💞💎ياقوت💎💞 ( مكتملة )

الجزء 60

                                   🌛 شمس الغريب 🌜

                                  💞 💎 ياقوت 💎 💞 
                                        

كيف بدات كتحل عويناتها بانو ليها مستفين قدام الزاج او العازل كيطلو عليها ممنوع عليهم يدخلو عندها حتى يشوفها الطبيب كانت ناهدة هي اول وحدة تشوفها نقزات بحال شي بنية
ناهدة بضحكة طفولية: هووووباااا خااالتي سوووكاااينة فااااقت
طارو كلهم وحولو عينيهم لعندها كانت كتبتاسم ليهم لكن لي شل حركة مصعب وحتى عثمان ملي حاولات مرارا وتكرارا تهز يديها وفعلا نجحات فمحاولاتها وشيرات ليهم بابتسامة عريضة خلاتهم يدوبو بلاصتهم
شروق ترمات فحضن مصعب مشاطراه الفرحة ديال الام دياله لي رجعات كما كانت: اوووه مصعب صاافي خالتي رجعات كما كانت
مصعب هزها قدام كلشي وجلس كيدور بيها تما بحال شي بيركار وهي طالقة الضحكة حس بانها فرحانة اكثر منه وما كتنافقش حيت عارفها ما كتعرفش تخبي لي كاينة كتقولها اما نوار اللون مشا من وجهها وعثمان بقا هو لي حاضيها ملي دخلات ليه شروق الشك ودبا قطع اليقين وناهدة حداه شاد ليها فيديها حيت حتى هي عانقاته ملي كان كلشي ملاهي اما العمة فحمدات الله فسرها وجهرا برجوع سكينة معزتها عند العائلة كبيرة لانها كانت ماشي عروسة للعائلة انما بنتهم رغم القساوة لي شافت منهم الا انها كانت بنت الاصل وهادشي عمر عائلة رمزي ما ينساوه
الطبيب خرج من عندها: الام ديالكم حالتها احسن من توقعاتي دبا تقدرو دخلو تشوفوها ولكن ما ترهقوهاش بالهضرة
حرك ليها مصعب راسه وجر شروق ودخل تبعه عثمان بنفس الطريقة جار ناهدة بقات غير عمتهم ونوار لي كتقلب فعينيها
ضارت ليها عمتها: يالاه ااا نوااار زيدي هادي فرصتك فين تقربي من سكينة راك عارفاها القلب الكبير
حركات راسها بالنفي وكانت ناوية تهرب من تما: لا انا غادي نمشي حتى نجي انا وماما
جراتها العمة بجهد: زيدي قدامي
تنترات نوار وعلقات من تما هنا دخلو التناوي لراس العمة علاش نوار دير هاد ردة الفعل بدات كتمنى انه الشيء لي كتفكر فيه ما يكونش بصح دخلات حتى هي للغرفة عندهم وتبسمات لسكينة لي بادلاتها الابتسامة
العمة طبطبات عليها: على السلامة ااا سكينة ختي الحمد لله لي رجعتي لينا سالمة
سكينة بكلام لي متقطع: شكرا ااا ختي ربي يخليك
صوتها ولا بحال الموسيقى فودنين ولادها لي شحال ما سمعو صوتها لكن مصعب كان ليه راي اخر باش ما يبرزطوهاش غمز خوه خرجهم كلهم اكيد كلام شروق لي طنطنات ليه بيه راسه خلاه يشك وبغا يتاكد بنفسه وباش ما يرهقوش ماماه خلا عثمان يخرج الكل وبقا هو وياها الراس فالراس
طبطب على يديها ونزل كيبوس ويعاود: الواليدة الحنينة على سلامتك
بهدوء وبصعوبة: الله يسلمك اا ولدي ويرضي عليكم
مصعب: غير بشوية اا الواليدة ارتاحي ما تهضريش بزاف بغيت غير نعرف انا شنو لي خلاك مصدومة واش نوار دارت ليك شي حاجة حركي ليا غير راسك بلا ما ترهقي نفسك
حركات راسها بالايجاب الشيء لي صدمه هو الاول وعثمان برا لي كان عارف بلي السؤال غادي يكون على نوار وحتى البنات قدرو يفهمو اما العمة غمضات عينيها بحصرة على نوار لي ضيعات كلشي
مصعب تنفس بعمق: شنو اا الواليدة عطاتك شي حاجة
تقعدات سكينة من بلاصتها: هي اا وليدي راه ما كانتش باغيا تقتلني خدات شي دواء من الفاغماسي وبغات ديرو ليا باش نبقا على هاد الوضع باش ما تزوجش انت من شروق (بمحاولة باش ما يدير ليها والو) ولكن اا ولدي الانسان كيغلط ما دير ليها والو وها انت انا الحمد لله رجعت كما كنت بفضلها واخا هادشي كله
حرك ليها راسه واخا ما راضيش على كلامها بالكل كيفما كان الحال راه عرضات حياة امه للخطر
 
مع وصلها ونزل باش يدخل معاها لاحظه هما بجوج طموبيل لي باينة ديال شي بنت حيت كانت بألوان ديال البنات تعجبو هما بجوج حيت ما عرفوهاش ديالمن دخلو لقلب الدار ومشاو حتى لواحد من الصالونات تصدمات ياقوت صدمة العمر كانت جوديا جالسة بكامل أناقتها بالبلدي وطالقة الضحكة فوجه الحاجة وقولها وضحك عليها وكانت باينة أنها قريبة من الحاجة
ياقوت لي كانت يديها فيد هلال تنترات منه محاولة منها أنها تفلت لكن هلال عاود جر يديها بلا ما يردو ليهم البال وزير عليها جابت ليه الضحكة الناس فاش كتغير كتحاول تقرب من حبيبها وتبين بلي هي لي مسيطرة عليه الساعة هادي كتخلي لي بغا قلبها وتنفر
ح.زينب قلبات عينيها ليهم: اهلا اهلا الحميمات ديالي جيتو (شيرات ليهم) اجيو شوف اا هلال جوديا جات مسكينة تزورني ياااقوت بنتي توحشتك
ياقوت استغربت من نفسها لأنها ما شداتهاش الغير غير على هلال فقط السيدة راه غارت على الحاجة زينب حتى هي ما بغاتها تقول بنتي ولا تبغي شي وحدة اخرى بحالها وهادي أول مرة تكتاشف هاد الصفة فراسها الغيرة على الناس العزاز يمكن حيت أول مرة يكون عندها علاش تغير داكشي باش
بلا ما تشعر ياقوت مشات جلسات بيناتهم واخا المكان ضيق وترمات فحضن ح.زينب وبقات مخشية فيها كأنها كتصيفط رسالة لجوديا بلي هادي راه ميمتي أنا وما عند حتى شي حد الحق فيها خلى هلال هادشي يضحك من داخله من أعماق قلبه وجلس جنب الحاجة من الجهة الثانية وعطى التحية لجوديا غير براسه لا تصدق ياقوت دايرة ليه شي شوهة متورخة
جوديا تبسمات: احممم حممم جيت اا هلال باش نشوف خالتي الحاجة توحشتها بزاف
طلات ياقوت على هلال من جنب الحاجة وهمسات: انت موريها حتى الدار وخالتي زينب (دارت ليه حركة بعينيها كأنها كتحلف)
ح.زينب سمعاتها وحبسات الضحكة فرحانة بانو شرارات الحب عليهم حتى جات القطة المعلومة كدور بجنب رجليهم هزها هلال وياقوت عينيها بداو كيخرجو القلوبة ورمات يديها كتلعب فالفرو ديالها
جوديا باغيا دخل راسها فالموضوع حيت ملي دخلات ياقوت حتى الحاجة زينب ولات كتهضر معها غير بالصواب باش ما تملش أما كلشي ملاهي مع ياقوت وخاطر ياقوت
جوديا: احمم كيفاش ولاو عزاز عليك القطوط اا هلال ماشي من طبعك
قبل ما يجاوبها هلال تقادات ياقوت فالجلسة وطلقات ليها ضحكة دوب الحجر: حيت كاااادو من عندي داكشي باش
ح.زينب على نيتها: حولو نهار جااابه يوصي ويعاود عمرو وصى على شي حد بحال كما وصى على القطيط
فرحات ياقوت قد حقها فالدنيا وهلال تبسم حتى تحفرو غمازاته الشيء لي خلا ياقوت وجوديا يسهاو أما ح.زينب فرحات مسكينة واخا قلبها محروق على ولدها مصطفى لي ما عرفاته فين
هلال وقف وجر ياقوت من يديها: الواليدة شوية وأنا جاي
تبسمات ح.زينب: خودو رااحتكم اا وليدي الله يرضي عليكم
وقفات جوديا وعينيها مرقرقين: احمم حتى أنا كيبان ليا نخليكم (تحنات معنقة ح.زينب) بسلامة اا خالتي
ح.زينب بادلاتها الابتسامة: ربي معااك ااا بنتي