Promises Beneath The Blue Clouds (Rich Girls Series #4)

CHAPTER 10

"Oh, Yvette!" Napahinto ako sa paglalakad at kaagad na inihanda ang malapad na ngiti nang marinig kong tawagin ang pangalan ko. "Mabuti at nakahabol ka! Kanina ka pa namin hinihintay!" Tumayo na si Missy sa kan'yang kinauupuan at lumapit na sa akin.

"Missy, sorry kung nalate ako sa birthday ng anak mo." Hinawakan ko ang kamay ni Missy at pinisil-pisil ito ng marahan.

"Ano ka ba, okay lang, 'no." Nakakunot ang kan'yang noo at medyo hinampas ang balikat ko at maya-maya lamang ay humagikgik na. "Tara na, doon tayo oh," Tinuro nito ang isang mesa na pahaba kung saan nakapuwesto ang ilang mga katrabaho namin.

Tumango naman ako at bumuntong hininga, pagkatapos nito ay nagpatinaod na ako sa hila ni Missy.

Sa totoo lang wala talaga akong balak na pumunta dito sa bahay nina Missy dahil alam kong imbitado din si Benjamin sa kaarawan ng anak n'ya, pero dahil nakokonsensya ako, at dahil na din inaanak ko ang anak ni Missy, I swallowed my pride and shyness.

"Captain, sinong sumundo sa'yo?" Kaagad akong tinanong ni Mara nang makaupo na ako sa silyang bakante. Alam kong may taong nakaupo dito kanina dahil ang init ng puwetan ng bangko.

"Ah, wala. Alam ko naman ang bahay nina Missy kasi nakapunta na ako dito noon," Ngumiti ako at medyo inilibot ang ulo sa kabuuan ng bahay nina Missy.

Wala ng masyadong tao sa loob ng bahay nina Missy dahil sa tingin ko ay nagsi-uwian na ang mga ito, mukhang tapos na kasi ang selebrasyon. Iilan na lang ang natira at 'yon ay ang mga taong nagliligpit ng mga pinagkainan ng mga bisita.

Nakakahiya naman.

"Oh, Yvette," Boses mula sa likuran ko at paglingon ko ay Missy ito at may dalang isang plato na puno ng pagkain. "Pasensya na, ah. Ito na lang ang natira," Ngumiti ito ng maliit at inilapag na sa mesa ang plato na dala n'ya. "Teka lang bibili lang ako ng softdrink mo sa labas. Ubos na kasi. Inubos ng mga uhugin naming bisita." Sabi n'ya gamit ang seryoso at medyo galit n'yang boses at maya-maya lamang ay umalis na ito sa likuran ko at lumabas na ng bahay nila. Naiwan naman akong nakanganga at hindi makapaniwala sa sinabi n'ya.

Napalingon naman ako sa harapan ko nang marinig ang pigil na tawa ng mga kasamahan ko sa mesa.

"Hindi ka pa nasanay sa bibig ni Missy. Alam mo namang walang kontrol ang bibig no'n."

"Uhugin."

"Grabe naman 'tong si Missy, parang hindi n'ya kapitbahay 'yong mga bisita n'ya kanina."

Kan'ya-kan'ya ang reaksyon ng mga kasamahan ko. May ibang napapailing, may ibang nauubo na sa tawa, may ibang nakangisi, habang ang iba naman ay nakatungo lamang ang ulo at halatang pinipigilan ang sarili na tumawa.

"Kanina kasi Yvette, puno ng softdrink 'yong tatlo nilang malaki na ice box, tapos no'ng nagkainan na, ayon kan'ya-kan'ya nang kuha ang mga bata na tinawag n'yang 'uhugin' kanina. Nagmalay na lang kami ubos na pala. Kaya ayon galit na galit si Missy." Pagpapaliwanag ni Arthur sa akin nang makita ang nagtataka kong mukha.

Kaagad naman akong tumango at medyo tumawa dahil sa narinig.

Kaya pala galit na galit si Missy.

"Ay, kumain na ba kayo?" Tanong ko kahit na alam kong tapos na sila dito dahil mga baso na may lamang alak na ang laman ng aming mesa. May malaking bowl din sa gitna ng mesa at ang laman ay chitcharon na ginagawa nilang pulutan.

"Oo kanina pa kami tapos. Shot?" Si Mara sabay taas ng baso n'yang may laman na alak.

Ngumiti naman ako at umiling. Umiinom naman ako pero hindi alak, kundi wine.

Sisimulan ko na sanang lantakan ang pagkain ko nang may maramdaman akong humahawak sa likod ng bangko ko at paglingon ko kung sino ito parang umurong ang gutom na nararamdaman ko.