الجزء الاخير❤شكرا على تفاعلكم السكر❤بقلم سولييه نصار❤
-بس بجد صعبان عليا يا حماتي ...ده هيتبهدل مع العيال
-ميصعبش عليكي غالي يا حبيبتي ....ده خاين والخاين لازم يتربي!
- انتي امه ولا امه
قولتلها وانا بضحك ...بصتلي بصمت وقالت:
-انا امه صح بس بكره الخيانة اووي ...انا ست زيك وبحس بيكي ..حاسة قد ايه انتي مقهورة معاه ولولا انه ابني وباكية علي مصلحته كنت وكلت محامي شاطر وخلعتك منه ده ميستاهلش ضفرك حتي
عيوني دمعت وانا بشوف معاملتها معايا...كأنها بنتي مش حماتي ...وده مش جديد عليها ...حماتي دايما وقفت معايا ودعمتني في الوقت اللي ابنها كان بيجرحني...واهو دلوقتي هي واقفة جمبي وهي اللي خططت ابعد عنه فترة عشان يتربي
طبطبت علي وقالت:
-الرجالة اللي زي ابني وابوه عايزين قرصة ودن صعبة عشان يقولوا توبنا ....حسن جوزي كان مجنني والله بسبب النسوان بس عمري ما مسكت عليه دليل لحد ما قدرت في يوم اقفشه وساعتها فضحته عند أهله وسيبت البيت لمدة ست شهور وهو حفي ورايا واهو دلوقتي بقالنا اكتر من تلاتين سنة مع بعض ومفكرش يخوني تاني ...فهمتي بالطريقة دي ابني هيعرف قيمتك وهيفكر مليون مرة قبل ما يخونك...اسمعي مني وانتي هتكسبي ...لو الراجل خانك متبكيش ...استخدمي اسلحتك ...جننيه عرفيه انك قادرة تعيشي من غيره وان هو اللي مش قادر يعيش من غيرك....اختفي مرة واحدة وخليه يلف حوالين نفسه ...روضيه كويس وهو هيفكر ازاي دايما يسعدك
صقفت وانا منبهرة وقولت :
-الواحد لازم ياخد عندك دروس تقوية يا حماتي
-any time y baby any time
قالتها وهي فخورة فابتسمت وانا بفكر انه يستاهل يتربي شوية
.......
- لااااا ابعد عن اللابتوب يا محمد .
صرخ وائل فجري محمد وهو ماسك اللابتوب وجري وائل وراه وهو بيلطم فجأة اتكعبل محمد ووقع اللابتوب اتكسر
- يا ختاااااي اللابتوب حرام عليك
وقعد جمب اللابتوب وهو مصدوم اللابتوب كان غالي وعليه شغل كتير ...
جه معاذ جمبه وقال :
-بابا آكل
-نعم يا اخويا
....
جات مامت وائل من برة لقت وائل في وشها بيقول :
-ابوس ايدك يا ماما الحقيني العيال مجننين امي ...صدقيني هروح المصحة بسببهم ...الواد كسر اللابتوب بتاعي وواحد بوظ بنطالوني الغالي ومعاذ عايز ياكل ...ساعديني .
مسكته امه من دراعه وقالت:
-مع نفسك...
بعدين فتحت الباب وخرجته بره وقالت :
مع نفسك يا حبيبي
-ايه
-غدا ألقاك
وبعدين قفلت في وشه الباب وابتسمت بخبث وقالت :
ده جزاء الخاين يا حبيب امك
......
مرت الايام ووائل طافح المرار مع عياله ...اخد اجازة من الشغل واشتغل يطبخ ويرتب لوحده ...كان حاسس بصداع طول اليوم بسبب دوشة العيال وساعتها بس قدر هانم ...دايما كان بيقول انها مرتاحة في البيت ومبتعملش حاجة بس طلع العكس هو اللي مرتاح في شغله وهي بتربي اولادهم ....بيعرف ستات عليها واستحملت...ازاي اذاها كده ازاي حد عاقل يأذي ست موفرة ليه سبل الراحة في بيته ومهتمية بعيالهم بالشكل المثالي ده ولاول مرة يشوف انها خسارة فيه ...هي احسن منه...بس دلوقتي يتمني بس ترجع وهو مش هيبص علي غيرها اصلا ...
بص علي نفسه في المرايا لقي تحت عينيه سواد ...وشه منهك وحزين ...حزين بسبب غيابها ...البيت ملوش طعم فعلا من غيرها ....فجاة وسعت عينيه لما شاف انعكاسي علي المرايا ....
-ايه حسيت بقيمتي
بصلي وحضني جامد ...عيونه كانت مدمعة وقال:
-متيبنيش تاني
بعد وهو بيضحك وباس راسي وهو مش مصدق فجأة كشر وهو بيزعق:
-كنتي فين يا هانم
-متزعقلهاش يا واد
جات حماتي من ورايا وقالت:
-انا خبيتها بعيد عنك يكش تتعدل وتحس بقيمتها
-انتي يا ماما تعملي في ابنك كده
-لما يكون ابني مش متربي اعمل فيه اللي أسوأ من كده يا حيلتها ...ولو مس عاجبك ترجع مكان ما كانت وطلقها
- ايه يا ست الكل بس ..خليكي محضر خير
-طيب يالا بوس راس مراتك واوعدها انك مش هتعمل كده تاني
باس راسي وقال:
-عمري ما هزعلك ابدا ...بحبك يا ام العيال❤
-وانا كمان يا ابو العيال❤
.....
بعد يومين جات رسالة مجهولة لوائل...كانت من واحدة بتطلب منه انه تتعرف عليه ...
فكر للحظات بعدين بعت رسالة ليها :
-اسف انا متجوز وبحب مراتي
بعدين بهدوء حذف أكونت الفيس نهائي عشان ميضعفش
ابتسمت انا بحب وانا بطلع من صفحتي الوهمية وامسحها كمان ومسحت الفيس حلوة الحياة من غير سوشال ميديا صح ؟!
تمت
#زوجي_الخائن
#سولييه_نصار
الاسكريبت اللي جاي هيبقي بإسم تسنيم بإذن الله ❤طبعا بعتذر علي التأخير ده بس صباعي اتعور جامد شوية وكتبت البارت ده بالعافية❤❤
