بارت 10
&
•
•
•
صدگ وترِد .. !!
صدگ يبزغ فجر جيتك
واسولف يمك واگعد
صدگ ؟ قداح حبنا المات
يِروه اردود ويوَرد
علي نذور لو رديت .. يفلان وتلاگينا
لسوي -(ضلوعي) الك شمعات
معتلگه بصوانينا .. !
- زامل سعيد فتاح
•
•
•
&
.........
( غدير )
گاعده بالصالون بعد ماخلصت مكياجي بلشو بيه تسريحه اختاريتها بسيطه للعرس لأن اساساً بالحنه سويتها ملكيه ..
الحنه چانت بقاعه النسوان وحد والزلم وحد بس رائد كل شويه يجي نرگص سوه لو ناخذ صور واخواته شعلن الجو بالرگص ..
قررت اكون بسيطه بالعرس بس بابا طلب مني البس تاج يگول اريد ازفچ ملكة من بيت ابوچ ..
البنيه تسويلي بالتسريحه واني من المرايه عيني على مجموعة بنات اخوات ..
رغم ويايه وئام وبنات عمي بس اتمنيت نور حاضره ..
شگد حبيت اهتمامهن بيها واعجابهن بتسريحتها ومكياجها وهي خطيه طايره بيهن وتباوع الهن بحب وامتنان .
لو نور يمي چان هسه تحتار شتسويلي وهي تختار مكياجي وتسريحتي على ذوقها اختي تموت على هاي السوالف اتذكرها بعرس علاوي طارت ..
اتقربت مني وئام مسحت دمعتي ماحسيت بيها من نزلت ..
وئام :- شنو غدو ليش تبچين حياتي !!
غدير :- اتمنيت نور ويايه هسه .
وئام :- سوده عليه ياعمري كل احنه وياچ خواتچ ونور اكيد تشوفچ هسه وفرحانه الچ .
غدير :- ادري انتو ويايه ومحد مقصره واحبچن والله بس وجودها يختلف .
ساره :- گومن بنات خلي نرجع لبيوتنه هاي مو وجه وحده توگف وياها .
غدير :- انچبي انتي .
سما :- يمعودات تره حقها تريد اختها يمها ومو وكت زعل ست ساره اذا انتي ماعندچ احساس موالكل مثلچ .
غدير :- حچيتي اللي بگلبي تعاي خلي ابوسچ .
اتقربت بستها وهي تضحك .
ريام :- هو انتي تدرين هاي بعرسها حتى مابچت علينه تضحك وترگص .
ساره :- اي لعد ابچي على خلقتچ واني ماصدگت اعوفكم واتزوج .
سما :- اشوفچ بقيتي يم رجلچ يوميه انتي وجهالچ فوگ راسنه وتبوگين بملابسنه .
متت ضحك :- طاحظچ ساره سكتتچ سما .
