نعيمي وجحيمها

اقتباس

- قولنا بقى ياجميل لو تعرف، مين فينا اللي هاتتجوز الأول، انا ولا دي ولادي؟
سألته غادة وهي تشير نحوها ونحو زهرة وكاميليا أيضًا، كور هو شفتيه المنغلقة بشكلٍ فكاهي، يهز راسهِ بمرواغة و ينظر اليهم بتفحص اثار ضحكات الثلاثة.. فقال أخيرًا باقتضاب:
- هاتتجوزوا انتوا التلاتة.
شهقت غادة مستنكرة باعتراض:
- بس كدة هو دا اللي ربنا قدرك عليه، طب حتى اعمل بسندوتش الكبدة وعلبة العصير اللي في إيدك وقول حاجة مفيدة تريح قلبنا، مش انت راجل مبروك برضوا؟
لكزتها زهرة لتنبهها بعدم إحراجه ولكنها لم تبالي فوجدته فجأة يجيب والطعام في فمه:
- واحدة فيكم هاتتجوز غفير والتانية هاتتجوز وزير والتالتة هاتتجوز أمير.
انطلقت ضحكات الثلاثة فخاطبته كاميليا بسخرية
- غفير ووزير وأمير، ايه الجو القديم ده، هو احنا في الف ليلة وليلة ياعم؟
اومأ لها بتأكيد :
- انا مابقولش قديم انا بتكلم صح.
رفعت غادة كفيها امامه قائلة بمرح:
- حلو ياعم، يبقى انا اللي هاتجوز الأمير.
هز رأسه بنفي وهو يشير بسبابته :
- لا انتِ هاتتجوزي الغفير، دي هاتتجوز الأمير.
شهقت ساخرة وهي ترى وجهة سبابته نحو زهرة:
- يخيبك، طب كنت قول كاميليا يمكن كنت اصدق، انما زهرة....!
قطعت جملتها وهي تشير الى الفتيات كي يذهبوا:
- امشي يابنتِ امشي، دا باينه راجل خرفان واحنا هبل اللي نصدقه.
تبسمت زهرة كي تخفي حرجها من تلميح غادة الجارح لها:
- قلبك ابيض ياغادة، هو كان جد يعني!
ردت كاميليا بفكاهة وهي تتحرك معهم:
- بس انا بصراحة بسطتني لما قال وزير، اهو قدرني وخلاص ياجدعان.
غمغمت غادة بكلام حانق وهي تسير مع الفتيات عائدات لمنزلهم، فنظر الرجل لأثرهم بعد ان ابتعدن وهو يهتف:
- برضوا هي اللي هاتتجوز الأمير وانتِ هاتتجوزي الغفير.

حد فاهم فيكم حاجة؟
انا بس بديكم لمحة عن الرواية شغالاني بقالي شهور وخلاص قرب ان شاء الله اشتغل فيها بعد ما اخلص عينيكي وطني وعنواني.

انتظروها بإذن الله بعد رمضان مباشرةً
كل سنة وانتوا بألف خير