه على راسه: الله يعزك ويكثر خيرك مير والله ان عندنا اشغال ونبي نتسهل
ابو سعود بأعتراض: علي الطلاق ماتطلعون الليله ان تباتون هنيا وببيتي
الجد غمض عيونه ثم قال: ماكان له داعي تحلف
ابو سعود: طلبتك يابو حمد ان تباتون الليله هنيا
الجد جلس: كثر خيركم ان شاء الله ليتك ماحلفت وش عاد بنقول الحين
ابو سعود ابتسم: والله انكم منورين الديره
وقف ضاري : اجل انا اترخص ياجد دامكم مابترجعون معاي شغل
ابو سعود وهو يحلف: والله ان تقعد افا ياضاري والله اني عديتك ولدي علي بالحرام ان تقعد
وبعد مد وجزر بينهم جلس ضاري مرغم وهو قلقان على شغله
وبلغو الحريم انهم بيباتون وسما انبسطت ان احد بيقعد معاها على الأقل الليله ماتكره شي مثل ليلة زواج خواتها تبقى تبكي طوال الليل
YOU ARE READING
مابعد الصبر إلا الجميل
General Fictionرواية سعودية ابطالها. بدو وحضر. في المدينة وفي الديرة. وابطال مشاركين في برامج واقعيه تحمل هذه المناطق قصص حب نظيفة وطاهرة لقلوب لاتحمل الحقد تعاني لتصل الى هذا الحب ولكن مابعد الصبر الا الجميل للكاتبة /الرنيد
