آسميتها جارية فأصبحت سيدة قلبي

بارت 19

بارت 19

&

•

•

•

لا تكحلنـي بـ صورهم وك مراودهم عمـتني
رخصوني ضيعوني
چنـت ليره اعله الـدرب وعيونهم
ما وچـدتني

الكاطع

•

•

•

&

........
( نور )

فتحت عيوني ببطئ واني احس بخنگه ماليه صدري مااعرف اعبر عنها ببچي لو بصراخ ..

صعب من تكون مضحي بنفسك على لا شيء ..

تتحمل العذاب والغربه والضرب وطعن الشرف كله بسبب شي مصار ..

ثلاث سنوات من عمري راحت فدوه لشخص جبان ماگدر يواجه افعاله ..

ولو معترف بوقتها چان ماصار اللي صار ..

احس نفسي بحضنه بس مااگدر اتحرك ولا ابعده وادري عيونه تراقب ملامحي الجامده ..

رفعت عيني صارت بعيونه ابتسملي رجعت دنگت ..

قبل راسي بهدوء :- شلون صرتي ؟!

نور :- موزينه .

علاء :- شنو يوجعچ ؟!

نور :- گلبي .

وخرت من حضنه گعدت والتفتت عليه ..

نور :- چنت تدري ؟!

هز راسه بدون مايرد عليه .

نور :- اني شنو ذنبي ليش كلكم عاقبتوني حتى الفاعل بكلمة منه طلع منها واني تعاقبت ولهسه العقاب مستمر .

راد يجاوبني رفعت ايدي خليته يسكت ..

نور :- علاء لو سمحت اطلع .

علاء :- نور لتكتمين اريد اسمعچ .

نور :- انت اكثر واحد يعرف اللي بيه .

علاء :- صايره غامضه مااعرف اللي ممكن تسوي .

نور :- اطلع .

علاء :- ماشي مثل ماتردين .

طلع بدون مايگول شي واني سحبت الغطه ونمت واني مغطيه حتى راسي وبس دموعي تنزل بصمت ..

استرجعت اول يوم وصلت بي لليونان واول ضربه حصلتها من علاء واني اردد فدوه لأهلي المهم همه بخير ..

وضرب السوط وكلام منى وساره عن شرفي ..

اتذكرت موقف ..

(( چنت اساعد ايميليا بالمطبخ نسوي غده ..

ودخلت منى شايله علاء الصغير ووياها ساره گعدن على الميز گبالي وهنه عود يسولفن بيناتهن وممنتبهات لوجودي ..