الجزء التاني شكرا لتفاعلكم السكر زيكم❤❤❤
-فرحي باظ... فرحي باظ وكله بسبب مراتك المجنونة يا عادل
بصلها عادل وهو متضايق وقال :
-ما كله بسببك يا هانم قلتلك متقوليلهاش بس كيد الحريم داء فيكم.... المهم هنبات في المستشفي النهاردة وبكرة هعوضك بشهر عسل خيال بعيد عن ناتير ومشاكلها
.......
تاني يوم.
كان عادل وروفان في العربية ورايحين شرم عشان يقضوا شهر العسل في الشالية بتاع عادل....
........
وصلوا للشالية أبتسم عادل وقال :
-ومن دلوقتي هنقضي أنا وانتي أجمل شهر عسل وهعوضك عن الفرح...
فتح الباب واتجمد لما شاف خديجة وياسين جايين عليه.
-بابا.. بابا وحشتنا.
حضنهم عادل وهو مصدوم وبص لقاني قدامه
-ناتير بتعملي ايه في الشالية.
ضحكت وانا برد :
-كنت عايزة اعملهالك مفاجأة يا قلبي... قلت بما أنك هتصيف مع فيران أجي اصيف معاكم أنا والولاد... ايه رأيك في المفاجأة دي.
بصتلي روفان وفجأة اغمي عليها.
حطيت أيدي علي صدري وقولت :
-شكلها ماتت يا حبيبي...
.......
-آه فيه ايه؟!
صرخت روفان وأنا بكب عليها كوباية ماية ساقعة
-ما تقومي يا عروسة انتي هتفرهدي مني من أولها
-ايه بتقولي ايه؟
ابتسمت بخبث وقولت :
-هتعملي عبيطة ولا ايه... انتي فاكرة هسكت علي اللي عملتيه فيا انتي والسنيور وديني لازقيكم المر بإيديا.
دخل عادل فجأة فابتسمت وأنا بقول :
-ما يالا بقا يا عروسة تعالي اقعدي معانا هننزل شوية في البحر.
مسك عادل أيدي واخدني علي جنب وهو بيقول:
-مش ملاحظة أنك زودتيها... اهدي شوية
-وأنا عملت ايه يا دولة
-أنا عريس مفروض تخلي عندك دم وتديني شوية خصوصية مع مراتي عايزة اتمم جوازي عليها
-وماله يا أخويا بس خلي الخصوصية لبليل مش حبكت دلوقتي...
مسكت ايديه وقلت :
-يالا يا دولة متنحش عايزين نفسح العيال...
بصيت لروفان وقلت تيجي معانا يا فيران.
مردتش عليا فكملت أنا :
-شكلك تعبانة هسيبك ترتاحي... يالا يا دولة يالا يا عيال...
ومشيوا
-شهر عسلي باظ منك لله يا ناتير يارب تطلعلك سمكة قرش وتأكلك وتريحني منك.
.......
بالليل.
كانت روفان واقفة قدام المرايا لابسة قميص نوم وبترش برفان... لما دخل عادل وبصلها بإعجاب وهو بيقول بصوت واطي :
-زي القمر يا حبيبتي يالا بسرعة قدرت أخيرا انوم البومة وعيالها
-ازاي ده.
-حطيتلها منوم في عصير الجوافة.
راحت بسرعة علي السرير ونامت وراح جمبها وهو بيقول :
-هتموتي يا سوسو
ولسه هيقرب منها دخلت أنا فجأة مع العيال وأنا ماسكة طبق فشار كبير وقلت :
-شوفوا عملتلكم فشار.... يالا نسمح فيلم هيعرضوه دلوقتي عن واحدة قتلت جوزها عشان اتجوز عليها.
كتمت ضحكتي وأنا بشوف وش عادل اصفر وقال بتوتر:
-انتي منومتيش!!!
-أيوة وانام دلوقتي ليه لسه بدري
-انتي مشربتيش عصير الجوافة اللي اديتهولك
-لا كبيته
-ليه كبتيه
-مكانش ليا نفس اشربه عارف إني مليش تقل علي الجوافة..
-هو ايه اللي ملكيش تقل عليها... ده انتي بتشربيه ببذره...
عملت نفسي متضايقة وقولت:
-يوووه يا عادل متمسكش علي الواحدة... يالا بقا نسمع الفيلم.
رحت بعدته وقعدت جمب روفان... خبطت بإيدي علي دراعاتها وقلت:
-والنبي يا فيران يا أختي غطي دراعاتك دي عيالي بيتكسفوا
شدت روفان الغطا عليها فأبتسمت وقلت:
-خديجة.. ياسين تعالوا اقعدوا جمبي نسمع الفيلم.
بصيت لعادل وقلت :
-بالله عليك يا عريس ممكن تشغل التلفزيون...
نفخ في وشي ومشي وهو شايط مني... ابتسمت وأنا ببص لروفان وبقولها :
تأكلي فشار يا عروسة بما أن الليلة باظت .
........
تاني يوم.
قعد عادل قدامي وقال بصراحة تامة :
-انتي عايزة ايه يا ناتير... بوظتي فرحي.. وشهر العسل بتاعي ... عكرتي مزاجي أنا وروفان... عايزة ايه من ده كله
-تكتب البيت بإسمي.
-نعم يا أختي.
بصتله ببرود وقولت :
-كلامي واضح.
قام وهو متعصب
-انتي عايزاني احط صباعي تحت ضرسك انتي... عايزة تاخدي الشقة وترميني في الشارع.
-وليه ارميك في الشارع أنت دلوقتي اتجوزت تاني واكيد هتعيش معاها في الشقة اللي اشتريتها في المهندسين صح
وشه اتقلب
-سكت ليه فاكرني مش هعرف.... هو انت فاكر إني كنت نايمة علي وداني ومش عارفة أنك بتخطط تتجوز تاني... لا بجد ضحكتني أنا بحس بيك يا عادل واقدر أقرأ كل أفكارك.... روفان الغبية افتكرت أنها هتقهرني لما تقولي علي فرحكم بس أنا اللي قهرتها... قصره الشقة من حقي أنا وولادي وأنت عيش معاها في الشقة اللي اشتريتها
-ولو رفضت!
-يبقي استحمل وجودي هنا وهقرفك أنت والسنيورة
ومشيت وسبته.... ولمدة تلات ايام دوقته المرار هو ومراته.... مقدرش يلمسها خالص في وجودي... لحد ما استسلم ووقع علي الأوراق اللي أنا عايزاها... أوراق ملكية البيت.... كده كان فاضل حاجة بس أعملها ويبقي أخدت حقي من عادل.... سيبت الشاليه ورجعت بيتي.
.....
بعد أسبوعين وصل عادل ومراته شقتهم ولقوا واحد بيخبط عليهم :
-افندم حضرتك عايز ايه؟
بصله الموظف وقال :
-حضرتك أستاذ عادل شريف
-أيوة أنا
ناوله ظرف وقال :
-ده ليك!
-ايه ده.
-دي دعوة خلع رفعتها عليه مدام ناتير رشوان!
يتبع
#ناتير
#سولييه_نصار
النهاردة هنزل كمان بارت بإذن الله ❤❤
