آسميتها جارية فأصبحت سيدة قلبي

بارت 11

بارت 11

&

•

•

•

ردّيت مغرم وافتحت بوب العشگ
ب ثنين ايديه
ولاچنّي من حبهم تبت توبة وداع
وهاي هيه

كاظم الرويعي

•

•

•

&

...........
( عصام )

توني خلصت صلاة المغرب وعندي موعد ويه جماعتي بالكوفي لميت المصلاية گمت اريد اطلع چلب بيه علاء الصغير ..

علاء :- روح وياچ .

عصام :- شنو هذا لغز ؟!

ايناس :- ديگولك اروح وياك .

عصام :- لا وين تروح ويايه حبيبي باچر نطلع اني وياك .

علاء :- لااااا روح وياچ .

عصام :- اهو ماتجين تاخذين ابنچ خلي اطلع .

لزمته وطلعت بسرعه اسمعه يبچي ورايه بس شسوي كل مااطلع يچلب بيه حتى اخاف عليه من الكوفي كله دخان ويخنگ ..

توني صعدت بالسياره دگ تلفوني رقم دولي شكيت هذا علاء وچنت ناوي ارزله ..

عصام :- الو نعم تفضلو ؟!

لا رد اسمع بس انفاس مضطربه ترجف وگلبي رجف وياها ..

عدت كلامي بتردد :- الو منو ويايه !!

بعده مايرد بس انفاسه تثبت المتصل يسمعني ومتردد يحچي ويايه بقيت متمسك بالمكالمة ماردت اسدها بس حتى اعرف هوية المتصل ..

عصام :- منو ويايه ؟!

.....:- راح اگلك اني منو بس اقسم عليك بضلع الزهراء لا تخوني ولا تگول لأحد عليه .

گلبي اتسارعت دگاته خفت انصاب بجنون من الصوت اللي جاي اسمعه وخرت التلفون من اذني حتى اتأكد اني صدگ فاتح اتصال لو اتخيل ..

رجعت التلفون على اذني ورديت بسرعه :- والله والله والله وحق ضلع سيدتي الزهراء مااگول لأحد عليچ ولا اخونچ بس گوليلي انتي منو ؟!

نور :- اني نور .

عصام :- الله اكبر .

شمرت التلفون فتحت السياره ونزلت منها بسرعه سجدت لرب العالمين بنص الشارع واني ابچي واشكره ..

رفعت راسي من الارض مسحت وجهي من اثر التراب ورجعت للسياره ..

دورت على التلفون لگيته واگع جوه الكشن سحبته شفتها بعدها على الاتصال خليت التلفون على اذني ..

عصام :- گولي والله انتي نور ؟!

نور :- والله اني نور عمو الله يخليك اني محتاجتك ضروري تگدر تجيني اليونان !!