تحضى نار قلبي

حلقة الثاني والثلاثون.

لان ما ينطون البنت خارج  بيت عمها  ولله كان وياهم هل حبب كل واحد بمحبوبتة   وهاشميات تأيد الحب لان بين ولد ولدها وبناتها.

سرور: لعد وميادة ليش ما أيدت حبهم و وكفت وياهم؟

تنهد وأردف
_لان الغلط من زوجة عمي وعمتي.

سرور: شلون؟

ياسين:  ميادة و مؤيد نفس العمر من كانو أطفال  أم مؤيد رضعت ميادة لان أم  أبوها متوفية.

وعلى حسب كلامهن يصير أخوها وحرام  وهل لطلطيات
ومن هذاك يوم وهذا يوم و٣٥سنة صارت أعمارهم وثنينهم  حلفو ما يتزوجون اذا مو بعض.

وبعد استفسارات اتضح لازم ١٥رضعة بدون قاطع بينهم  وشرط الاثنين يعني مبادل   أم هذة ترضع هذة والعكس.

وانفكت چبستهم وصار الهم شهر من أنخطبو  وأحتمال هل شهرين العرس بس مؤيد ما يريد هسة لان عندة سفر لـ بريطانيا أعتقد يبقى تسع أشهر  يلا يگدر يرجع  لهنا و ميادة  تأيد  لان بالنهاية نجاح مؤيد يعود لميادة والعكس.

وهذا أضبط زواج  لان الأثنين أعمارهم ٣٥ وعلى زواجهم يدخلون الستة وثلاثون.

زواجهم مثالي ولو  أخيل عمرة٣١ و رحيق ٢٤سنة وهل ثنائي ينكطون عسل متفاهمين.

بالاخير الأعمار أبد مو مقياس.
وميادة أحترمها لان حافضت على نقاء حبهم.
رغم لطلطية مؤيد

دفن رأسة برگبتي وأردف
_وعلية، باچر ما أگدر أخذچ لبغداد وبنفس الوقت ما أريد أبقيچ هنا لان الأكل ثقيل على معدتچ و هاشميات عدها ألف إختبار الچ ومو بعية باچر تدز عليچ تعالي خبزي على تنور الطين وتنسمطين.

سرور:معقولة؟

رد بتثاوب
_وداعة نضر عيوني، وأزيدچ من الشعر بيت  هنا العباس چابسهم  ما ياكلون الخبز البايت كل وقت بوقتة لازم خبز  يعني حالة حال الريوك والغدا والعشا.

أبتسمت وحچيت
_الصمون شمقصر وياهم؟

سحب نفس وأردف
_ ليش أكو ألذ من شفايفچ وخبز تنور الطين؟

ضحكت بهدوء وحچيت
_ مااحب الخبز  بس الصمون كلش طيب بالاخص اذا بي سمسم وطاسة عنبة.

بدون وعي مني تلمست گصتي  وما أحس غير ياسين يضربني على أيدي بخفة ويگول
_عمت عينك  يا ياسين  طمغتي طاسة العنبة وصمون أبو السمسم بگصة الطفل؟

بربچ مو خطية ما لگيتي غير هل مكان ما تگولين اذا بنية وعدها طمغة شتگول امي تنست بية عنبة؟

خاب أكو أماكن ماينشافن متغطيات  طمغيلچ هناك مو بالوجة.

اتملصت منة وحچيت
_وانتَ مصدك بهل خزعبلات؟؟

هز راسة وگال
_سوالف العجايز كلهن عندي ومأمن بيهن لا تحاولين وياي.

رفعت حواجبي وحچيت
_متخلف وداعتك  مشرحچي ومتخلف  الف حمد الله والشكر.