آسميتها جارية فأصبحت سيدة قلبي

بارت 21

اول ماطلعت للصالة عرفت المكان مزرعتنه اللي بالعمارة ..

چان علي گاعد يقره ادعيه بتلفونه بالصالة اول ماطلعت التفتلي وابتسم ..

علي :- هاا صح النوم .

نور :- صباح الخير .

علي :- صباح النور شلون صرتي هسه ؟!

نور :- الحمد لله احسن حبيبي .

ابتسملي ورجع يقره بالدعاء ..

ردت اروح للمطبخ بس وگفت واندارت عليه واني مبتسمه بفرح ..

نور :- شكراً لأن جبتني هنا .

علي :- تدللين اهم شي مرتاحه .

نور :- الله يحفظك اليه .

رحت للمطبخ خليت القوري على النار وسويت چاي وسويت بيض سلگ لأن اني وعلي نحبها هيچ ..

لگيت خبز حار على الميز لأن هنا اكو يخبزون وره صلاة الفجر ومن نجي للمزرعه يجيبولنه ..

كملت الريوگ رتبته بالصينيه واخذته اله گعدنه ناكل ..

خلصنه الريوگ ورجعت الصينيه للمطبخ غسلتها وطلعت بره يمه ..

اكو ميز وكراسي گبال البيت هو چان گاعد على الكرسي ورافع رجله على الميز ويدخن ..

سحبت كرسي وگعدت يمه ..

نور :- اول مره اشوفك تدخن .

ضحك بهدوء :- احنه كلنه ندخن بس مو بالبيت .

نور :- اممم يعني تخافون من بابا .

علي :- لاا مو خوف بس احترام لأن احنه كبار ونعرف الصح من الغلط واكيد هو يخاف علينه بس مايگدر يحاسبنه غير بالكلام فالأفضل مندخن گدامه .

نور :- بس انتو تدرون بيها مضره للصحه شلون تدخنون .

جاوبني وهو ينفخ الدخان :- يمعوده الأمراض ترست الدنيا بجگاير بدونها شفتيلچ واحد صاحي بالعراق .

نور :- اي والله هم صدگ .

علي :- اسألچ سؤال وتجاوبني بصراحه !؟

نور :- اكيدد طبعاً .

اراقب ايده وهو يطفي الجگاره بالنفاضه وطلع الثانيه شغلها ..

علي :- ليش تردين تطلگين من علاء ؟!

نور :- لأن مامرتاحه ويا واريد اعيش حره علي حيل تعبت من التفكير والخوف من المستقبل والخوف على اطفالي .

جاوبني بهدوء :- باعي اني مااعرف الظروف اللي مريتي بيها ويا علاء واصلاً واضح هو مأذيچ من نظرات الندم بعيونه بس راح اگولچ شي وانتي حكمي .

نور :- شنو !؟

علي :- بهذا مجتمعنه المره بدون رجال تتعب اكثر من ما هي ويا اقرب الناس الها يأذوها يصير الكل يتحكم بيها وين رايحه ووين جايه وانتي مبين رجلچ يحبچ ويريد رضاچ لتخسري علمود الماضي ابدي ويا صفحه جديده وانطي فرصه .