آسميتها جارية فأصبحت سيدة قلبي

بارت 21

باوعلي بغضب وهو يسوق السياره متوتر :- شنو ماتردين المستشفى مو بكيفك لازم نسويلچ فحوصات .

نور :- بداعة امي لا جيب العلاج واخذني بالمكان اللي وعدتني بي خليني افرح بأخر ايامي .

ضرب الستيرن بقهر اكثر من مره رديتله اسم العلاج واني بعدني اتلوه من الألم ..

شويه ووگف يم صيدليه نزل جابلي العلاج ورجع ضايج فتح الباب من مكان السايق ومد راسه يحاچيني ..

علي :- اگلچ يگولون هذا العلاج مينصرف الا براچيته شلون !!؟

نور :- صحح نسيت حتى باليونان هيچ .

علي :- وهسه شنو ؟!

نور :- افتح جنطتي تلگه بالجيب الصغير ورقه مطبگه اخذها هي الراچيته .

فتحها واخذ الراچيته وراح ..

گلبي يگلي اسوي العمليه بس اخاف حيل اخاف من الجرعات مااريد اشوف شعري يوگع ولا اريد اوگع ومااگدر اوگف على رجليه ..

خليني على الاقل اتحمل الالم واخذ مسكن ويروح ..

اجه علي جايب العلاج وويا بطل مي اخذته من ايده بسرعه طلعت الحبايه ردت اشربها بس رفعت عيني بتوسل لعلي ..

نور :- راح اخذ الحبايه واحتمال افقد عليها بس عليك الله لتاخذني لغير المكان اللي تريد تفاجئني بي .

علي :- دخذي الحباية هسه انتي بيا حال وصار والله مااخذچ لغير مكان .

شربت الحبايه مره تلعب النفس وتمددت على الكشن وراها فقدت مادريت شصار بالدنيا ..

بقيت ماادري شگد نايمه حلمت حلم غريب ..

بالحلم اني بغرفه صغيره مربطه وگدامي مريه بشعه كلش بس تباوعلي وتضحك واني مرعوبه ابتعد عنها الزگ بالحايط واخاف اغمض خاف تهجم عليه بعدين گامت تصرخ وشردت طالعه من الغرفه بس صدى صوتها وهي تصرخ باقي بـ اذني ..

فزيت مرعوبه وگوه اتنفس خليت ايدي على گلبي احاول اهدي نبضاته ..

گمت اتلفت بالغرفه ظلمه بس بيها ضوء خفيف جاي من بره مبينه دنيا فجر وتوها الشمس بدت تطلع ..

گمت فتحت الضوه شفت الغرفه بوضوح احس شايفتها قبل بس راسي يوجعني مااگدر اتذكر ..

اخذت تلفوني بالجنطه شفت الساعه بالخمسه وربع الصبح رجعت التلفون على الميز ورحت للحمام اللي بداخل الغرفه ..

توضيت وطلعت ماعرفت مكان القبله بس اتذكرت برنامج علمتني عليه ريام اسمه حقيبة المؤمن ..

طلعت منه اتجاه القبلة ولبست عباية الراس ولگيت تربة بجرارات الغرفه اخذتها وصليت الفجر ..

كملت صلاة نزعت العباية وطلعت دشداشه اشترالياها علي من كربلاء لبستها وطلعت من الغرفه ..