آسميتها جارية فأصبحت سيدة قلبي

بارت 20

بارت 20

&

•

•

•

وقبل أن ترحَل أخبرني أينَ يُباع النِسيان، وأينَ أجد ملامحي السابقة، وكيف لي أن أعودَ لنفسي..

•

•

•

&

..........
( نور )

طول الطريق اني صافنه وافكر ليش تسرعت وفكرت اروح لعرسها شنو اريد بالضبط ..

بس مادام نويت خلاص يعني لازم اكمل واروح ..

وصلنه للمركز نزلت طلبت اشوف الماكيرا المسئوله عن المركز ..

طلبت منها تسويلي مكياج بيدها ومكياج بسيط وهي اهتمت بيه ..

انطيتها لون فستاني وبدت تشتغل على وجهي ..

برزت عيوني بـايلاينر ومسكارا وحمره لون احمر قاني ..

اول مره اخلي هيچ مكياج خجلت اطلع من المركز عبالك مسويه جريمة فكرت امسحه بس نهرت نفسي ..

ليش كله اخاف واستحي ليش مااسوي الشي اللي براسي بدون تفكير ..

سحبت طرف الشال غطيت بي وجهي وطلعت من المركز صعدت بالسياره ..

سمعت عبودي يتأفأف وضايج لأن گاعد بالشمس ردت اعتذر منه واطيب خاطره بس مخنوگه مااگدر احچي حرف ويه احد ..

وصلت للبيت الحمد لله ماچان احد من اخواني موجود ولا ابويه لأن اخجل يشوفوني بهذا المنظر ..

لگيت بيبي روعه وماما متحضرات وينتظروني بالصاله وحتى فهودي وسيلا خطيه وئام مسبحتهم ومبدلة ملابسهم ..

سيلا لابسه فستان قصير وردي وحذاء ابيض وشعرها كثيف مسويته الها تسريحه حلوه ..

وفهودي ملبسته قاط شكيت مالت عبودي من چان صغير ..

رادوني اشيلهم بچو عليه من اجيت لأهلي عايفتهم على وئام قليل اهتم بيهم ..

دنگت بستهم وعفتهم ورحت لغرفتي بدلت ملابسي ولبست فوگهم بشت ولفيت حجابي وسحبت نص منه غطيت بي وجهي ..

نزلت الهم وبيبي لحت الا تشوف شلابسه فتحت البشت تخبلت عليه ..

بيبي روعه :- خايبه متخافين انتي تره العين حق ومذكوره بالقرآن وانتي لابستلي آحمر وجايه امشي لبسي غيره .

رديت بضحكه :- بيبي اني ايماني قوي وبعدين اللي يحسدني ماعنده سالفه ومااتوقع احد يتمنى يصير بمكاني .

بيبي روعه :- دتعاي خلي اقره عليچ اخافن تجيچ عين تسگطچ ومانخلي سيد مانروحله بعدين .

گعدت بصفها تقره عليه واني صافنه عليها افكر ياترى شنو اللي ممكن يحسدوني عليه السرطان لو غربتي لو شنو بالضبط بين اهلي واحس غريبه .