الجزء الاخير من الاسكريبت ❤شكرا لتفاعلكم السكر يا حلوين❤❤
عينيا دمعت وانا بشوف ادهم ماسك البنت دي وبيبصلها بصة أنا طول عمري احلم بيها... بعدين أدهم ساب ايد البنت وهي بتعيط ومشي وسابها تعيط... قعدت البنت مكانها تعيط كانت بنت جميلة اووي... رحت وقعدت قدامها... رفعت عينيها وهي بتبصلي بحيرة فقلت بسرعة :
-شفتك بتبكي لوحدك فقلقت انتي كويسة؟
هزت البنت رأسها وهي بتبكي...
-طيب أهدي لو سمحتي واحكيلي.
هزت البنت رأسها بالنفي وهي مكملة بكي...
-احكيلي يمكن اساعدك.
بصتلي وهي بتمسح دموعها وبتقول :
-هيخطب... هيخطب خلاص ويسيبني
-هو مين؟!
-أدهم اسمه أدهم احنا كان مرتبطين... هو وعدني من شهر أنه هيكلم باباه ويتقدملي وجاي دلوقتي يقولي أنه هيخطب بنت صاحبه اللي كان بيعتبرها اخته... قالي أن أبوه اجبره... قوليلي فيه أب يجبر اولاده علي الجواز... فيه أب ممكن يحرم أولاده من السعادة... أنا ذنبي ايه... أنا حبيت أدهم أكتر من حياتي... رفضت كتير بسببه.. مكنتش برضي أكلمه كتير ولا أطلع معاه عشان ربنا يباركلنا في حياتنا... ده جزائي في الآخر يسيبني...
مسحت دموعي بسرعة وطبطت علي ايديها وقلتلها :
-ربنا كريم.
ومشيت بسرعة... قابلت مروة في الطريق قلتلها :
-خلينا نروح البيت أنا تعبت
ومن غير ما اسمع ردها مشيت...
.....
بالليل...
كنت قاعدة في اوضتي وأنا بعيط... حب حياتي طلع بيحب واحدة تانية... واحدة غيري... بنت ملهاش ذنب إلا أنها حبته... وأنا لو وافقت اتجوزه هبقي دمرت حياتي وحياته وحياة البنت المسكينة اللي بتحبه... ولو متجوزتهوش هبقي كسرت قلبي بإيدي... بس سؤال جه في بالي... أنا استحق كده؟! استحق اتجوز واحد قلبه مع غيري... بيفكر في واحدة تانية وبيخوني بعقله... هل أقدر ادخل حرب أنا عارفة إني خسرانة فيها ... أنا استحق ده... ليه ميكونش إني لما شوفت ادهم معاها النهاردة ده من لطف ربنا بيا ... مسحت دموعي وأنا بقرر إني مستحقش كده... أنا أغلي من إني اتجوز واحد مبيحبنيش حتي لو هموت عليه... أنا استحق واحد يحبني واحد أكون أنا بس اللي في قلبه مش واحد متجوزني عشان يرضي أبوه... خرجت من اوضتي ورحت لاوضة بابا كريم وخبطت عليه لقيته لوحده
-إزيك يا بابا.
أبتسم بابا وقال :
-تعالي يا عروستنا.
رحت وقعدت جمبه.. مسكت ايده وقولت :
-قرايبي كانوا بيقولولي دايما أنك عمرك ما هتحبني قد عيالك... وأنا كنت برد عليهم أنك أبويا والاب مبيفرقش بين أولاده... بس انت حبتني أكتر من عيالك حتي يا بابا... رضيت تكسر قلب أدهم عشان تبسطني... ليه يا بابا.
عينيه دمعت وقال:
-كنت عايز اطمن عليكي قبل ما اموت يا سلسبيل.
بكيت وانا بقول :
-بعد الشر متقولش كده..
حضني وقال :
-دي سنة الحياة يا عبيطة... الموت حقيقة وأنا كنت خايف عليكي.. كان نفسي أفرح بيكي وأشوف عيالك انتي وادهم.. نفسي اعمل حاجة تفرحك.
-بس انت دايما مفرحني... أنت احسن أب في الدنيا...
بعدت عنه وأنا بقول :
-وجودك أنت بس يفرحني... أنت أغلي حد عندي ومن حقي كبنتك امنعك تدمر حياة ابنك عشاني... أدهم بيحب واحدة تانية يا بابا... أنت ترضي أن بنتك تتجوز واحد قلبه مع واحدة تانية.. مش شايف إني استحق أحسن من كده
-بس يا بنتي.
-من غير بس يا بابا متكسرش قلب أدهم... وأنا هلاقي نصيبي.
هز بابا رأسه وحضني... حضنته وأنا ببكي.. كان صعب عليا بس مقدرش أشوف سعادتي الوهمية بتتبني علي تعاسة ناس تانية... أدهم أنا هخرج حبه من قلبي.. صحيح صعب لكن مش مستحيل.
.......
بعد أسبوعين...
كنت واقفة برقص أنا ومروة في خطوبة ادهم... بابا اخيرا اقتنع وخلي ادهم يخطب اللي بيحبها...والغريب إني كنت فرحانة ليه جدا وأنا بشوف سعادته مع واللي بيحبها واللي طلعت بنت طيبة اووي اسمها منار... اتصدمت لما شافتني ولما عرفت كل حاجة شكرتني
مسكت مروة أيدي وقالت :
-عقبال ما أرقص في خطوبتك يا سوسو.
-ده لازم طبعا وانا هنزل من الكوشة وارقص معاكي.
....
وبس عدت الشهور واتخرجت واشتغلت واتعرفت علي مهدي... وحسيت قلبي للمرة التانية بيدق... لما أشوفه بس ابقي مبسوطة ولما اكتشف أنه بيحبني قرر يتقدملي علطول واتجوزنا وعيشنا أجمل أيام حياتنا... أنا دايما كنت مؤمنة اني استحق الأفضل... استحق أسرة تحبني... راجل يحبني ويقدرني ولقيت الاتنين.. أظن إني محظوظة مش كده؟
تمت
#لاني_أحبك
#سولييه_نصار
الاسكريبت القادم هيكون بإسم ديانا إن شاء الله ❤
