الجزء الاخير شكرا لتفاعلكم السكر❤
-انتي كدابة.
-لا والله يا زياد أنا حامل ومستعدة نروح للدكتور دلوقتي ونتأكد.
بصلي زياد بصدمة وقال:
-عرفتي ده أمتي!!!
دخلت البيت وجيبت اختبار الحمل وورتهولوا.... شوفت بطرف عيني ريم وهي هتموت من الغيظ... قربت من زياد وقولت :
-هتسيبني وأنا حامل.
-ايه الهزار ده يا زياد... أنت هتسكت ارميها برة البيت... أنت أيش ضمنك أن الولد ده منك
-اخرسي يا ريم بطلي هبل ومتنسيش أنها لسه مراتي.
اتعصبت ريم واخدت أمها ومشيت...
قعد زياد علي الكنبة وهو منهار... قربت منه وقولت :
-والله يا زياد أنا بحبك اديني فرصة أخيرة.
-نيرمين.
مسكت ايديه وقولت :.
-اسمعني بس اديني فرصة شهر.... شهر واحد بس نصلح علاقتنا عشان ابننا ولو الشهر عدي وأنت لسه مش عايزني ومصمم علي قرارك خلاص نتطلق واتجوز براحتك وهنقسم حضانة الطفل بيننا من غير أي مشاكل.
فكر لدقايق وبعدين بصلي وقال:
-موافق بس شهر واحد بس.... في الفترة دي ليا الحق اقابل ريم
-لا طبعا مينفعش (بقلم سولييه نصار )
-مش انتي اللي هتحكمي عليا يا نيرمين... كدا كدا قراري مش هيتغير بس قررت أنفذ طلبك لآخر مرة لأجل العيش والملح
-لا أصيل يا زياد متشكرين
........
تاني يوم
-ابعد عني متكلمنيش ولا عايزة أشوفك تاني
-يا ريم يا حبيبتي اسمعيني
-اسمع ايه... أنت زعقتلي بسببها ورجعتلها!
-أنا مش هرجعلها بس نفذت طلبها عشان لما اطلقها متحرمنيش من ابني يا ريم.... معلش استحملي شهر واحد... معلش يا حبيبتي
-هستحمل وامري لله.
.........
-يعني ايه تستحملي شهر يا ريم.... الولية دي شكلها عقربة هتقدر تأثر عليه...
-مش مهم انتي فاكراني إني هقعد حاطة أيدي علي خدي واستناه... أنا لقيت واحد تاني خلاص واغني منه
-لقيتيه فين ده يا بت.
-اتعرفت عليه من فترة... كنت مخلياه استبن عشان لو زياد خلي بيا
-شاطرة يا بت بطني... شاطرة
.......
بصيت للمرايا وأنا مبتسمة... الفستان كان مضبوط عليا... عينيا بتلمع والعشا الرومانسي جاهز... عملت كل الاكلات اللي بحبها زياد... سمعت صوت الباب بيتفتح جريت ولقيت زياد ابتسمت ليه بس هو مبتسمش... مسكت ايديه وخليته يقعد وبدأنا ناكل... ابتسمت وأنا بقول :
-شكرا أنك اديتنا فرصة تانية.
-متفرحيش اووي أنا بس نفذت آخر طلب ليكي عشان أخلص من زنك.. لكن مغيرتش رأيي خالص.
عينيا دمعت وبدأت أكل بهدوء...
مرت الأيام وأنا بتقرب من زياد بس بيبعدني بس مستسلمتش.... كنت بهتم باكله ولبسه.... سيبته براحته ومخنقتهوش بأسألتي... وده خلاه يعاملني كويس شوية...
.......
قبل ما يخلص الشهر بيوم
-أنا خارج اقابل ريم
قالها وهو طالع.
خبيت دموعي وقولت بصوت واطي
-ماشي
.......
أتجمد زياد مكانه وهو شايف ريم ماسكة ايد شاب وطالعه بيه بيتهم.... الدم غلي في عروقه وطلع وراهم... خبط علي الباب وفتحتله ريم... مسكها من شعرها وقال :
-مين اللي كنتي ماسكة ايديه ده يا هانم.
جات امها والشاب...
-أبعد عن بنتي يا بني آدم أنت.
-انطقوا مين ده!
زقيته ريم وقالت :
-ده حسام خطيبي.
بصلها بصدمة
-طب وأنا
-أنت خلاص يا حبيبي أنا مليت منك ومن مشاكلك روح لمراتك يالا بدل ما اجيب البوليس واسجنك
........
كنت قاعدة علي الانتريه وأنا بمسح دموعي خلاص خسرت وريم نجحت... لازم دلوقتي أروح وألم هدومي.... سمعت صوت الباب ولقيت زياد دخل... كان وشه مصدوم وعينيه مدمعه.... من غير كلام حضني وقال:
-خانتني.... خانتني يا نيرمين
.........
بعد اليوم ده وزياد رجعلي تاني... معاملته اتحسنت معايا وانا كنت مبسوطة....
في يوم صحي من النوم ولقاني محضرة شنطتي... بصلي بحيرة فابتسمت وقولت :
-الشهر خلص وانا همشي خلاص وزي ما وعدتك حضانة البيبي هتكون مشتركة.
مسك أيدي وقال :
-نيرمين لا متمشيش... أنا بحبك
ابتسمت ببرود وقولت :
-بس أنا مش بحبك... اشوف وشك بخير يا زياد متنساش تبعتلي ورقة طلاقي.
ومشيت وسبته وأنا حاسه بالانتصار عشان حسسته بأنه قليل زي ما حسسني قبل كده ورجعلي عشان التانية خانته... وقتها قررت إني مش هكون استبن لأني اغلي من كده... مين عارف يمكن في يوم نرجع بس اللي متأكدة منه أنه هيتعذب كتير عشان يرضيني.
تمت
#لا_أحبك
#سولييه_نصار
استنوني في سكريبت جديد بإسم إيمان
معلش اتأخرت بس تعبت شوية النهاردة❤❤
