للنصيب رأي أخر《جمود أنثى》
الحلقة ( ٣٤ )...
نهى إبتسمت أوى وردت بحب: صباح الخير حبيبى...
وائل غمض عنيه، و أخد نفس جامد وخرجه بالراحه، وفتح عينه وبحب: صباح الهنا والسعادة والحب حبيبى أنا.... وائل بهيام: وحشتينى أوى أوى أوى يا قلبى أنا...
نهى غمضت عنيها واخدت نفس جامد وخرجته بالراحة وفتحت عنيها: وبعدين معاك بقى...
وائل بحب: وبعدين معاكى أنتى.... يا حبيبى خلاص أنتى بقيتى مراتى ولو مكنتش أحبك انتى أحب مين يا قلبى... وائل براخمه: وبعدين انتى طلعتى عينى لغاية ما اتجوزنا... فإرحمينى بقى شويه....
نهى ضحكت جامد وبغلاسه: تؤتؤ... لسه شويه يا باشمهندس....
وائل بغيظ: تصدقى أنا غلطان... كان المفروض ماروحكيش البيت واخدك على بيتنا و أقل أدبى معاكى....
نهى بشهقه وخضه: هاه!!! أنت بتقول إيه!!! عيب كده....
وائل ضحك جامد أوى عليها: ههه!! خلاص خلاص بلاش تتخضى كده...
نهى بغيظ منه: لأ بقى... انا لازم استعدلك كويس....
وائل برخامه: وهتستعدى إزاى يا حلوه؟؟؟
نهى إبتسمت بمكر: بكره تشوف بنفسك يا باشمهندس... هتمرنلك عشان ابقى مستعده....
وائل بضحك: هو أنتى ما تعرفيش؟؟؟
نهى بإستغراب: معرفش ايه؟؟؟
وائل بإبتسامه: ماتعرفيش إنى كنت بطل فى الملاكمة....
نهى بإعجاب: لأ خالص!! أنا أول مره اعرف إنك كنت بتلعب رياضه...
وائل بحب: اديكى عرفتى بقى....
نهى ضحكت جامد أوى: طيب كده حلو أوى.... انا كده يبقى عندى مدرب خصوصى ولا إيه!!!
وائل بضحك: هههه اه طبعا يا قلبى... عندك مدرس أسبانى خصوصى، ومدرب بوكس خصوصى... وائل برخامه: بس خلى بالك... كده الحساب يجمع وهيكتر...
نهى بهزار: اخص عليك يا ليلو... هتاخد منى فلوس....
وائل بحب: تؤتؤ... مش فلوس يا قلبى... هاخد منك حاجه تانيه.....
نهى بغيظ: مش هتبطل قلة أدب.....
وائل ضحك من قلبه كله: هههههههه، انتى فهمتى إيه بالضبط.... اه يا شقيه أنتى..... انا مش قصدى إللى فى دماغك ده....
نهى اتكسفت أوى منه، وقالتله بغيظ: وائل روح بيتك بقى... انا عايزه أنام...
وائل عرف أنها اتكسفت، فحب يخرجها من إللى حصل: حبيبى فى إيه بس، كنت بهزر معاكى يا قلبى...
نهى أتضايقت من إللى حصل: مافيش حاجه حصلت، بس انا فعلا مرهقه...
وائل بإبتسامه: نهى! مش قصدى ارخم عليكى... بس يا حبيبى بلاش تخدى الموضوع قفش كده... حقك عليا يا قلبى.... خلاص فكيها شويه بقى....
نهى برخامه: عايزنى افكها... اممم! سبنى افكر شويه...
وائل بغيظ: تفكرى.... لأ خلاص ما تفكريش كتير.... يدوب ربع ساعة واكون قدام بيتك واخدك على بيتنا بالقوة الجبرية....
نهى بضحك: هههه لأ خلاص وعلى إيه... انا هفكها بكرامتى أحسن....
وائل ضحك جامد: ايوه كده... ناس مابتجيش غير بال....
نهى بسرعه قطعت كلامه: غير ب إيه يا باشمهندس؟؟؟؟
وائل بضحك: غير بالحب يا قلبى....
نهى ضحكت، وبعدين قالتله بحب: حبيبى نظامك إيه انهارده؟؟؟
وائل بهدوء: اممم!! ولا حاجه.... وائل فكر شويه، وبعدين قالها: إيه رأيك لو نخرج نتغدى مع بعض؟؟؟
نهى بإبتسامه هاديه: طيب إيه رأيك لو تتغدى معانا إنهارده....
وائل إبتسم: طيب مين إللى هيعمل الغدا... انتى ولا ماما؟؟؟
نهى بضحك: اممم... مش عارف...
وائل ضحك جامد: مش عارف!!! هههه ... طيب مين إللى يبقى عارف؟؟؟
نهى بهزار: يمكن تكون ندى... او ندى.... إيه رأيك؟؟؟
وائل بضحك: طيب هتعمل إيه.... عشان بس ابقى عامل حسابى...
نهى بحب: تحب تتغدى إيه يا قلبى...
وائل اخد نفس جامد وخرجه بالراحه: أقولك بس متقوليش لنهى؟؟؟
نهى بحب: أطمن مش هقولها حاجه... دى اصلا بت رخمه وغلسه، قول قول... مش هفتن عليك....
وائل ضحك جامد أوى، شويه وقالها بغلاسه: اكلك انتى يا بطه.....
نهى اتوترت وبغلاسه: ولا... بطل رخامه بقى....
وائل ضحك أوى وقالها: طب خلاص... اى حاجه من إيديك يا قلبى...
نهى إبتسمت بهدوء: تمام... هتيجى على إمتى كده؟؟؟
وائل بص فى ساعته وقالها: على ٦ ونص... كويس...
نهى بإبتسامه: تمام!! ماتتأخرش... نهى بهزار: لحسن هتلاقينى أكلت الأكل كله....
وائل ضحك جامد أوى: اه يا طفسه.... مش هتسبيلى حاجه يعنى....
نهى براخمه: تؤتؤ... ولا رزايه يا حبيبى....
وائل بضحك: ماشى يا نهى... أما أشوفك بس... اصبرى عليا....
نهى بحب: وائل....
وائل بحب: نعم حبيبى...
نهى بلعت ريقها بصعوبه: بحبك أوى...
وائل قلبه دق جامد أوى وأتوتر، غمض عينه وبيحاول يجمع نفسه، وبعدين فتحهم وبتوتر: قولتى إيه.....
نهى بحب: بحبك أوى أوى أوى....
وائل ضربات قلبه بتزيد واختفت كل قدرته على التحمل أكتر: وأنا بعشقك أوى أوى أوى وبموت فيكي يا روحى... حبيتك، وبحبك وهفضل أحبك... يا عمرى أنا...
نهى بحب: لا إله إلا الله....
وائل بحب: محمد رسول الله...
نهى قفلت مع وائل، وكل واحد فيهم راح لدنيا تانية خالص....
منار مش قادره تستوعب كل إللى حصل قدامها، راحت لفادى فى المكتب وبضيقه: فادى...
فادى بصلها بهدوء: خير يا منار... فى إيه...
منار بتوتر: بص موضوع وائل ونهى خلاص إنتهى... بس...
فادى بإستغراب: بس إيه... فى إيه؟؟؟
منار قعدت قدامه: بص، عيزاك تشوف حل لوضع جيهان ده... عشان خاطر رنا... انت بنفسك شفت جيهان بتعمل إيه، ف مبالك ببنتك....
فادى بصلها جامد أوى وهو ساكت، شويه وبغضب قالها: أنتى عارفه معنى كلامك ده إيه؟؟؟ ها!! عارفه معناته إيه... معنى كده إنك عارفه كويس إن نهى ما غلطتش فى جيهان ولا فيا... فادى بعصبية: نهى دافعت عن نفسها وعن بنتك يا هانم...
منار بتوتر: ماشى يا فادى.... خلاص خلصنا من الموضوع ده بقى... كفايه....
فادى بنرفزه: لأ مش خلاص يا منار... ومن هنا ورايح ملكيش دعوه خالص بنهى و منى أنتى فاهمه...
منار بعصبيه: يا فادى خلاص بقى، الموضوع إنتهى، وانت ونهى اتصافيتوا فخلاص بقى...
فادى بنرفزه: مش عايز أسمع كلمه زيادة عن جيهان تانى أنتى فاهمه....
منار بغضب مكتوم: حاضر يا فادى...
فادى سابها وخرج...دخل أوضته وغير هدومه و نزل اخد عربيته....
نهى قالت لمنى إن وائل هيجى على الساعة ٦ ونص عشان يتغدى معاهم...
منى بإبتسامه: هتعمليله الرز إللى بيحبه؟؟؟
نهى إبتسمت: لأ.... نغير بقى إنهارده... ده اول مره يتغدى عندنا ولا إيه يا ماما...
منى بحيره: طيب هتعمليله إيه؟؟؟
نهى إبتسمت: هتبقى مفاجأة ليه....
نهى و منى دخلوا يحضروا الغدا... ومحمد كلم وائل وعرف منه إنه معزوم عند نهى وقاله على شويه حاجات يخدها معاه وهو رايحلهم.....
الوقت عدى و وائل راحلهم فى المعاد، كريم فتحله الباب...
كريم بإبتسامه: إزيك يا عريسنا.... اخبارك إيه....
وائل بإبتسامه: الحمد لله رب العالمين... بخير...
وائل دخل وحط الحاجه إللى جايبها معاه على التربيزه، وشويه و ندى خرجت وجريت عليه، و وائل اخدها في حضنه أوى: وحشتينى أوى أوى أوى يا قطتى... عامله إيه؟؟؟
ندى بحب: الحمد لله يا بابى...
وائل أول ما سمع الكلمه دى من ندى مقدرش يمسك نفسه، ضمها أوى أوى، وعنيه بقت بتلمع من الدموع إللى حبسها جواه... مسحهم وسألها بحب: مامى فين؟؟؟
ندى ببراءه: جوه...
لحظات و منى خرجت سلمت عليه، شويه وسابته عشان تشوف نهى مخرجتش تسلم عليه ليه لغاية دلوقتى...
كريم قاعد مع وائل و ندى قاعده على حجر وائل وبيتكلموا وبيهزروا مع بعض... منى دخلت لنهى لاقتها متوتره و مرتبكه، فمنى بضحك: إيه يا نهى مالك... عامله كده ليه؟؟؟
نهى بتوتر: مالى يا ماما... م..م... مأنا كويسه أهو....
منى بضحك: كويسه... ده وشك ضارب ألوان ليه كده... منى بتغمزلها: ده جوزك يا حبيبتى، مش خطيبك...
نهى بإرتباك: يا ماما أنا عارفه إنه جوزى.. بس....
منى بإبتسامه: بس إيه يا حبيبتى، وبعدين أنتى عامله ف نفسك كده ليه؟؟؟
نهى بصت على نفسها من فوق لتحت و بعدين بصت لمنى: عامله ايه يا ماما... ما أنا كويسه...
منى بإبتسامه هاديه: ايوه... لابسه حجابك ليه؟؟؟
نهى بتتنيحه: ها!! عشان.... عشان....
منى ضحكت جامد، ونهى بغيظ: مش هقلع الحجاب يا ماما... مش هقلعه...
منى بإستغراب: ليه يا نهى!! عادى يا حبيبتى... ده جوزك فاهمه يعنى إيه...
نهى بغيظ اكتر: مع إيقاف التنفيذ يا ماما...
منى بتعب: أنتى حره... بس يالا عشان جوزك الغلبان ده جوعناه معانا...
نهى إبتسمت: طيب أخرجى انتى وانا هخرج وراكى...
منى سابتها وخرجت، ونهى بصت لنفسها فى المرايا، وبعدين خرجت لهم...
نهى خرجت وهى متوتره وباصه فى الأرض.. و وائل أول ما شفها إبتسم أوى وقام وقف ومد إيده يسلم عليها وهى رفعت عنيها وبتوتر سلمت عليه...
وائل بحب ومن غير ما ياخد باله ان كريم قاعد معاهم: إزيك يا قلبى وحشتينى....
نهى بصتله بإحراج وبلعت ريقها بالعافيه وشاورت بعنيها على كريم، وائل بص مكان ما كريم قاعد واتوتر وارتبك، وكريم إبتسم أوى وحمحم: إحم! طب هروح اشوف ماما لو عايزه حاجه، كريم قال لندى: تعالى معايا يا ندى نشوف ناناه...
ندى راحت مع كريم المطبخ، و وائل بص لنهى بإحراج: شفتى وصلتى بيا لفين...
نهى ضحكت جامد عليه وبهزار: انت فعلا مجنون...
وائل سرح فى ضحكتها إللى من قلبها، وقالها بحب: مجنون بيكى يا روحى أنا...
نهى بغلاسه: وبعدين معاك بقى، ممكن كريم يخرج فى اى وقت... خلى بالك...
وائل برخامه: ماشى يا نهى... صبرك عليا لما تبقى فى بيتى...
وهم قاعدين سمعوا جرس الباب بيخبط... فوائل بإستغراب: حبيبى! أنتو مستنين حد؟؟؟
نهى بحيره: لأ... هروح اشوف مين على الباب...
يا دوب لسه هتقوم لقت وائل مسكها من ذراعها بقوه، وبحزم: تروحى فين يا هانم... مش انا موجود... يبقى ماتفتاحيش الباب وفى رجاله فى البيت.. سامعه؟؟؟
نهى بإستغراب: ايوه يا حبيبى... بس...
وائل بنرفزه: بس إيه!! أنتى تقعدى هنا وأنا او كريم نفتح الباب...
لسه وائل هيقوم، لقى كريم فتح الباب...
كريم بإبتسامه: أهلا يا اونكل فادى... اتفضل....
فادى سلم على كريم وندى ودخل لقى وائل قاعد مع نهى، وهم الأتنين قاموا يسلموا عليه...
وائل بإبتسامه: إزيك يا سيادة المستشار...
فادى إتفاجأ بوائل عند منى بس إبتسم وفرح من جواه... يمكن بعد إللى حصل مع منار حس قد إيه انه فعلا جه على نهى كتير... او يمكن اتأكد إن نهى الكل بيجى عليها من غير ما هى تعمل حاجه...
فادى سلم على وائل ونهى وباركلهم، وقعد معاهم.. منى إستغربت لما عرفت إن فادى جه، بس إبتسمت وحست أنه ممكن يكون حس بغلطه و جه عشان يهد اى خلاف ما بينهم... منى خرجت سلمت عليه بحب، ونهى قامت عشان تساعد منى فى توضيب السفره...
نهى و منى جهزوا السفره وحطت الأكل، وكلهم قعدوا يتغدوا مع بعض...
طبعا ندى فضلت قاعده جنب وائل، ومش عايزه تسيبه خالص، وائل إتفاجأ بالأكل إللى موجود على السفره، فقال بحب: تعبتوا نفسكوا أوى يا مدام منى ليه كده بس...
منى بحب: لأ تعب ولا حاجه يا وائل... ده انت زى كريم ونهى، وبلاش بقى مدام دى...
وائل بصلها بحب: تسلم إيدك يا ست الكل ربنا ما يحرمنا منك أبدا..
نهى إبتسمت وأمنت على كلامه...
منى كانت عامله، صينية جلاش حادق ومكرونه بالبشامل، وشربه لسان عصفور، وبفتيك، وملوخية خضره، ورز عادى وسلطات وشيبسى...
وائل بإبتسامه: الله!! وحشنى أوى الأكل البيتى ده... وائل بمكر: بس يا ترى نهى عامله إيه منهم... أكيد مش كله صح؟؟؟
نهى ضحكت جامد هى و منى وقالتله: يعنى لازم تحرجونا يعنى... كل الأول وبعدين أقولك
وائل ضحك جامد: شكلك كده عملتى السلطه بس صح...
نهى بضحك: هقولك بعدين...
وائل إبتسم، و بدأ بالمكرونه الأول وعجبته جدا، وقال: تسلم إيدك يا ست الكل... دى من إيدك أنتى...
كلهم ضحكوا عليه، و وائل بيكمل أكل وعجبه جدا كمان الجلاش... وائل كان بقاله كتير مش بياكل اكل بيتى فكان بياكل بحب وهو مستمتع بكل حاجه، بحب نهى وأهلها، واهتمامهم.... خلصوا الأكل ونهى و منى وكريم بيلموا السفره و فادى قاعد مع وائل وندى...
نهى عملتلهم الشاى والحلو وكلهم قعدوا مع بعض... شويه و فادى سأل وائل بإهتمام: ها يا باشمهندس... هتعملوا إيه دلوقتى؟؟؟
نهى مافهمتش سؤال فادى بس وائل إبتسم بهدوء: بفكر كده إننا ننزل بكره ان شاء الله تعالى، نتفرج على أوض النوم لندى ولينا، ولو فى اى حاجه ناقصه نجبها بحيث ان ف خلال شهر او شهر ونص نعمل فرح كده على الضيق... وائل بص لنهى لقاها ماسكه إيديها وباين عليها أوى إرتباكها وتوترها... وائل إبتسم عليها، ف فادى قاله: تمام على بركه الله....
القعده نوعا ما كانت ظريفه وخفيفه، مفيش قلق ولا توتر... وائل قعد معاهم شويه وبعد القهوه والساقع والحلو... وائل قال لنهى: نهى! هعدى عليكى بكره ان شاء الله تعالى على الساعه ١٠، عشان نروح الشركه مع بعض، وبعد ما نخلص شغل هنروح نتفرج على الحاجه، إتفقنا؟؟؟
نهى بإبتسامه: إتفاقنا...
وائل إبتسم وجه يقوم فمنى بحب: ما لسه بدرى يا وائل... خليك معانا شويه...
وائل بهدوء: معلش يا ست الكل... يدوب أستعد عشان الشغل، ونهى كمان ترتاح شويه، عشان مشوار بكره...
وائل سلم عليهم، وراح عند الباب ويدوب فتح الباب، ونهى راحت وراه، و بحب: وائل.....
وائل بصلها بحب ولهفه، وعينه فى عنيها: نعم حبيبى....
نهى غمضت عنيها واخدت نفس جامد وخرجته بالراحة، و فتحت عنيها: هستنى منك تليفون اول ما توصل البيت...
وائل إبتسم ومسك إيديها بحب، وباسها بمنتهى الرقه والحنيه، وحطها على قلبه إللى بيدق جامد أوى، ونهى حست بدقة قلبه دى، وقلبها كمان كان بيدق بسرعه أوى، و وائل بحب: حاضر يا قلبى أنا...
وائل ونهى فضلوا يبصوا لبعض وهم ساكتين، بس عنيهم بتقول كل حاجه... وائل حس بحد طالع على السلم فساب إيديها غصب عنه، وطلب منها إنها تدخل وتقفل الباب، وهو هيكلمها اول ما يروح...
نهى قفلت الباب، وإحساسها ما يتوصفش، كانت فرحانه ومبسوطه ومكنتش عايزاه يمشى ولا كانت عايزه تسيبه يروح....
وائل نزل وركب عربيته و إحساسه مش أقل منها بالعكس هو لو يطول كان خدها فحضنه ومحدش كان يقدر يخرجها من حضنه أبدا....
فادى كان قاعد مع منى وكريم ونهى قعدت معاهم بعد وائل ما مشى.. ف فادى بإبتسامه هاديه: نهى!! وائل باين عليه بيحبك أوى وبيحب ندى كمان، حافظى عليه، وحطيه فعنيكى الأتنين...
نهى بصتله بإستغراب هى و منى... بس معلقتش على كلامه.. هى فهمت انه بيحاول يصلح معاها، عشان كده محبتش تدخل فى اى حوار معاه....
منى إبتسمت وبهدوء: ربنا يهدى سرهم، و يتمملهم بالخير...
كلهم أمنوا على كلامها، و فادى جه يقوم فمنى قالتله بهدوء: إستنى يا فادى شويه...
فادى بإبتسامه: معلش يا منى خليها وقت تانى، أنا جتلكم على غفله كده...
منى حست بأن فيه حاجه وجعاه، وعشان كده راحلهم فجأة، فرددت بحب: ده بيتك يا فادى... تيجى فى اى وقت، بس عايزه أتكلم معاك شويه...
فادى مش حابب يتكلم فى حاجه، فبيحاول يتهرب منهم: معلش يا منى وقت تانى... تصبحوا على خير....
كلهم سلموا عليه ومشى...
كريم سابهم ودخل أوضته، و منى بإستغراب لنهى: تفتكرى فى حاجه حصلت عشان فادى يجى بالشكل ده؟؟؟
نهى بحيره: مش عارفه يا ماما، هى حاجه غريبه فعلا، بس حسيت كأنه بيصلح إللى حصل زمان... الله أعلم، بس ده إللى حسيته من كلامه...
منى بهدوء: ربنا يهديه ويهدينا جميعا، منى بإهتمام: المهم... حاولى تنامى شويه عشان عندك مشاوير كتيره بكره...
نهى بإبتسامه: تمام يا ماما، تصبحى على خير....
منى دخلت أوضتها، ونهى كمان، غيرت هدومها، شويه ولقت كريم بيخبط عليها...
كريم بهدوء: نهى!!! أنتى صاحيه...
نهى بحب: اه يا كريم... تعالى...
كريم دخل وبتوتر: اه !! قوليلى يا نهى... هى حنان تقرب لوائل إيه؟؟؟
نهى إبتسمت أوى على سؤال كريم، وبحب: بص يا سيدى، حنان تبقى......
نهى حكت لكريم كل إللى تعرفه عن حنان، بس ماقلتلوش الحوار إللى حصل معاها بخصوص وائل... بعد ما نهى خلصت: دى كل حاجه أعرفها عن حنان....
كريم إبتسم بهدوء: تمام....كريم قام، ونهى بغلاسه: إستنى يا كريم... رايح فين كده...
كريم إبتسم: هنام... تصبحى على خير....
نهى بضحك: وانت من أهله يا حبيبى...
وائل روح البيت، واتصل بنهى، وفضلوا يرغوا مع بعض شويه، وبعدين ناموا...
تانى يوم، وائل عدى على نهى وأخدها وراحوا الشركه مع بعض....
فى الشركه.....
نهى و وائل نزلوا من العربيه ودخلوا الشركه مع بعض وهى حاطه دراعها فى دراعه والأمن والاستقبال سلموا عليهم وباركلهم على جوازهم... نهى إستغربت من كده بس، وائل قالها إن محمد و حنان عرفوهم فى الشركه بجوازهم، وائل اخدها فى الكافيتريا، و كان محمد مجمع الموظفين كلهم فيها... يدوب دخلوا الكافيتريا وكلهم رحبوا بيهم وباركلهم... و وائل شكرهم وصرفلهم نص شهر بمناسبة جوازه، وكمان جابلهم جاتوه وحلويات بالمناسبه دى...
وائل بعد ما خلص معاهم، طلع هو ونهى و حنان ومحمد مع بعض فى الأسانسير ودخلوا مكتبه....
محمد بحب: مبروك يا نهى، مبروك يا وائل، محمد بص لحنان: و عقبالك يا حنان... لما نفرح فيكى أنتى كمان... قصدى بيكى...
كلهم ضحكوا ونهى بصت لحنان بإبتسامه: عقبالك يا حنان... إن شاء الله تعالى عن قريب...
حنان بإبتسامه هاديه: تسلمى يا نهى.. قصدى يا مدام نهى....
نهى بصتلها بزعل: حنان أنا نهى وبس... من غير ألقاب... مافيش حاجه اتغيرت... ماشى...
حنان بإبتسامه حب: ماشى يا نهى... حنان بصت لوائل: أنا هخرج بقى اشوف إيه إللى ورايا... عن إذنكوا...
وائل إبتسم وهز دماغه بالموافقه، وهى خرجت وسابتهم، محمد بصلهم بجديه: بصوا بقى أنتو تعملوا حسابكم بعد بكره إن شاء الله تعالى معزومين على الغدا عندى فى البيت.. محمد بص لنهى وبجديه: و مسمعش كلمه لأ مش هينفع... ماشى...
نهى ضحكت و وائل بإبتسامه: ماشى يا عم أنت، بس المهم مايكونش أكل جاهز... انا خلاص معدتى أخدت على الأكل البيتى... وائل بص لنهى وغمزلها... ونهى إبتسمت بكسوف ودارت وشها بإيديها... ومحمد ضحك: لأ أطمن... المره دى ناديه حالفه لتدوق نهى من إيديها... محمد بهزار: باينهم كده هيعملوا علينا حزب... ربنا يستر...
وائل و نهى و محمد ضحكوا جامد، ونهى بتقوله بهزار: خلى بالك يا باشمهندس... إللى يجيى على الولايا مابيكسبش...
ضحكوا كلهم... و محمد قالها بإبتسامه: ماشى يا ستى... ربنا يسترها علينا... محمد بإبتسامه هادية: نهى... أنتى دلوقتى فى مقام مرات أخويا... و بعتبرك أختى... ف مافيش داعى للألقاب ما بينا، إتفقنا....
نهى بصت لوائل بسكوت، و وائل إبتسم وفرح من جواه أوى، لأنه فهم من نظرة عنيها و سكوتها هى عايزه توصل لأيه... نهى من نظرتها ليه كأنها بتستأذن وائل إنها ترفع الألقاب ما بينها وبين محمد، فوائل إبتسملها وهز دماغه بالموافقه، وهى فهمته إنه موافق، فبصت لمحمد وقالتله بهدوء: إتفقنا يا محمد...
محمد إبتسم: تمام كده، هسيبكوا أنا بقى واروح اشوف شغلى... يلا سلام....
نهى و وائل سلموا عليه، ومحمد خرج وقفل الباب وراه....
وائل لف لنهى وقرب منها وعينه فعنيها وبحب: مكنتش متخيل كل إللى بيحصل ده... بجد ربنا يباركلى فيكى ويقربك منى بقى... وائل مسك وشها بإيديها الأتنين وباسها فى رأسها، ونهى إستسلمت لده، ولسه وائل هيقرب أكتر، نهى حمحمت: اححم!! عندى شغل يا باشمهندس...
وائل بصلها بغيظ، إنها خرجته من المود إللى هو كان لسه هيدخله: بت!! مش ملاحظه إنك بقيتى رخمه بزياده...
نهى بعدت عنه وهى بتضحك: تؤتؤ.... لسه شويتين تلاته كده يا باشمهندس...
وائل بتنهيده: ربنا على الظالم والمفترى يا شيخه.... وائل بغلاسه: نعم!!! عايزه إيه سيادتك دلوقتى؟؟؟؟
نهى ضحكت جامد: هروح اشوف شله الأنس و هشوف هقولهم إيه....
وائل ضحك جامد أوى: هههه تصدقى لايق عليهم.... طب والله حلوه....
نهى بهزار: أضحك أضحك.... مهو أنا إللى فى وش المدفع....
وائل قرب منها وبجديه: أنا سبق وقولتلك مش هسمح لحد يمس شعره واحده منك... ولو هتطلب معايا أقتل هقتل... فاهمه....
نهى إبتسمت بهدوء: الموضوع أبسط من كده يا وائل... والوضع دلوقتى أتغير...
وائل إبتسم: فعلا الوضع إتغير... عشان كده مش عايزك تنسى إنك دلوقتى حرم وائل فهمى... صاحب الشركه دى، وكلهم دلوقتى بيشتغلوا عندك لأن من يوم جوازنا ودى شركتك يا نهى... فاهمه...
نهى بإبتسامه هاديه: أنت عارف كويس إن الموضوع ملوش دعوه بالماديات يا وائل... المهم يا حبيبى... وائل إرتبك من أول ما نهى قالتله كده، وغمض عنيه ونهى قربت منه ومسكت ايده، وهو فتح عنيه و بيبص فى عنيها وقلبه بيدق جامد أوى، وهى بإبتسامه هادية وحب: هنزل دلوقتى تحت، ولما تخلص شغلك عدى عليا عشان نروح نتفرج على الحاجه... داكور يا حج؟؟؟
وائل إبتسم أوى وضحك جامد: هههههه تصدقى حلوه أوى الكلمه دى... لأ بجد عجبتى....
نهى إبتسمت أوى: خلاص هبقى اقولها لك على طول... نهى وهى خارجه من مكتبه: سلام يا حج....
وائل ضحك جامد وهى سابته وخرجت....
نهى نزلت على مكتبها وهى متوتره من إللى هيحصل، بس إفتكرت كلام وائل ليها إنها دلوقتى مراته، و تعتبر صاحبه الشركه، فبقى ليها مصدر قوه تتعامل مع شله الأنس...
نهى دخلت مكتبها وكلهم قاموا وقفوا إحترام ليها، وهى بإبتسامه هادية: ليه وقفتوا كده، عادى يا جماعه أنا لسه زى م انا...
إيمان بتوتر: اا! آه! بس أنتى دلوقتى مرات صاحب الشركه....
نهى بإبتسامه هاديه: ده مش هيغير حاجه يا إيمان... متكبريش الموضوع...
خالد بتوتر وبلع ريقه بالعافيه: مبروك يا أستاذه نهى...
نهى بجمود: الله يبارك فيك يا خالد... عقبالك...
خالد اتوتر و بقى مش قادر يتكلم بنص كلمه... عيسوى بفرحه: الف الف مبروك يا نهى... ربنا يسعدك ويفرحك...
نهى بإبتسامه هاديه: الله يبارك فيك يا عيسوي... ويلا بقى شد حيلك كده... وانقل الدبله دى من اليمين للشمال بقى... ولا إيه...
عيسوى بضحك: هههه دعواتك معايا بقى... أنتم السابقون ونحن اللاحقون إن شاء الله تعالى....
نهى وعيسوى ضحكوا من قلبهم... وإيمان وخالد كانوا متغاظين ومفروسين من إللى حصل... نهى إستأذنت منهم عشان تروح لعلى... راحت لعلى وسلمت عليه، وهو فرح ليها أوى وباركلها بكل حب ودعالها بالخير....
يا دوب فات ساعتين ثلاثه، و وائل عدى على نهى وأخدها ونزلوا اتغدوا بره، و راحوا يتفرجوا على الأوض والحاجات إللى نقصاهم....
وفعلا اختاروا الحاجه و وائل اتفق مع المحل عشان يودوا الحاجه البيت...
وائل وصل نهى للبيت بس مرديش يطلع معاها، وقبل ما نهى تنزل من العربيه، وائل قالها بإهتمام: نهى... خدى ده خليه معاكى....
نهى بصتله بإستغراب: إيه ده يا وائل... أنا هعمل بيه إيه؟؟؟
وائل بإبتسامه: يا حبيبى، خليه معاكى عشان لو إحتاجتى تجيبى حاجه ليكى او لندى....
نهى أخدت نفس جامد وخرجته بالراحة: وائل أنا مش محتاجه للفيزا دى... انا الحمد لله معايا فلوس، وكمان انت بتحطلى مرتبى فى الفيزا بتاعتى فمش محتاجه للفيزا بتاعتك...
وائل بهدوء: نهى.... مرتبك حاجه، والفيزا دى حاجه تانيه... أولا من يوم ما اتكتب كتابنا وانتى بقيتى مراتى فأنتى و ندى مسئولين منى... فمرتبك مش عايزك تصرفى منه حاجه... كل طلباتك انتى وندى أنا ملزم بيها...
نهى بضيقه: يا وائل مش عيزاها.... أنا لو إحتجت لحاجه هقولك... بس أنا مش عايزه اخد منك حاجه، والحمد لله رب العالمين ماما و كريم مش مخلين محتاجين لحاجه...
وائل بلع ريقه بصعوبه، وحس من جواه إن الموضوع ده عامل حساسيه جدا لنهى، فبهدوء: يا حبيبتى، ربنا يباركلك فيهم... بس مابقاش ينفع دلوقتى... أنتى ملزمه منى يا نهى... وائل أبتدى يجمد شويه فى كلامه معاها: بمزاجك او غصب عنك مش هسمحلك ولا هسمح لحد يصرف على مراتى وبنتى يا نهى... سامعه... أنتى مراتى وندى بنتى... بالذوق بالعافيه بنتى... فاهمه....
نهى بصتله بإرتباك، وحست بالوجع من كلامه، لأن هو بيعتبر ندى دلوقتى بنته، ولو هى رفضت كأنها بترفض إنها تكون بنته او هو يبقى أبوها... فنهى بكسوف: حاضر يا وائل... إللى تشوفه...
وائل إبتسم: أيوه كده... بطلى عند شويه... تعبتى قلبى معاكى...
نهى بإبتسامه: سلامة قلبك يا قلبى أنا....
وائل إبتسم، ولسه هيقرب، نهى بغلاسه: سلام يا حج....
وائل ضحك جامد: ماشى يا نهى... الصبر الحلو...
نهى إبتسمت وسابته وطلعت....
عدى يومين... ونهى و وائل راحوا عزومة محمد...
نهى و وائل وندى دخلوا وسلموا علي محمد وناديه وأولادهم" آدم و وأسر "....
آدم ٨ سنين، وأسر ١٠ سنين... ندى دخلت تلعب معاهم... ونهى وناديه ومحمد و وائل قاعدين مع بعض....
شويه وناديه أخدت نهى على المطبخ، وبتقولها:......
يتبع......
