آسميتها جارية فأصبحت سيدة قلبي

بارت 28

بارت 28

&

•

•

•

وتدري
مـن تگبر على شـفافك ضحكتك
يكبر بگلبي آلهوى

عريان السيد خلف

•

•

•

&

........
( نور )

الطريق مليان اشجار على طوله يعني عباره عن ريحة زرع وهوى حلو مريح للنفس ..

منزله الجامه والهوى يضرب بوجهي وعيني على الشجر ..

اللون الأخضر مميز ومريح للنظر وبنفس الوقت يعدل النفسيه ..

ع الاقل يخفف من الالم اللي احس بي بسبب العملية خاصه سيلا نايمه على رجلي كل شويه محركتني واموت من الألم ..

فتح علاء القرآن الكريم سورة يس بصوت القارئ عامر الكاظمي بتلفونه وربطه بالسياره ..

صوت القارئ والمنظر الطبيعي اللي دا اشوفه رهيب ..

يعني يجبرني اتعمق بـ ايات السوره ..

من گال بسم الله الرحمن الرحيم (( إِنَّمَا أَمْرُهُ إِذَا أَرَادَ شَيْئًا أَنْ يَقُولَ لَهُ كُنْ فَيَكُونُ ))

هاي الأية لامست گلبي كانما رساله موجهه الية ..

يارب يامن تقول للشيء كن فيكون اني فعلاً جاي انتظر ايام حلوه تجبر خاطري بحيث تجبر خاطري بشكل ماچنت متوقعته منتظره ايام تراضيني وتعوضني عن الأيام اللي راحت وعن كل حزن وكل شي سيء مريت بي ياربي اني فعلاً انتظر ايام تراضيني وتبتسملي ..

انشرح صدري بهاي الثلث ساعه فعلاً سورة يس عظيمه عباره عن اطمئنان ..

سندت راسي على باب السياره واني اراقب الطريق واناجي ربي بداخلي ..

اني صبوره ياربي حيل صبوره وانت تعلم خليت ايدي على گلبي ميت مره بالليالي اللي راحت وحاولت اطمن نفسي بس ياربي ايدك ارحم من ايدي وعطفك ولطفك اعظم من خوفي وقلقي ..

وصلنه للمزرعه بس من اتجاه ثاني لأن مااجينه من الطريق المعتاد ..

المزرعه كلش چبيره ماتوقعتها بهالكبر كل مره ندخل گبل على البيت المزرعه تبدي من ورا هالمره فتنه من نهايتها ..

حسيت علاء متقصد هاي الفره لأن طريق يفتح النفس ..

تعجبني بي حركاته اللي افهمها بدون مايحچي او يلمح احس بأهتمامه الصادق بوقتها وهذا الشي شبه مريحني ..

بعد عندي حقد عليه على اللي مريت بي اتحاول اتحاوز بس شي محفور بگلبي مااگدر ..

وهو احياناً افهمه واحياناً يصير كتلة مال غموض ماتعرفين اللي يريده شنو ..