سكريبت ❤❤
-لسه بتحبها يا مازن
قالتها وصوتها مكسور.... بصيت عليها بشفقة.... كنت قادر أنكر وافرحها بس مش حابب أكسر وعدي واكدب عليها... أنا وعدت شيماء إني هقولها الحقيقة مهما حصل...
-آه يا شيماء لسه بحبها... منة كانت حب الطفولة والمراهقة... كانت هي حلمي الوحيد وحبي الوحيد.....
عينيها دمعت ووقفت وقالت بصوت مكسور:.
-أنا هحضر الغدا
راحت من قدامي بسرعة مكانتش حابب اجرحها بس دي الحقيقة أنا مبحبش شيماء ولا عمري حبيتها
أنا اتجوزت شيماء من سنة... كان جواز تقليدي أخدتها وسيلة عشان أنسي منة.... منة بنت عمي اللي حبيتها أكتر من حياتي وسابتني عشان تتجوز اللي أغني مني... كنت ساعتها مجروح وكاره حياتي وملقيتش إلا شيماء جارتي اللي بتحبني من زمان وكانت عارفة إني بحب منة ورغم كده قبلت بيا علي أمل إني أنسي منة بس للاسف فشلت وجرحت شيماء معايا....
تليفوني رن وطلعني من افكاري
رديت علي التليفون واتصدمت من الأخبار
جوز منة مات!
قفلت التليفون وطلعت أجري.... كان لازم أكون معاها في الظرف ده
........
بعد ست أشهر
رجعت بيتي متأخر لقيت شيماء مستنياني.... حسيت بالذنب لأني حرفيا مبقتش أجي البيت طول الست أشهر كنت ملازم منة بحاول اخفف عنها... بعد موت جوزها كانت منهارة وقافلة علي نفسها ومن شهر بس اللي طلعت وقبلت تتعامل معانا ... شيماء كانت عارفة بس محاولتش تعترض... رغم انها عارفة حبي لمنة بس محاولتش تمنعني إني اساعدها حتي هي عزتها ودعمتها...
من غير ما تلومني أو تتخانق سألتني بصوت واطي :
-ايه أخبار منة؟
-الحمد لله بقت احسن دلوقتي
قعدت علي الانترية بتعب فقعدت جمبي وقالت:
-تحب احضرلك عشا
-لا أنا اتعشيت مع منة
بصت في الأرض بحزن
مسكت ايدها وقولت :
-متزعليش خلاص منة بقت كويسة وانا هرجع اقعد معاكي بس كنت بقنعها أنها ترجع الشغل عشان تتخطي المرحلة دي
-هي هترجع تشتغل معاك في الشركة تاني
-أيوة.
حسيتها اتوترت وقالت :
-طيب ما تشوفلها شغل في مكان تاني يا مازن اتعصبت منها وقومت وزعقت :
-شيماء أنا مقدر غيرتك من منة بس بطلي سخافة شوية وشوفي هي في ايه وانتي بتفكري في ايه!... انا مش هتخلي عن قريبتي بسبب غيرة وهمية وسبتها ومشيت..
.....
ومرت الأيام ومنة رجعت تشتغل في شركتنا تاني واتقربنا أنا وهي مرة تانية... ورجعت ابقا مبسوط تاني.... حسيت أن دي خيانة لشيماء... هي معملتش معايا حاجة غلط عشان اعمل فيا كده... بس أنا فعلا دلوقتي اتاكدت إني مقدرش أعيش من غير منة وقررت هعمل ايه.
........
-مازن احنا بقالنا ساعة في الكافيه أنت قلتلي عايزني في موضوع
-منة أنا عايز اتجوزك!
-ايه!
-انتي عارفة إني بحبك... صحيح كرهتك في وقت من الاوقات لما فضلتي كرم عليا وحاولت انساكي بس مقدرتش...
-طب ومراتك
-مقدرش اسيبها
-يعني هتجيبلها ضرة
-هتتقبل متقلقيش... شيماء بتحبني وبتحب تشوفني مبسوط
-موافقة بس بشرط !
.......
روحت البيت شرط منة كان غريب... حابة ... دخلت البيت وقابلت شيماء في وشي وقولت:
-شيماء أنا عزمت منة النهاردة علي العشا
-بس يا مازن انا مجهزتش حاجة
-هنجيب أكل من برة متقلقيش.
......
علي الساعة 10 بالضبط كنا أنا ومنة وشيماء علي السفرة. شاورتلي منة عشان اقولها.. أخدت نفس عميق وقولت :
-شيماء حابين أنا ومنة نقولك حاجة.
بصتلنا شيماء بخوف فكملت :
-أنا قررت اتجوز منة يا شيماء!
يتبع
#عاد_نادما
#سولييه_نصار
فوت كتير دلعوني زي ما بدلعكم ❤
