بارت 14
&
•
•
•
هلي وتدرون موش بكيفي صديت
غصب ضعني حده وشت عن ضعنكم
هلي وباجر لون للديرة رديت
اذوبن شمعه فوك حروف اسمكم
#جبار_شدود
•
•
•
&
..........
( نور )
اجه والله اجه ولگاني اني متأكده هو واگف گدامي مو حلم مااتعودت بالاحلام اشوفه بهالوضوح ..
يباوعلي بصدمه ويرجف مثل رجفتي واكثر گلبي مااحس بي ولا احس بدگاته شعوري مثل اللي وصل لحبل الاعدام وگالوله تم الأفراج عنك ..
خليت ايدي على الگاع استند بيها حتى اوگف واروح احضنه واتأكد هو اجاني مااتخيل ..
اريد اگول اسمه مااگدر گوه طلع صوتي المبحوح ..
نور :- م م محمد .
هز راسه ورد عليه بحسره :- ياروح وگلب محمد .
نور :- تعال احضنك الله يخليك .
محمد :- والله مااكدر الصدمه شالتني تعاي انتي اروح اخوچ .
ماسمحت للصدمه تشلني اكثر عاندتها ومشيت واني احاول اسيطر على عرجتي وصلت لاخويه حضنته واني انحب واصرخ ..
نور :- مامصدگه والله مامصدگه هذا انت اجيتني لو حلمانه .
محمد :- اجيتچ والله مو حلم .
حاول يبعدني عن حضنه ..
محمد :- شو خلي اشوف وجهچ الحلو .
اتمسكت بي اكثر ..
نور :- لاا خليني بحضنك لتعوفني الله يخليك .
حاوطني بيده وهو يضحك ويبچي بنفس الوقت ويمسح على شعري ..
بعدني عنه وحاوط وجهي بيده ..
محمد :- هاي انتي صدگ عدله .
نور :- والله ما متت بس انتو دفنتوني .
سحبني لحضنه ومشاني ويا گعدنه على القنفه واني اباوع لوجهه كبران اخويه وصاير شيب براسه ..
نور :- ليش هيچ مشيب حبيبي ؟!
محمد :- عوفچ من شيبي ليش تعرجين هيچ شبيها رجلچ ؟!
نور :- حادث قديم .
بقه يباوعلي بحسره وهو يمسح على وجهي وخدودي ..
محمد :- متغيره شسوت بيچ الدنيا وين هذيچ نور الچنها ورده .
ابتسمت اله بألم :- هذيچ ماتت دفنتوها بيدكم .
