آسميتها جارية فأصبحت سيدة قلبي

بارت 5

بارت 5

&

•

•

•
عطشنة لجيتك يا عافية شياب
رايدلك الزينة وشوفي ما رايد...

رحت كدامكم دفعت بلة لمسكين
بس النية مختلفة..
أضن عدكم جنت زايد..

شكثر بارد

يساعة بـ ايد متواعد ....

حسين علي حاتم
•

•

•

&

.........
( نور )

صعدنه بسيارته الماركت قريب نگدر نروحله مشي بس هو گال نروح بالسياره احسن حتى نخلي الغراض بيها ..

فتحت الباب الخلفي صاح ..

وسام :- اگلچ سايق عندچ تعاي هنا بالصدر .

نور :- شكو بيها شبي السايق .

وسام :- والله هنيال السايق اذا الچ .

هزيت ايدي وصعدت بالصدر بدون ماارد عليه وهو يضحك عليه ..

حرك السياره وباوعلي بنظرات مال اشرار ..

وسام :- اقري دعاء السفر .

نور :- ها شكو وين رايحين ؟!

وسام :- ربطي حزام الامان .

نور :- عزه وسام لتخوفني عفيه .

دار وجهه عني وهو مبتسم :- بسم الله الرحمن الرحيم .

داس بانزين وحرك السياره طار بيها قطرة دم مابقت بجسمي مچلبه بحزام الامان واصرخ ..

نور :- ياربي دخيلك راح نموت يارررربي .

هو ميت ضحك واني گالبه الدنيا بالصريخ انوب مااعرف شلون يزرگ بين السيارات ..

معجزه ماسوينه حادث اتمنيت يخالفونه لأن يمشي سريع بطريق شعبي ..

رغم الماركت قريب بس حقير اتقصد يروح من غير طريق حتى يصير طويل وابقه اني اصرخ ..

مديت ايدي حضنت بطني وصحت عليه بخوف ..

نور :- الله لا ينطيك اذا يصير بـ ابني شي .

شويه شويه خفف السرعه وهو يضحك ..

وسام :- هاي رياضه حتى نسهل ولادتچ .

متت خجل شگد مايستحي هذا حقير .

وصلنه للماركت چان خاص بالمواد الغذائيه ركن السياره ونزلت امشي بصعوبه احس الگاع تفتر بيه اتقرب مني حچه بقلق ..

وسام :- شبيچ ؟!

نور :- ابد سلامتك كلشي مابيه بس اكو واحد حقير اخذني بسيارته عبالك راكبه سكة الموت .

انشي بصعوبه وگوه مقويه نفسي احاول انسه اللي صار حتى ماادوخ اكثر ..

هو مثل الطفل يمشي والسويچ بـ اصبعه يفره ويغني بالانگليزي ..