للنصيب رأي أخر《جمود أنثى》
الحلقة ( ١٤ )..
محمد بصله بغل وغضب: ده مش مبرر، وبعدين عايز افهم انت عامل تليفونك ليه على وضع عدم الإزعاج؟؟
وائل بتنهيده و بإبتسامه : بص هقولك بس ما تتنرفزش.. محمد اخد نفس وشاورله برأسه انه مش هيتنرفز.. فوائل كمل كلامه: انا كنت بقرأ رواية من على التليفون واندمجت فيها، ومحستش بنفسى انى عملت التليفون الوضع ده، أو انى فضلت صاحى لغايه دلوقتى، وبصراحة معرفتش انام او اسيب التليفون من إيدى عشان كنت عايز اخلصها..
محمد بصله بعصبيه وراح قايم من غير ما يتكلم وجه يخرج من الباب، فوائل راحله بسرعه ومسكه من دراعه: يا محمد اهدى بس شويه، والله مش قصدى انى اعملك قلق او اخضك..
محمد بصله وبحزن: انت مش عارف انت عملت فيا ايه، كل الأفكار السوده الى موجوده فى الدنيا دى تخيلتها حصلتلك، محمد بيكمل بزعل: انت بالنسبالى اكتر من أخويا يا وائل، انت مش صاحبى وعشرة عمر وبس، لو كنت اخويا من لحمى ودمى ما كنتش هخاف ولا هقلق عليه بالشكل إللى قلقت عليك إنهارده..محمد بص فى الأرض ورجع بصله بلوم: ايوه عارف انى كتير بتدخل فى حياتك بشكل يضايقك بس من باب الأخوه والمحبه والقلق والاطمئنان عليك، لكن مش قصدى ابدا انى اضايقك..
وائل بصله بحزن: انا آسف يا صاحبى، ما كنش قصدى، اعمل كده فيك، حقك عليا..
محمد بصله وابتسم واخده بالحضن: المهم انك كويس وبخير، واوعى تعملها تانى فاهم..
وائل حضنه جامد: فاهم يا صاحبى.. وائل أخد محمد ونزلول لتحت ومحمد بيسأله بإهتمام: ممكن أفهم بقى من امتى وسيادتك بتقرأ روايات؟؟ وايه هى الروايه إللى تعمل فيك كده؟؟
وائل ضحك جامد: لوقلتلك توعدنى ماترخمش؟؟
محمد اخد نفس جامد ومسح وشه بإيده: أتكلم على طول بدل ما اشلفطلك وشك ده..
وائل ضحك جامد: طيب طيب اهدأ كده وروق... بص يا سيدى هى روايه كانت نهى قالتلى عليها لما كنت عند فادى اسمها العنيد، وما تخيلتش انى هندمج فيها بالشكل ده..
محمد بصله بغيظ: بقى هو الموضوع كده، عشان الهانم قالتلك على روايه تقوم انت تعمل فيا كل ده..
وائل بهدوء: والله ما تخيلت أن كل ده هيحصل..
محمد اخد نفس جامد وخرجه: وياترى سيادتك خلصت الروايه ولا لسه؟؟
وائل بتعب: كنت فى اخر فصل فى الجزء الأخير..
محمد بإستغراب: ليه بقى! هو كام جزء؟
وائل بإبتسامه: ٤ أجزاء، بس بصراحه طلعت بنت لذينه، الروايه بجد تحفه، ما كنتش متخيل انى فعلا هقرأ روايات، انت كمان لازم تقرأها هتعجبك يا صاحبى..
محمد دور على اى حاجه جنبه فلقى مخده صغيره راح رميها فوشه، و وائل ماكنش مدى خوانه فجت فى عينه..
وائل بهزار: انت يلا بتردهالى !!!
محمد بغيظ : اه عشان انا مفروس ومتغاظ منك، ولو اطول اعمل فيك اى حاجه كنت هعملها..
وائل بهزار: قلبك ابيض بقى يا صاحبى، بس والله هتعجبك...
محمد بضحك: ماشى يا عم الرومانسى، هنيالك، محمد بيكمل بجديه: المهم! هتروح الشركه ولا هتريح انهارده؟
وائل بتعب: لا هريح، انا اصلا ما نمتش من إمبارح وتعبان جدا..
محمد بتريقه: اه طبعا ما انت عملى فيها البيه الرومانسى..
وائل بغيظ: ما قولنا آسفين يا صلاح! بطل غتاته ورخامه بقى...
محمد بتعب: ماشى انا كمان هروح البيت، اريح اعصابى من إللى شفته منك..
وائل قام ووقف قصاده: ما تزعلش منى يا محمد....
محمد بحب: ولا يهمك، بس نصيحه منى، أتجوز عشان انا ارتاح منك، وتكون مسئول من مراتك مش منى..
وائل ضحك جامد هو ومحمد، وقاله: ماشى يا خويا..
محمد بجديه: انا كلمت بيدرو واتفقت معاه ان الاجهزه هترحله اول الشهر الجاى، شوف هنحجز إمتى وبلغنى عشان المره دى هسافر معاك..
وائل بإبتسامه: بكره هخلى حنان تشفلنا حجز قبل الشحنه ما توصل بيومين..
محمد: تمام كده! همشى انا بقى، سلام يا صاحبى..
وائل: سلام..
محمد مشى و وائل طلع يكمل الروايه و معرفش ينام غير لما خلصها.
بعد ما خلصها إبتسم وقال لنفسه" انا لو دخلت معاها فى اى تحدى هخسر قدامها، هى كان عندها حق لما قالتلى، هتنسيك العالم باللى فيه، يا ترى يا نهى إللى عايز يوصلك يعمل إيه "؟؟؟
وائل من كتر التعب ما حسش بنفسه وداها نوم..
نهى روحت وهى مقرره انها مش هتسأل على وائل، ولا هتطلعله تانى، بغض النظر عن إللى خلاه مايجيش الشركه بس هى قررت تبعد عنه على قد ما تقدر، لأنها حست انها ممكن تتعلق بيه او مشاعرها تخونها..
تانى يوم فى الشركه...
وائل طلع الدور الثالث، ودخل الhr لقاهم كلهم موجودين، سلم عليهم، وبص لنهى بإبتسامه: ازيك يا نهى! حمدالله على السلامه.
نهى بتوتر: الله يسلمك يا باشمهندس..
وائل بص فساعته ورجع بصلها،وبهدوء: لو سامحتى عدى عليا فى المكتب كمان نص ساعه..
نهى بصتله بإستفهام واستغراب : خير يا باشمهندس! فى حاجه حصلت؟؟
وائل بصلها بتحدى: لما تيجى هتعرفى..
وائل سابهم وطلع على مكتبه، وسبهم في حالة إستغراب.. وخالد بص لنهى بإستفهام: هو فى ايه؟
نهى بصتله بحيره: معرفش! انا زى زيك، على العموم كلها نص ساعة واعرف..
وائل طلع على مكتبه وحنان استقبلته بإبتسامه: حمدلله على السلامة يا باشمهندس، أجازه سعيده..
وائل بإبتسامه: الله يسلمك يا حنان..
وائل دخل مكتبه وحنان وراه بشويه ملفات وحتطهم على مكتبه، إللى اول ما شفهم قالها بخضه: ايه ده يا بنتى، بالراحه عليا شويه، مالك داخله حاميه عليا كده ليه..
حنان بهدوء : بص بقى يا باشمهندس، انت غبت إمبارح وده شغل متاخر ولازمن ولابد انك تأشر عليهم، لأن الباشمهندس محمد مشى إمبارح، ومش هيجى انهارده..
وائل تنح: نعم! هو مش هيجى إنهارده!
حنان بإبتسامه: اه! هو كلمنى إمبارح وقالى هو مش هيجى إنهارده، وأنك لازم تمضى على الشغل ده..
وائل بهدوء: ماشى يا ستى، حاضر، همضيهم، بس لو سمحتى عايز عم جمعه يعملى فنجان قهوة مظبوته..
حنان بتتنيحه: ها! قهوه لحضرتك! ده من إمتى؟؟
وائل ضحك على شكلها: هههه! مش مهم من إمتى، المهم عايزها..
حنان بإستغراب: طيب...
حنان خرجت، و بلغت عم جمعه بطلب وائل... لحظات و مسك تليفونه وبيتصل...
وائل: الو.. ازيك يا أستاذ سامى! عامل ايه؟
سامى: أهلا اهلا! تمام الحمد لله، إزيك يا باشمهندس، أخبارك ايه؟؟
وائل: بخير الحمد لله، ها احنا على معدنا ان شاء الله يوم الجمعه، انا بأكد على حضرتك أهو، و هكلم الأستاذ فادى وهأكد عليه، وائل أبتسم: و هبلغ الاستاذه نهى كمان، ومش هقبل اى أعذار..
سامى بإبتسامه : انا مش عارف اقولك ايه بصراحه، بس انا لسه ما بلغتش منى ومش عارف ظروفها ايه..
وائل بتأكيد: لا كده مش هينفع! انا خلاص عملت حسابى، و ياريت تيجوا من بدرى عشان الاولاد تغير جو وينزلوا حمام السباحة، واحنا كمان..
سامى بحيره: والله انا مش عارف اذا كانت منى هتعرف تيجى ولا لأ، عشان كريم..
وائل بإهتمام : لو كريم مش هيعرف يجبهم، انا ممكن اعدى عليهم، وانت تجلنا على هناك ونطلع ورا بعض..
سامى بإبتسامه: طيب هكلم منى وابلغها..
وائل بإبتسامه: تمام! وانا برده هأكد على نهى..
سامى: تمام، سلام يا باشمهندس
وائل: مع السلامه..
وائل قفل مع سامى، وسند ظهره على الكرسى وحط ايده على راسه بإسترخاء وغمض عنيه، شويه والباب خبط، وهو اتعدل كانت نهى، دخلت شاورلها تقعد قدامه، واتصل بحنان وطلب منها تبلغ عم جمعه يخليهم ٢ قهوه..
نهى بصتله واستغربت من تصرفه بس معلقتش، وفضلت ساكته..
هو قفل مع حنان، و بص لنهى بإبتسامه:
طمنينى على إيدك! عامله ايه دلوقتى؟
نهى إبتسمت: تمام الحمد لله، بقت كويسه عن الاول، بس مش بقدر أشيل بيها حاجات كتير..
وائل لسه محتفظ بإبتسامته: مع الوقت هتخف، بس ما تحمليش عليها كتير.. وائل بيكمل كلامه بود : طمنينى على ندى؟؟
نهى : الحمد لله احسن برده..
شويه وقام خرج بره مكتبه، ونهى بصتله بذهول وتعجب، وهو قعد قصدها على الكرسى..نهى مش قادره تفهم ومفيش اى حاجه فى دمغها تفكر فى تصرفه ده..
وائل بصلها بإبتسامه: أعمل فيكى إيه، تقدرى تقوليلى؟!
نهى بصتله بإستغراب: انا مش فاهمه حضرتك بتتكلم عن ايه؟! ممكن تفهمنى او توضحلى اكتر؟؟
وائل بإبتسامه ورفع ايده بإستسلام : انا بعترفلك، انى بخسر اى تحدى قدامك، ف قوليلى اعمل فيكى ايه؟! وائل بيكمل كلامه بود: انا ماجتش الشركه إمبارح بسببك..
نهى بذهول: نعم! بسببى انا؟؟طب إزاى؟؟
وائل بصلها أوى وعنيهم فى عنين بعض، ونهى سكتت لحظات، وبعدين كشرت وفجأة إبتسمت وضحكت جامد، وهو لاحظ تغيرات نظرتها دى كلها، وهو كمان ضحك زيها.. شويه والباب خبط كان عم جمعه جبلهم القهوه وخرج..
وائل رجع بص لنهى لقاها لسه بتضحك فقالها بهزار: عجبك إللى انا فيه؟؟
نهى فضلت مكمله ضحك شويه وبعدين هديت: انا ماتخيلتش انك ما جتش إمبارح بسبب الروايه..
وائل بصلها بإبتسامه: أمال افتكرتى ايه؟
نهى بهدوء: معرفش، بس انا جيت لحضرتك عشان اشكرك على الحاجات إللى عملتها في الشركه، وتفاجأت انك مجتش، بس ماخطرش على بالى خالص بسبب الروايه.. ونهى بصتله فى عنيه بس المره دى كانت عنيها بتلمع هو مش عارف ليه، ولا هى كمان، بس النظره دى كانت كفيله ليه انه يتوتر ويبقى مش على بعضه، وهى بتكمل كلامها: أفهم من كده انها عجبتك لدرجه انك نسيت العالم باللى فيه صح؟؟
وائل بتوتر من نظره عينيها: اا! احم! يعنى بصراحه، ما كنتش متخيل ان كلام مامتك صح..
نهى بهدوء: طيب قولى انا أعمل فيك إيه دلوقتى؟؟
وائل بإبتسامه: مش عارف المفروض انتى تقوليلي هتعملى فيا ايه لان الروايه خلتنى معرفتش انام غير لما أجيب اخرها..ما بالك بباقى الروايات..
نهى فى اللحظه دى انفجرت من الضحك ومقدرتش تمسك نفسها، ولا هو كمان، وفضلوا يضحكوا لدرجه ان حنان سمعت صوتهم، واستغربت على ضحكهم، بس إبتسمت وحست ان نهى مميزه عند وائل لدرجه إنها تخليه يضحك بالشكل ده..
نهى ووائل هديوا شويه من الضحك، ووائل شاورلها على قهوتها، وهى إبتسمت وشربت منها شويه وهو كمان شرب من قهوته شويه وبيقولها: طبعا مش زى قهوتك بس انا مضطر لغاية ما انتى تعلمينى إزاى اعمل القهوه، وبالأخص سرها...
نهى اتصدمت وفضلت تكح لأنها شرقت من كلامه ده، وهو ناولها كبايه المياه وهو عمال يضحك عليها..
نهى شربت مياه وقالتله بإستغراب: اعلمهالك ازاى؟! مش فاهمه؟؟
وائل بإبتسامه: لما اشوفك يوم الجمعه الجايه عندى فى البيت..
نهى بصدمه: عندك فى البيت!! ازاى يعنى؟؟
وائل ضحك جامد: الشوى انتى نسيتى ولا إيه؟! لأ!!!! أنا عايزك بقواكى العقليه، لسه بدرى على الزهايمر..
نهى إبتسمت بإحراج، وهو بيكمل كلامه بود: انا كلمت الأستاذ سامى واتفقت معاه، هيبلغ مدام منى، و قولتله انى هأكد عليكى و على الاستاذ فادى...
نهى بإحراج: انا مش عارفه اقول لحضرتك إيه، بس...
وائل قطع كلامها: من غير بس..
وائل قال لنهى على اتفاقه مع سامى، وبعدين قالها بود: أتمنى بجد انك تشرفينى فى بيتى، هستناكى..
نهى قامت و وقفت : ربنا يقدم اللي فيه الخير..
وائل قام و بإبتسامه: أكيد طبعا هيسألوكى انا كنت عايزك ليه..
نهى بصتله بحيره: أكيد هيبقى عندهم فضول، وانا مش عارفه هقولهم ايه..
وائل بإبتسامه: قوليلهم انى طلبت منك ان اى حاجه تخطر على بالك شايفه انها مهمه للموظفين تيجى وتبلغينى بيها على طول..
نهى إبتسمت وهزت دماغها بالموافقه، وسابته وخرجت..
وائل إتنهد وأبتسم و كمل قهوته، وهو بيبص فى ملفاته..
نهى وهى خارجه حنان إبتسمت ليها وقالتلها: تعرفى ان دى اول مره الباشمهندس وائل يرتاح لحد من الموظفين او يضحك معاه.. انتى كسرتى القاعده والحاجز ده..
نهى اتوترت من كلام حنان، وبقت مش عارفه تقولها ايه: اا! مش عرفه انتى بتقولى كده ليه؟؟
حنان ابتسمت بود: قصدى انك مش زى اى حد بالنسباله، وهو إنسان محترم لأبعد الحدود..
نهى بصتلها بتكشيره: هو بالنسبالى صاحب الشركه وبس، مش فى دماغى اى حاجه تانيه يا حنان، عن إذنك..
نهى سابتها ومشيت بس كانت متضيقه أوى من حنان، حست ان حنان بتلمح لحاجه مش حلوه ليها..مشيت من قدامها وهى مضايقه ومش عرفه تفكر فى حاجه..
سامى اتصل بمنى وقالها مكالمته مع وائل.. منى بتردد: مش عارفه يا سامى انا متخيلتش انه بيتكلم بجد، ومش عارفه هنروح ولا لأ..
سامى : انا شايف انها عادى، هو انسان محترم وحس بالارتياح فى قعدته معانا، فليه لأ، انتى بس شوفى كريم وبلغينى عشان نشوف هنعمل إيه...
منى : تمام هبلغه وأقولك.. سلام.
منى قفلت مع سامى واتصلت بكريم إللى قالها انه هيظبت أموره بحيث انه يجى معاهم..
نهى راحت مكتبها وهى متضيقه من كلام حنان ليها، بس دارت ضيقتها عشان محدش يفهم غلط او يسألها عن ضيقتها دى، فعيسوى بيسألها: مالك يا بنتى فى ايه، الباشمهندس وائل كان عايزك ليه؟؟
نهى إبتسمت وقالتلهم الكلام إللى وائل قالها تقولهم عليه..
خالد بسخريه: يا سلام! يعنى اى فكره تخطر على بالك عايزك تبلغيه بيها، وهو يدرس الموضوع ويشوفه يعمله ولا لأ..
نهى بصتله بتهكم: وانت ايه إللى مضايقك يا أستاذ خالد؟ الموضوع ده مش مقتصر عليا انا بس، لو انت او غيرك عندكم أفكار بلغه بيها، وهو مش هيقفل بابه فى وشكوا، نهى كملت كلامها بإقتضاب: وافتكر انه سبق وقال الكلام ده قدامكوا، صح؟؟ ف ياريت تتعامل على هذا الأساس.. بعد إذنك عشان عندى شغل..
إيمان وعيسوى مستغربين موقف خالد من نهى ووائل بالشكل ده، ومش عارفين هو ليه اصلا متضايق..
خالد سابهم وراح على مكتبه وهو متغاظ من نهى، هو حاسس ان ليها وضعها وممكن تاخد مكانه لو على فكر يسيب الشغل، أو يطلع على المعاش، والتفكير ده ضايقه جدا...
وائل اتصل بمحمد وكان بيطمن عليه..
وائل: ايه يا بنى كل ده نوم؟؟ قوم كده وصحصحلى!!
محمد رد عليه وهو نعسان: عايز ايه يا رخم، مش كفايه قلقك ليا إمبارح، عايز أرتاح منك شويه..
وائل بضحك: ليك حق تردهالى، ماشى يا عم براحتك، المهم فقت ولا لسه؟؟
محمد اتعدل من نومه: اه فقت! عايز ايه؟!
وائل بإبتسامه: انا اكدت على سامى ونهى و فادى، على عزومة الجمعه، بس مش عارف هعمل ايه؟؟
محمد مسح وشه بإيده وهو متغاظ منه: تعمل ايه فى ايه؟؟ يابنى مش انت متعود على موضوع الشوى ده، مالك بقى فيه ايه؟؟
وائل بتوتر: مش عارف متوتر ليه، وكأنى اول مره اعزم حد عندى..
محمد سكت ومره واحده انفجر من الضحك: هههه! يا ختى عليكى يا بيضه، هو انتى بتتكسفى يا قطه..
وائل بنرفزه: ولا ! اتعدل معايا وانت بتكلمنى..
محمد ضحك جامد: ما انت إللى كلامك غريب يا بنى، انت فعلا محسسنى إنك اول مره تتعامل مع بنات او مع حد..
وائل بتوضيح: دى مش زى اى حد، الموضوع كله غريب عليا..
محمد بمكر: خلاص الغى العزومه، لغايه ما تبقى مستعد لحاجه زى دى..
وائل بغيظ: تصدق انا غلطان انى بكلم واحد زيك، غور ياض مش طايق اسمع صوتك..
وائل قفل السكه فوش محمد إللى فضل يضحك على صاحبه واللخبطه إللى هو فيها..
نهى روحت بيتها وحكت لمنى على عزومة وائل، و منى كمان حكتلها على مكالمة سامى.
نهى بإستفهام: يعنى حضرتك موافقه على العزومة؟؟
منى بهدوء: انا كمان شيفاها عادى، من الواضح أنه عايش لوحده ومفتقد الجو الأسرى، فليه لأ..
نهى بإستغراب: ليه قولتى إنه عايش لوحده؟؟ أكيد لأ طبعا...
منى بهدوء: معرفش ليه قولت كده.... منى بتفكير: يمكن لأنه ماقالش إننا نتعرف على مراته وعياله، ماهو برده غريبه إن واحد زيه يعزمنا عنده بالشكل ده من غير ما مراته تعرف بالعزومه دى إلا إذا كان مش متجوز....
نهى أخدت نفس جامد وخرجته وافتكرت كلام حنان ليها: بس انا مش هروح معاكوا؟
منى بصتلها بدهشه: إيه! مش هتيجى معانا! ليه؟
نهى بتوتر: مش عارفه يا ماما، مش حابه انى اروح عند صاحب الشركه إللى بشتغل فيها..
منى بذهول: هو محدش يعرف ان فادى يبقى خالك؟؟
نهى بتنهيده: لا طبعا! ما قولتش لحد، انتى عايزاهم يفتكروا انى اشتغلت بسبب انكل فادى، ده اول حاجة هتيجى فى بالهم..
منى برفض: بس هم بردوا مسيرهم هيعرفوا عشان اكيد فى مره فادى هيروح هناك ويعرفوا انه خالك..، وبعدين هو انتى هتروحى لوحدك.. احنا كلنا معاكى، وتعتبر عزومة عائلية..
نهى بحيره: مش عارفه والله يا ماما، اكيد فعلا فى يوم هشوف انكل فادى هناك، بس مش عارفه اصلا هعرفهم بده ازاى وخصوصا ان فى واحد معانا فى الشغل بيتصرف معايا تصرفات غريبه..
منى بإندهاش: ازاى يعنى مش فاهمه؟؟
نهى حكت لمنى على مواقف خالد معاها، وهى كمان إستغربت هو ليه بيعاملها كده..
منى بتفكير: يمكن حاسس إنك هتخدى مكانه فى الشغل ولا حاجه، اصل الناس دى بتفكر بالشكل ده..
نهى بتنهيده: انا اصلا مش فى دماغى اى حاجه من دى، وانتى عارفه ان المناصب مش بحبها، ولو هى جتلى هرفضها..
منى بإبتسامه: انا عارفه ده بس هم لأ، خلى بالك منهم، وسيبى كل حاجه على ربنا.. المهم شوفى هناخد معانا ايه يوم الجمعة..اكيد مش هندخل بإيدينا فاضيه..
نهى إبتسمت وبدأت تفكر هتاخد ايه معاها يوم الجمعه..
منى كلمت أحلام وقالتلها على عزومة الجمعه واتفقت معاها انها هتعدى عليهم وهيروحوا مع بعض..
وائل كلم فادى وأتفق معاه برده على يوم الجمعه وقاله ان مصطفى و رنا كمان معزومين، و فادى وافق وقاله انه هيبلغ مصطفى و رنا..
وائل ركب عربيته وعمال يفكر هيجيب ايه او هيعمل ايه فى عزومة الجمعة وراح على كارفور واتصل بمحمد وهو هناك: ايوه يا بنى انت فين كده؟؟
محمد بغلاسه: فى بتنا بستجم..
وائل بغيظ: تعلالى على كارفور، مش عارف هجيب ايه للعزومه..
محمد ضحك جامد: ههههه ماشى يا عم، ادينى ربع ساعة واكون عندك..
محمد راح لوائل ودخلوا كارفور مع بعض وبدأت رحلة التسوق ليهم..
محمد بيشترى لحوم لزوم الشوى، والساقع، و وائل معاه وهم بيعملوا شوبينج، لفت نظره لعب أطفال فابتسم وراح عندهم يتفرج على اللعب..
محمد راح معاه ولاحظ نظرة وائل إللى عينه بتلمع على اللعب وكأنه طفل صغير اول مره يشوف الألعاب دى.. محمد صعب عليه صاحبه، بس دارى جواه إحساسه ده فبيقوله: ايه رأيك لو نجيب ألعاب تحطها عندك فى الجنينه عشان ندى وميرا لما يجوا يلعبوا بيها؟؟
وائل بصله بإبتسامه وحب: انا برضه فكرت فى كده.. ايه رأيك نجبلهم زحليقه و ترانبولين( نطاطه ومليانه كور)، ونجبلهم كمان مكعبات والبوكس والباسكت بول، وكمان..
محمد بهزار: حيلك حيلك ! إيه كل ده! بالراحه شويه..
وائل بإبتسامه: لا انا عايز كل ده..
محمد بحب: ماشى يا صاحبى..
وائل اشترى لعب كتير والاكل والساقع وأتفق مع محل الحلويات انه يبعتله الحلويات فى البيت..
وائل خرج هو ومحمد على البيت وحطوا اللعب إللى جابوها فى الجنينة، محمد قال لوائل طريقة تتبيل اللحمه... و اتغدوا مع بعض واتكلموا شويه فى الشغل وبعدين سابه وراح بيته..
فات يومين على أبطالنا وجه اليوم الموعود...
يوم الجمعه...
منى بتقول لنهى: نهى جهزتى الحاجه ولا لسه؟؟؟
نهى بتحط الحاجه فى الشنط: اه يا ماما خلاص جهزت الشنط، وانا هلبس ندى دلوقتى..
الباب خبط..
منى : دى أكيد أحلام، روحى افتحى عقبال ما اجهز التورته..
نهى فتحت الباب وأحلام دخلت وسلمت عليهم، وبتقول لمنى: سامى كلمنى وهيقابلنا على الدائرى مش هيجى هنا..
منى بإبتسامه: تمام كده، انا يدوب هجهز التورته وهلبس، و نهى هتلبس ندى..
أحلام بحب: لا روحى انتى يا نهى اجهزى وانا هلبس ندى، بس هاتلها معاكى هدوم احتياطى، وكمان هتيلها المايوه عشان لو نزلت البيسين...
نهى كشرت: بيسين ايه بس، لا طبعا! انتى عارفه ندى بتخاف من المياه..
احلام بإستغراب: ما سامى و كريم معاها، هتخافى من ايه، وبعدين خليه معاكى احتياطي..
منى بصت لنهى: اه يا نهى ايه المشكله، جهزيلها الحاجه خليها تقضى يوم حلو وظريف..
نهى بتنهيده: خلاص إللى تشفوه..
نهى أخدت حاجات ندى وهى كمان لبست، وبعد صلاة الجمعة نزلوا يقابلوا سامى على الدائرى عشان هو عارف المكان، و فادى سبقهم عند وائل إللى رحب بيه هو ومصطفى..
وائل اتصل بسامى وعرفه ان فادى جه، وسأله هو فين فقاله انه رايحله فى الطريق وكريم وراه بعربيته...
سامى و كريم وصلوا عند وائل وسلم عليهم وندى اول ما شافته، جريت عليه وهو شالها وبسها بمنتهى الحب.. وسلم على منى وكريم وأحلام، ونهى..
كريم و سامى ونهى نزلوا الحاجه إللى جايبنها معاهم فوائل بإستغراب: ايه ده انتو جايبين ايه معاكوا؟؟ انا جايب كل حاجه..
منى بود: دى حاجات بسيطه..
وائل كشر شويه، و سامى رد بإبتسامه: هو حضرتك عامل فرق ولا ايه؟؟
وائل بإحراج: لا طبعا، و عشان كده مكنش فى داعى تتعبوا نفسكوا وتجيبوا حاجه، وائل بص لنهى بلوم: ما قولتليش ليه انكوا هتجيبوا حاجه معاكوا؟؟
نهى إبتسمت: على فكره، الحاجة إللى احنا جيبنها لازوم القعده، يعنى مش اكل اكل..
وائل بإستفسار: يعنى ايه؟! مش فاهم؟؟
نهى بضحك: يعنى لب، فول سودانى، فشار، نسكافيه، شوكولاته، يعنى حاجات من دى..
وائل أبتسم وضحك: إذا كان كده معنديش مانع، فعلا الحاجات دى ما فكرتش فيها..
نهى بضحك: احنا متعودين على كده حتى لما بنروح عند اونكل فادى بنعمل كده..
وائل أبتسم: طيب يلا عشان الجماعه جوه مستنين الشوى..
كلهم دخلوا وسلموا على فادى ومنار ومصطفى و رنا.... ندى وميرا لقوا الألعاب وفرحوا قوى بيها وراحوا يلعبوا..
كلهم قعدوا وبيتكلموا فوائل قال لسامى: ايه رأيكم تتفرجوا على الفيلا وتقولوا رايكم فيها إيه.. اصل انا بصراحه بفكر اغير الديكور بتاعها فقولت اخد رأيكم فيها..
سامى وافق هو وكريم ومصطفى وقاموا مع وائل إللى استغرب ان منى وأحلام ونهى فضلوا قاعدين: اتفضلى يا مدام منى، انا بصراحه بيعجبنى ذوق حضرتك واكيد رأيك يهمنى..
منى إبتسمت: اصل الاولاد بيلعبوا وهخلى بالى منهم.. وبصت لنهى إللى كانت ساكته وباصه لبعيد..خلى نهى تروح معاكوا هى برده ذوقها حلو..
نهى سمعت إللى منى قالته فبصتلها وسكتت ولان نهى كانت لابسه نظاره شمس فمحدش شايف عنيها إللى كلها غيظ وضيق لما منى قالت كده..
فوائل إبتسم: أكيد طبعا ذوقها هيكون حلو زى حضرتك..
منى قالت لنهى تروح معاهم، وهى قامت غصب عنها، عشان محابتش ترجع كلمه لمنى قدامهم..
منار و رنا بيبصوا لبعض بغيظ على اللى حصل قدامهم، فمنار اتكلمت: أكيد طبعا ذوق الست مش زى ذوق الراجل.. ولا إيه!!
وائل بإبتسامه: أكيد طبعا يا مدام منار، أتفضلى معانا....
وائل أخد نهى ومنار و رنا و ريم و سامى وكريم ومصطفى بيتفرجوا على الفيلا..
دخلوا جوه كان العفش نوعا ما كلاسك ومتقسم بطريقه رجال الأعمال،اه شيك والعفش غالى بس مطفى، من غير روح عجبهم كلهم ذوقه، بس هو لاحظ أن نهى ساكته معلقتش على حاجه، فقرب منها وبيسألها: ايه رأيك؟
نهى بإبتسامه هاديه: حلو وشيك، ذوقك راقى..
وائل بهدوء: بس إيه!! انا مستنى اسمع منك بعد بس!! فى حاجه محشوره فى زورك عايزه تطلعيها!! صح!! قولى على طول!!
نهى إبتسمت بإحراج: اممم! من غير زعل؟؟
وائل إبتسم: من غير زعل، انا فعلا حابب اسمع رأيك...
نهى أخدت نفس جامد: بصراحه مطفى مافيهوش روح..
وائل إستغرب من تعبيرها بس من جواه كان مبسوط انها بتتكلم بتلقائية ومن غير تزيف، فرد بإبتسامه: طيب لو ده كان بيتك كنتى عملتى إيه فيه؟؟
نهى بصتله بإستغراب ودهشه، وبعدين ضحكت: لو عايز تعرف جنانى معنديش مانع..
وائل ضحك: اه عايز اعرف جنانك..
نهى بمرح: اممم، اسمع يا سيدى..
وائل بيسمعلها بإهتمام، وكلهم بصولها اول ما بدأت تقول هو ممكن يعمل إيه..
نهى بتشرح: هنا يكون زى مطبخ امريكان بس مش مطبخ بالمعنى المفهوم، يعنى حاجه للمشروبات واكل الخفيف، جبن او ساندويتشات، حاجات خفيفه بس، بدل ما تدخل لغايه المطبخ.. وبالنسبه للطبخ والحاجات التانيه يبقى جوه فى المطبخ عشان الروايح والزيوت متبهدلش العفش، أو ريحة الأكل تخرج بره..
وائل إستغرب على تفكيرها بس إبتسم وبيقولها بمكر: اه زى ادهم كده..
نهى بصتله هى كمان بإبتسامه مكر: يعنى حاجه زى كده..
هم الأتنين ابتسموا أوى، وهو بيقولها: ماشى كملى..
نهى بتكمل كلامها، ومنار و رنا و ريم متغاظين أوى ومش فاهمين حاجه، ومصطفى و سامى وكريم عجبهم تفكير نهى.
نهى بتكمل: وهنا يبقى فى ركنه مودرن وتليفزيون ل سى دى، وجنبهم جيتار، وسماعات متوصله بالتليفزيون عشان الكريوكى..
وائل بصلها بذهول وتعجب، لما قالت كده، لأنها ما تعرفش انه بيعشق الجيتار وعنده واحد فوق بس بقاله فتره طويله جدا مش بيعزف عليه، فبيقولها بدهشه: انتى بتعرفى تعزفى على الجيتار؟؟
نهى بإبتسامه: لا مش بعرف، بس عندى أمل انى اتعلمه فى يوم من الأيام..
وائل بيسمعلها بإهتمام واحساسه كله متلخبط، ومتوتر وفى نفس الوقت مبسوط من كلامها وتفكيرها وحس انهم فى حاجات كتير متشابهين فيها..
نهى بصت على حته تانيه جنبيهم: وهنا يبقى فى ركنه تانيه وتلفزيون تانى عشان لو فى أطفال يلعبوا بالاكس بوكس( لعبه زى الفيديو جيم بس من غير دراعات) عشان يبقوا جنبينا ونخلى بالنا منهم..
نهى مستمريه فى الشرح والتخيلات، وبتتكلم بحريه اكتر وبتقول كل افكارها و وائل مهتم اكتر وبيسمعلها بإهتمام وإعجاب، و بأبتسامه مافرقتش وشه، و رنا ومنار و ريم، غظهم بيزيد،فرددت رنا بغيظ:.....
يتبع....
