Iztiraar

Chapter 16

Aaj uske pairon ki raftaar humesha se bhi taiz thi aur use dekh ke yeh saaf tha ke aaj woh rukne wala nahi tha. Seeriyon ko utarte hi use samne khari Ghazal dikhi aur uskr kadam na chahte hue bhi ruk gaye. Ghazal ne nam ankho ko utha ke jab use dekha to Samir ka dil jese tham sa gaya tha.  Uski behen ki ankho me aaj kuch alag sa tha jo usne aaj se pehle nahi dekha tha. Balke usne apni behen ko itne gour se najane kitni der baad dekha tha?

"Bhai.."

Woh boli to Samir akhri kuch zeene bhi utarta hua uska samne khara ho gaya.

"Shukriya Bhai...aap ne jo bhi kiya mere liye aaj.."

Woh boli to Samir ka jese dil bhar aya.

"Mere saath chalo guriya..tum ziyada mehfooz raho gi."

Usne kaha to Ghazal ne Samir ko umeed se chamakti hui nigahon se dekha.

"Lekin Bare Shah.. aur Bibi?"

"Bare Shah kuch nahi..."

Uske ilfaaz uske mu me hi khatam ho gaye aur usne peechey dekha.
Wahan khare Bare Shah ko dekh ke woh bas unhe ghoorta raha.

"Koi kahin nahi jaye ga."

"Bohat ho chuki he ab main nahi seh sakta yeh sab bakwas."

Woh Guriya ka kandha pakre aage behruni darwaze ki taraf bhara to Bare Shah ki garajti awaaz ne use pukaara.

"Samir Waris Shah apni jagah se ek kadam bhi hilne se pehle yeh soch lena ke tumse teen aurton ki saanse juri huin he!"

Woh beyaqeeni se mura aur unke chehre ko dekhta gaya.

"Aap mujhe dhamka rahe hain?"

Usne unki nazro me seedha dekhte hue pucha. Uski ankho me utra gussa aur tehesh saaf tha.

"Khabardar kar raha hun."

"Shukriya. Magar shayad aap bhool rahe hain ke main aap ka hi pota hun Shah Sahab zid me aap se kam nahi hun aur Ghazal ki shadi har kiz nahi hone dun ga main na yahan rahun ga."

Woh bola to Bare Shah ne jese bohat hi mushkil se apna gussa zabt karte hue kaha.

"Nahi ho gi shadi iski wahan. Magar Muskaan ki shadi me mujhe tumhari aur tumhari biwi ki shirkat chahiye agar woh na hui to uske baad jo bhi hua uska zimedar me nahi hun aur naa hi aage kuch sunna chahta hun main."

Woh keh kar mur gaye. Zid thi ya najane majboori.

"Abhi jaa raha hun main. Office ke bohat se kaam hain mujhe shadi ki takreebon ke shuru hone tak aa jaun ga."

Usne kaha aur jese kuch yaad aya aur bola.

"Aur tab tak meri biwi aur behen mere saath jaen gi. Maajee ki wafadari aap se aur is haweli se itni he ke woh jaen gi nahi is liyr umeed he ke aap unki wafadari ka paas rakhen ge."

Usne kaha to Bare Shah tamaskharana andaaz me hase aur bole.

"Pichle takreebn 10 saal se tumhe apni maa aur behen yaad tak nahi thi aur ab unke aise sarparast ban rahe ho jese tumne hi inhe paala ho? Jao larke apni biwi ko le kar."