للنصيب رأي أخر《جمود أنثى》
الحلقة ( ٣٥ )...
شويه وناديه أخدت نهى على المطبخ، وبتقولها: ها يا جميل... أخبارك إيه مع وائل؟؟؟
نهى ضحكت جامد: تمام يا حبيبتى... بخير...
ناديه بتغمزلها: على فكره... أنتى طلعتى عينه لغاية ما وافقتى عليه.... ناديه بهدوء: وائل بيحبك أوى يا نهى....
نهى بإبتسامه هاديه: وانا كمان بحبه أوى...
ناديه إبتسمت، ونهى بتقولها: ها!! قوليلي بقى فضلك إيه تعمليه؟؟؟؟
ناديه بإبتسامه: هعمل جلاش حلو... والسلطات...
نهى بإبتسامه: طيب سبينى اعملك الحلو، وأنتى شوفى الباقى....
ناديه إبتسمت، وحست إن نهى مش متكبره ولا مغروره، مع إنهم اول مره يتعاملوا مع بعض، بس كون إن نهى تدخل معاها المطبخ وتساعدها فيه حسستها إنها متواضعه، و مش متكلفه....
ناديه لاحظت طريقه نهى المختلفه فى عمل الجلاش فبتسألها بإستغراب: هو أنتى ليه بتحطى بين كل ورقه والتانيه سمنه؟؟؟ ده كده هيبقى غرقان سمنه....
نهى بهدوء: كده هيطلع زى الجاهز بالضبط، وهيطلع مورق، جربى مش هتخسرى حاجه...
ناديه بإبتسامه: ماشى يا ستى... هجرب وأشوف الوضع إيه....
ناديه خلصت الأكل، وهى ونهى جهزوا السفره، و حطوا الأكل، وبدأوا ياكلوا، وطبعا ندى أصرت إن وائل يأكلها، بعد ما خلصوا الأكل... ناديه جابت الحلو ونهى عملت الشاى والأولاد بيلعبوا مع بعض.... و محمد أستغرب شكل الجلاش إللى ناديه حطاه، وأول ما أكل منها عجبته أوى أوى، فبيقولها قدام نهى و وائل: إيه ده يا ناديه... الجلاش المره دى شكله وطعمه مختلف.... أنتى عملتى فيه إيه؟؟؟ ده كأنه جاهز، محمد بهزار: والله وطبيخك أتقدم يا حوريه...
ناديه بصت لنهى بغيظ، ونهى ضحكت، و وائل ضحك بس بهدوء، وائل عارف أكل ناديه، و أول ما شاف الجلاش عرف إن نهى هى إللى عملاه، لأنه سبق وداقه عندها فى البيت... فناديه بغيظ من كلام محمد: يعنى عجبك المره دى يا محمد؟؟؟؟
محمد بتلقائيه: جدا !!!! اعمليه كل مره كده....
وائل ضحك جامد وقالها: تسلم إيدك يا ناديه... اكلك كله حلو... تعبناكى معانا....
ناديه بإبتسامه: تسلم يا وائل....
شويه وهم بيرغوا مع بعض، وائل إتفاجأ بندى بتجرى عليه وهى بتعيط: بابى... بابى...
نهى اتخضت هى و وائل من منظرها وعيطها، و وائل أخدها فى حضنه بسرعه: مالك يا قلبى!!! فى إيه؟؟؟؟
ندى بعياط: آدم يا بابى.... آدم ضربني....
وائل اخدها فحضنه أوى، شويه و كلهم لقوا أسر وآدم خرجوا من جوه.... وآدم وشه وارم، وأسر بيقول لندى: ما تزعليش يا ندى.... أنا ضربتهولك...
كلهم مستغربين من إللى حصل، ومش فاهمين حاجه.... ومحمد سأل أسر بعصبيه: إيه إللى حصل يا أسر!!! و آدم ضرب ندى ليه؟؟؟؟
أسر بزعل: ندى أخدت العربيه بتاعت آدم عشان تلعب بيها... فآدم شدها منها بالعافيه وضربها فى دراعها....
كلهم بصوا لآدم بزعل، ومحمد بعصبيه: وبعدين؟؟؟؟
أسر بحزن: لما أنا قولتله ما ينفعش تضرب بنت، ولازم تقولها سورى، هو قاللى لأ مش هقول.. رحت ضربه عشان هو زعل ندى وضربها...
وائل بص لأسر بهدوء وقاله: بس ماينفعش تضرب أخوك يا أسر، حتى لو هو غلط... المفروض تروح تقول لبابى، وهو يتصرف...
أسر بحزن: أنا أتضايقت منه عشان زعل ندى، وخلاها تعيط، وأنا مش بحب أشوفها تعيط...
كلهم بصوا لبعض بإستغراب، وبعدين ضحكوا على كلامه.... و وائل بص لآدم وقاله بهزار: وانت يا سى آدم آخر مره تمد إيدك على ندى، وائل بص لمحمد بغيظ، ورجع بص لآدم: لحسن وحياة ابوك وامك، ما هعتقك... انت فاهم ياض...
آدم بص لأبوه، ومحمد قاله: ماتبصليش كده، انت غلط مع بنت عمك، واستحمل عصبية أبوها....
آدم بنرفزه: وهى تاخد عربيتى ليه!!! ها!!!
وائل برخامه: تصدق ياض أنت لو مقولتش لندى سورى هعمل فيك إيه... هعلقك من رجليك...
آدم بص لأبوه، ومحمد بضحك: أنا مليش دعوه.... عمك، وهو حر فيك...
آدم رجع بص لوائل بغيظ: سورى يا ست ندى....
ندى بعد ما هديت من العياط: that's ok....
كلهم بصوا لبعض وضحكوا أوى... طبعا ماعدا آدم إللى كان متغاظ إنه إعتذر لندى... بس وائل طلب من أسر إنه يعتذر لآدم على ضربه ليه.... شويه وندى نزلت من حضن وائل و راحت لأسر و آدم وفضلوا يلعبوا مع بعض...
نهى كانت متابعه إللى حصل وهى مبسوطه من جواها إن وائل بيدافع عن ندى، وأطمنت من جواها على ندى....
شويه وناديه أخدت نهى يقعدوا مع بعض فى البلكونة.... ناديه بغيظ: شفتى عمايل جوزى... يعنى اروح اولع فيه....
نهى بضحك: ليه بس يا ناديه... هو عمل إيه بس؟؟؟
ناديه بغيظ: شفتى شكر فى الجلاش بتاعك إزاى، ده معلقش ولا قال كلمه كويسه على أكلى...
نهى بضحك: يا بنتى هو مايعرفش إن أنا إللى عملته، فبلاش تقوليله أصلا... خليه فاكر إنك انتى إللى عملاه، وقوليله لقيت طريقه تانيه عجبتنى وقولت اجربها...
ناديه بزعل: تعرفى يا نهى أنا ساعات كتير بحس إنى مخنوقه منه أوى...
نهى بحيره: ليه بتقولى كده يا ناديه...
ناديه بزعل: أغلب الوقت يإما فى الشغل، يا مع أصحابه... قليل أوى لو خرجنا مع بعض او قعد معانا فى البيت... وكتير بحس إنى مخنوقه من قعدة البيت والعيال...
نهى بهدوء: طب ما تشتغلى يا ناديه، ده هيفرق معاكى أوى....
ناديه بضيقه: مش راضى يا ستى... كل ما أقوله أشتغل معاك، يقولى" انتى عايزه تفضلى لزقالى فى البيت والشغل"، ولو قولتله بره يقولى" اه عشان افضل مستنى سيادتك لما تيجى من بره"، ناديه بغضب: حاجه تقرف وتزهق...
نهى إبتسمت بهدوء: طيب ما تروحى الجيم.....
ناديه بصتلها بإستغراب: جيم!!!!
نهى بهدوء: آه!! إيه المانع...مش أنتى مشتركه للأولاد فى النادى... أنتى أشتركى فى الجيم، واخرجى وظبتى نفسك، ولا تفضلى تحرقى فى دمك وتفكى عن نفسك شويه...
ناديه بصتلها بحيره، ونهى بتكمل كلامها: بصى يا حبيبتى.... لو فضلتى بالشكل ده أنتى إللى هتتعبى، بلاش تحسسيه إنك مستنيه خروجه منه او أنه يقعد معاكى فى البيت، لازم يحس إن فى حاجه شغلاكى عنه عشان ما يفضلش مطمن إنه يقدر يخرج براحته ويرجع يلاقيكى مستنيه منه كلمه او حب او يقعد معاكى أنتى والأولاد... اشغلى نفسك بقرأه روايات، بالنادي، اى حاجه، وفى نفس الوقت ما تقصريش فى شغل البيت، وشوفى هو هيحس بالتغير ده ولا لأ....
ناديه بصتلها بذهول: تعرفى إن كلامك صح، أنا لازم أتغير....
نهى بتنبيه: تتغيرى عشان نفسك، مش عشان حد يا ناديه... هو مش عايزك تشتغلى حقه، ومدام مش مقصر معاكى فى طلباتك انتى والأولاد، فبلاش تعملى مشكله من الهوا... بس إشغلى نفسك بحاجه مفيده عشان متحسيش بالزهق، أو إنك تفضلى مستنياه....
ناديه بإبتسامه: طيب قوليلى أسماء روايات أقرأها... وأنا من بكره هقوله على موضوع الجيم ده...
نهى بإبتسامه: ماشى يا ستى...
نهى قالت لناديه على أسماء روايات كتير... وناديه اتبسطت لما اتكلمت مع نهى.... شويه و وائل نده لنهى عشان يروحوا، ونهى خرجتله هى وناديه، وندى وآدم وأسر...
ناديه بإبتسامه وهى بتسلم على نهى: حبيبتى، هاتى رقمك عشان ابقى اعرف أكلمك على طول، وأعرف إزاى اوصلك....
نهى ضحكت جامد، واخدوا أرقام بعض، و محمد بهزار: ربنا يستر... بصراحه مش مطمن من إللى هيحصل ده....
نهى وناديه بصوله أوى بصدمه، و وائل ضحك عليه... ونهى بهزار لناديه: تصدقى يا ناديه حلال فيه إننا نعمل حزب ضده، بجد يستاهلها...
ناديه بغيظ من محمد: بدل ما تفرح إننا أصحاب تقول كده... ناديه بصت لوائل: وائل... طلع عينه فى الشغل، متخليهوش ياخد أجازه خااالص....
محمد بص لوائل بغيظ: ولا!!! اوعى تسمع كلامها...
وائل حط إيده على كتف نهى بحب: بصراحه يا محمد انت دوش أوى.... وحلال فيك إللى نهى وناديه يعملوه معاك.... وائل بضحك: تستاهل....
محمد بغيظ: ماشى يا وائل... مسيرك تقعد معانا على القهوه... محمد بإستغراب: إلا قولى يا وائل... إيه دوش دى!!! يعنى إيه؟؟؟
نهى و وائل بصوا لبعض، ومره واحده إنفجروا من الضحك، وعنيهم دمعت، فوسط إستغراب ناديه و محمد، فمحمد بغيظ: هى للدرجاتى ضحكتكم... ماشى يا سيدى...
نهى قربت من ناديه وقالتها بهمس: لو عايزه تعرفى يعنى إيه دوش... اقرأى روايه العنيد... هتعرفى معناها....
ناديه إبتسمت أوى، ومحمد بغيظ: هى قالتلك إيه؟؟؟
ناديه غمزت لنهى، وبصت لمحمد وبرخامه: وانت مالك.... خليك فى حالك....
كلهم ضحكوا وهزروا.... وسلموا على بعض و وائل اخد نهى وندى عشان يروحوا البيت... وهم فى العربيه نهى بتقوله: هو محمد أتضايق بجد لما أخدت رقم ناديه؟؟؟؟
وائل بصلها بحب: لأ طبعا يا نهى... ده بيهزر مش اكتر... بس ساعات هزاره رخم حبتين....
نهى إبتسمت: فعلا حلال فيه إللى ناديه هتعمله معاه...
وائل بإستغراب: وهى ناديه ناويه تعمل فيه إيه؟؟؟؟
نهى ضحكت جامد: ههههه! ما تستعجلش يا قلبى.... بكره محمد هيحكيلك....
وائل بضحك: شكلكوا عملتوا حزب عليه.... صح؟؟؟؟
نهى بضحك: آه!!! يستاهل.....
وائل ونهى ضحكوا جامد، شويه و وائل مسك إيديها وباسها بمنتهى الرقه والحب، وقالها: تسلم إيدك يا قلبى.... الجلاش كان تحفه...
نهى بصتله بذهول: انت عرفت إزاى إنى أنا إللى عملاه؟؟؟؟
وائل بإبتسامه حب: هو أنا هتوه عن أكل مراتى حبيبتى ولا إيه!!! أنا عارف أكل ناديه عامل إزاى، وعارف أكلك يا قلبى...
نهى إبتسمت بإحراج، وهو بيكمل بضحك: الله يكون فعون ناديه.... أكيد نفسها تولع فى محمد بعد ما شكر فى أكلك قدامها.... نهى و وائل فضلوا يضحكوا ويهزروا لغايه ما وصلوا بيت نهى، وائل سلم عليهم وروح بيته....
عند محمد.....
محمد لاحظ إن ناديه ساكته من ساعة ما نهى و وائل مشيوا، فسألها بإستغراب: ناديه!! مالك فى إيه؟؟؟؟ أنتى متضايقه من حاجه؟؟؟
ناديه بصتله بغيظ وهى ساكته، بس إفتكرت كلام نهى ليها، ف بعدت وشها عنه واخدت نفس جامد وخرجته بالراحة: مافيش يا محمد، بس مكنش لازم تقول الكلام إللى أنت قولته لنهى... كده هتفتكر إنك متضايق إنى أخدت رقمها...
محمد بجديه: لأ طبعا يا ناديه... أنا مقصدش إنه بجد، وأكيد وائل عارف إنى بهزر وهو هيعرفها كده...
ناديه بزعل: لازم انت توضحلها ده يا محمد عشان ماتزعلش منك، لما تشفها فى الشركه تفهمها كده...
محمد فكر شويه، وبعدين قالها بهدوء: فعلا يا ناديه، عندك حق... بكره فى الشركه هوضحلها سوء التفاهم ده....
ناديه إستغلت الفرصه: محمد... ممكن أطلب منك طلب؟؟؟
محمد بحيره: امممم !!! بصراحه مش مرتحالك يا ناديه.... خير عايزه إيه؟؟؟؟
ناديه بلعت ريقها: بما إنك رافض إنى أشتغل معاك او بره... فعايزه أشترك فى الجيم بتاع النادى....
محمد بصدمه: نعم ياختى!!!! تشتركى فى إيه؟؟؟ لأ طبعا أنا مش موافق....
ناديه بعصبيه: ليه بقى مش موافق!!! أنا كده كده بروح النادى عشان تمرينات عيالك، يبقى ليه لأ... أنا ممكن أروح أثناء ما هما بيتمرنوا... وانت اصلا سايب إيدك من مسؤليتهم، فيبقى إيه المانع...
محمد بصلها بغيظ: هو كده يا ناديه... من غير ليه... وقفلى بقى على السيره الغبيه دى....
ناديه بنرفزه: غبيه!!! أنا كلامى غبى يا محمد... طيب ماشى... أنا هوريك الغبيه دى هتعمل إيه....
محمد بصلها بإستغراب وسابلها الأوضه والبيت كله ونزل... وناديه بنرفزه: ماشى يا محمد... إيما وريتك....
محمد أخد عربيته وفضل يلف شويه... وبعدين راح يقعد على القهوه....
محمد فضل قاعد وقت طويل بره، وبعدين روح بيته كانت ناديه نامت.. إستغرب أوى لما لاقاها نايمه، لأنه مش متعود إنها تنام وهو بره، هى بتفضل صاحيه وسهرانه لغاية ما يرجع البيت، ومش بتنام غير لما هى تطمن إنه رجع... دخل أخد شاور، وخرج نام....
تانى يوم فى الشركه.....
نهى راحت الشركه، وطلعت على مكتب وائل... سلمت على حنان، ودخلت على وائل، نهى بإبتسامه: صباح الخير حبيبى أنا....
وائل بإبتسامه: صباح النور يا قلبى... عامله إيه انهارده؟؟؟؟
نهى قعدت قصاده، وبهزار: جعااااااانه......
وائل بصلها بإستغراب، وضحك جامد أوى، وقام من مكتبه وقعد قصادها على الكرسى: ههههه!! حبيبى... إللى يسمعك كده هيفتكر إنى مجوعك...
نهى بغلاسه: أيون.... حضرتك مجوعنى....
وائل ضحك و مسك إيديها بحب: امممم.... أنا شامم ريحة طعميه سخنه تجنن، محطوطة فى العيش الفينو.... وائل بيغمزلها: إيه رأيك؟؟؟
نهى ضحكت جامد: ههههه!! ومعاه باذنجان مخلل، وشيبسى؟؟؟؟
وائل بإبتسامه: ومعاه باذنجان مخلل، وشيبسى....
نهى بتفكر شويه:امممممم.... وبيبسى؟؟؟
وائل ضحك وقام وقف، ووقفها معاه، وحط إيده على كتفها بحب: وبيبسى، و شوكلت جلاكسي كمان... إيه رأيك؟؟؟
نهى إبتسمت أوى: طبعا موافقه... ودى عايزه كلام....
وائل باسها فى خدها بحب: طيب يلا بينا....
نهى أخدت شنطتها، ويدوب وائل فتح الباب لقى محمد فى وشه....
محمد بإبتسامه هادية، وبهزار: صباح الخير.... على فين العزم حضراتكوا كده؟؟؟؟
نهى بإبتسامه: صباح النور.... إزيك يا محمد...
وائل بإبتسامه: إزيك يا محمد... عامل ايه؟؟؟؟
محمد بغلاسه: أنا كويس.... متكلفتونيش فى الكلام.... على فين منك ليها؟؟؟
وائل حط إيده فى وسط نهى وشد عليها... وهى إرتبكت أوى، بس فهمت إن وائل عايزها تتعود على وجودها معاه، ومعاملته ليها كزوجه قدام محمد وقدام الناس... و وائل بيرد على محمد بإبتسامه هادية: هنروح نفطر بس بره الشركه....
محمد برخامه: آه!! أدى إللى أخدناه من جوازكوا أنتوا الأتنين... هتزوغوا بدرى بدرى صح.....
نهى ضحكت بهدوء، و وائل بغلاسه: هههى... ظريف أوى يا خويا.... لو عايزين نزوغ هنزوغ من غير سيادتك ما تعرف...
محمد بصلهم بغتاته: طب انا عايز افطر.... هتعزمونى على إيه؟؟
وائل بص لنهى، وهى بصتله وضحكت: حرام يا ليلو... خليه يفطر معانا... وأهو نكسب فيه ثواب....
محمد بذهول: ها!! ليلو... محمد ضحك جامد أوى: ههههه! تصدق حلوه ليلو دى....هههههه....
نهى بصت بكسوف أوى لوائل ورجعت بصت فى الأرض، و وائل إبتسم وشد من حضنه ليها، وخلاها تبصله... وقرب منها وهمسلها بحب:أنتى مراتى، حبيبتى وقلبى وروحى أنا... وتقولى إللى أنتى عايزاه وقدام أى حد... فاهمه؟؟؟؟
نهى بصتله بكسوف أوى... وهو باسها فى رأسها قدام محمد، ورجع بص لمحمد وبيغيظه: براحتها تقول إللى هى عايزاه فى الوقت إللى هى عايزاه، وقدام أى حد... وائل برخامه: إللى غيران منا يقلدنا...
نهى ضحكت على كلام وائل، ومحمد بغيظ: ماشى يا عم ليلو... المهم... هنروح نفطر ولا إيه؟؟؟
وائل بضحك: ولا آه!!! مع إنك هتبقى عزول فى وسطينا... بس هنعمل إيه لازم نستحملك بقى.... حكم القوى يا شيخ...
محمد ونهى ضحكوا جامد... ونزلوا كلهم مع بعض عشان يفطروا....
وائل قال لمحمد إنهم هيفطروا العربيه، فمحمد بإستغراب: نعم!!!! أنتو هتفطروا في العربيه!!! إزاى يعنى؟؟؟؟؟
نهى و وائل ضحكوا جامد، و وائل فهم محمد هم هيفطروا إيه....
وائل أدى فلوس لمحمد وخلاه يروح يجيب الأكل والحاجه.... نهى قاعده قدام جنب وائل، ومحمد راح جاب الحاجه، ونهى بتعملهم الساندوتشات، وبتديها لوائل، و وائل بيديها لمحمد....
محمد بإنبساط: امممم!! بجد تحفه.... تسلم إيدك يا نهى.... بصراحه أنا بقالى كتير أوى مافطرتش بالشكل ده.... بجد القعده والأكل يجنن...
نهى بإبتسامه: العفو يا محمد... أى خدعه... أبقى تعالى كل يوم....
وائل بغيره: ماتلم نفسك ياض أنت.... هو أنا مش مالى عينك ولا إيه....
محمد تنح هو ونهى، و وائل بص لنهى بنرفزه: وانتى يا ست هانم... ما تلمى الدور ده... أل تعالى كل يوم...
نهى كتمت ضحكتها على غيرة وائل، ومحمد برخامه: يابنى بجامل مراتك... انت إيه إللى مزعلك بس؟؟؟
وائل بغيظ: ولا!!! بطل غباوه على الصبح... وائل برخامه: مش خلاص فطرت... يلا بقى من غير مطرود... على شغلك بقى....
محمد بضحك: ماشى يا عم ليلو... أنا سيبك بس عشان لسه عريس جديد، بس هحجزلك كرسى معايا على القهوه...
وائل ونهى ضحكوا... ومحمد قبل ما ينزل: آه افتكرت!!!! نهى !!!!
نهى بصتله بإبتسامه، و محمد بيكمل كلامه بهدوء: أنا مقصدتش اضايقك إمبارح لما ناديه أخدت منك رقم تليفونك... أنا كنت بهزر وبرخم عليكوا.... مش عايزك تزعلى منى....
نهى إبتسمت بهدوء: ولا يهمك يا محمد... أنا مازعلتش... نهى بصت لوائل، وبهزار: وائل قالى إن هزارك رخم حبتين تلاته كده....
محمد بص لوائل بغيظ: يعنى هو أنا هجيبه من بره، محمد بهزار وهو بيبص لوائل: من عاشر القوم يا سى ليلو....
وائل بص لمحمد بغيظ، ومحمد فتح باب العربيه بسرعه ونزل منها و وائل بيقوله: طب مافيش اجازه ليك لمده شهرين يا زفت.... سامع....
محمد بعد ما نزل من عربية وائل: هرفع عليك قضيه....
نهى و وائل ضحكوا، ومحمد سابهم وراح على الشركه....
وائل بص لنهى بغيظ: وانتى يا هانم، بطلى تدلعى على الناس بالشكل ده...
نهى بصتله بذهول: أنا!!!! أنا بتدلع على الناس!!!! نهى بضيقه: ليه بتقول كده يا وائل؟؟؟
وائل بغيره: من إللى قولتيه لمحمد من شويه.." أى خدعه... تعالى كل يوم"... إيه ده.....
نهى إبتسمت بهدوء، وبغلاسه: أنتى بتغيرى عليا يا بيضه......
وائل بغضب: نهى!!! ما تستفزنيش... سامعه...
نهى بإبتسامه: حبيبى... مش قصدى اضايقك ولا ازعلك... بس انت مكبر الموضوع...
وائل اخد نفس جامد وخرجه بالراحه، ورجع بصلها بحب فعنيها: أنا بغير عليكى من نفسى... مابالك بصاحبى، وبالناس....
نهى بحب: وأنا بغير عليك من الهوا إللى بيلمس شعرك... أعمل أنا إيه بقى....
وائل بصلها بإبتسامه حب: حبيبى... أنا كلى على بعضى ملكك أنتى لوحدك... وائل مسك إيديها وباسها بحنيه وحط إيديها على قلبه بحب: كل حاجه فيا بتعتك أنتى لوحدك... نهى إرتبكت و إتوترت، و وائل بحب: نهى!! أنا عايزك تروحى الفيلا أنتى وناديه... وتشوفى لو فى اى حاجه نقصاكى عايزه تجبيها، أو تغيرى اى حاجه فيها... وائل بحب: بصراحه أنا عايز اتجوز من إمبارح مش من إنهارده....
نهى إرتبكت أكتر: آه!! بس يا حبيبى....
وائل بإبتسامه هاديه: من غير بس.... أنا هقول لمحمد إنك بكره هتروحى مع ناديه عشان ترتبوا الحاجه... وائل بيغمزلها: وكمان عشان تودى حاجة ندى، وحاجتك.. ولا إيه يا زوجتى العزيزه....
نهى بصتله بذهول، وشدد إيدها منه بالعافيه: مش هتبطل رخامه بقى....
وائل بضحك: تؤتؤ... لما تبقى فى بيتى رسمى فهمى نظمى....
نهى و وائل ضحكوا، وخلصوا أكل وطلعوا على الشركه يخلصوا شغلهم، و وائل قال لمحمد أنه محتاج لناديه تروح مع نهى الفيلا، ومحمد وافق....
محمد كان لسه زعلان هو وناديه مع بعض، بس إستغرب أوى منها لما لاقاها ما اتصلتش بيه طول اليوم... هو مش متعود منها على كده... ناديه كانت بتفضل تتصل بيه مرتين تلاته فى اليوم، وخصوصا وهما زعلانين من بعض، كانت بتتلكك وتكلمه فى اى حاجه عشان بس تسمع صوته، أو تعرفه إنها مستنياه... بس المره دى أستغرب تصرفها أوى، هو فضل مستنى تليفونها لغايه الساعة ٨ بليل بس هى متصلتش خالص... محمد قلق عليها، واتصل بأسر...
أسر بهدوء: الو.... إزيك يا بابى....
محمد بقلق: الو... أيوه يا أسر.. عامل إيه يا حبيبى...
أسر: تمام يا بابى... الحمد لله....
محمد: وآدم عامل ايه؟؟؟
أسر: كويس يا بابى....
محمد بيحاول يدارى قلقه على ناديه: آا...أسر... هى مامى فين؟؟؟؟
أسر: فى أوضتها....
محمد بإستغراب: هى نايمه؟؟؟
أسر: لأ يا بابى... مامى صاحيه....
محمد أخد نفس جامد وخرجه بالراحه: طيب... مش عايزين حاجه اجبهالكوا معايا وأنا جاى؟؟؟
أسر بإبتسامه: آه... هتلنا شوكلت كتير أوى...
محمد بحيره: شوكلت كتير.... ليه بقى إن شاءالله.... عاملين عزومه وأنا معرفش....
أسر بنرفزه: آه... عشان لما ندى تيجى أبقى أدهالها....
محمد بتتنيحه: ها!!!! عشان مين يا خويا!!! ندى!!!! ولا!!!! هتسطعبت...أصبر عليا لما اجيلك....
أسر بنرفزه: ايه بس يا بابى... وفيها إيه يعنى لما اجيب شوكلت لندى...
محمد بغيظ: ماشى يا سى زفت... بس لما اجيلك....
محمد قفل مع أسر وضحك جامد عليه، وقال لنفسه: مش ناقص كمان غير العيال تحب وتغير...ههههه
محمد جابلهم شوكلت، وروح بيته، بس إستغرب أوى اول ما فتح باب شقته...
لاحظ هدوء غريب... حط الحاجه إللى جايبها على التربيزه، ودخل أوضت أسر ولقاه هو وآدم بيلعبوا مع بعض بس بهدوء... وهم أول ما شافوه جريوا عليه وآدم بسرعه: بابى بابى... جبت شوكلت معاك؟؟؟ أنا عايز شوكلت....
محمد بإبتسامه هادية: آه يا حبيبى... أنا حطتها بره على التربيزه... آدم خرج بسرعه، ولسه أسر هيخرج، محمد وقفه: أسر... هى مامى فين؟؟؟
أسر بهدوء: فأوضتها يا بابى...
محمد بحيره: هى مامى تعبانه؟؟؟
أسر بهدوء: لأ يا بابى... مامى كويسه...
محمد بحيره: هى مامى معملتش أكل إنهارده؟؟؟
أسر: لأ... مامى جبتلنا بيتزا من بره....
محمد بإبتسامه هادية: طيب روح خد الشوكلت بتاعتك...
أسر بزعل: بابى.... عملت حساب ندى؟؟؟
محمد بصله شويه، ومره واحده انفجر من الضحك: هههى..... آه يا خويا.... الحق شلهالها قبل آدم ما يخدها ليه....
أسر بسرعه جرى على بره عشان يلحق نصيب ندى من الشوكلت...
محمد دخل أوضته، و فتح الباب بالراحه، لقى ناديه قاعده على السرير ومشغله نور الاباجوره وماسكه تليفونها ومش مركزه فى أى حاجه، ومحستش إن محمد دخل الأوضه... محمد بصلها أوى بغيظ، وراح فتح النور، وهى لاحظت أن النور اتفتح، بصت على الباب، لقت محمد واقف، دورت وشها وفضلت مركزه مع تليفونها.... محمد بغيظ من تصرفها: إيه!!! ما فيش حمد الله ع السلامة....
ناديه فضلت ساكته ومركز فى تليفونها، ومحمد بنرفزه: أنا بكلمك على فكره....
ناديه بصتله بهدوء: سورى يا محمد.... حمد الله ع السلامة....
ناديه رجعت لتليفونها تانى... ومحمد بغيظ: اشتريتى أكل جاهز ليه؟؟كنتى بتعملى إيه من الصبح؟؟؟
ناديه بإبتسامه هاديه: بصراحه انشغلت أوى لدرجه إنى ماحستش بالوقت، و مقدرتش أعمل أكل، فطلبت بيتزا....
محمد بنرفزه: آه... وسيادتك كنتى مشغوله بإيه بقى؟؟؟؟
ناديه بنفس إبتسامتها: كنت بقرأ روايه إنما إيه تحفه.... مش قادره اسيبها... مش عارفه اسيبها....
محمد قرب منها بغيظ وعصبيه: نعم ياختى!!!!! روايه ؟؟؟؟
محمد للحظه إفتكر إللى حصل مع وائل، فبصلها بغل: نهى!!! صح... نهى هى إللى قالتلك عليها....
ناديه بنرفزه: آه يا محمد.... نهى قالتلى عليها، عندك مانع فى دى كمان؟؟؟ شغل ورفضت، جيم، واتخانقت معايا وبرده رفضت... حتى القراءه هتمنعنى منها.....
محمد بلع ريقه بالعافيه وبتوتر، وناديه بتكمل كلامها بجديه: أنا عايزه أفهم أنت بتعمل ليه كده ها... ليه؟؟؟
محمد سكت ومش لاقى كلام يقولهلها، وناديه أبتدت تتعصب: أنا سكت على رفضك للشغل والجيم، وأنت سايب تربية العيال مسؤوليتهم ليا لوحدى... فيوم ما أحب أعمل حاجه تريحنى وتخلينى مبسوطه تحرمنى منها.... ناديه بعصبيه: المره دى لأ يا محمد.... سامع....
ناديه سابتله الأوضه وخرجت راحت الأوضه التانيه... ومحمد واقف مصدوم من كلام ناديه ليه... هو إتفاجأ برد فعلها وكلامها ليه... هو مش عايز يقولها أنه أتضايق لما هى ماتصلتش بيه اليوم كله... ولا عملت زى كل مره ما بتعمل معاه، وده ضايقه أوى..... محمد دخل أخد شاور وفضل شويه كتير فيه... وبعد ما خرج إتفاجأ إن ناديه ما دخلتش الأوضه... وعرف إنها هتبات فى الأوضه التانيه....
محمد إستغرب أوى تصرفها، لأنها ولأول مره تسيب أوضتها وتخرج منها... هو إللى كان دايما بيسيب الأوضه، بس المره دى حاجه مختلفه عليه....
محمد فضل صاحى لغايه الساعة ٣ بليل، و بيتقلب يمين وشمال على السرير، و مش عارف ينام... و لأول مره يحس إن مراته وحشاه... قام يبص عليها إتفاجأ ب.....
يتبع.....
