💞💎ياقوت💎💞 ( مكتملة )

الجزء 33

                                        🌛 رمضان كريم 🌜

                                     💞 💎 ياقوت 💎 💞
                                            

فاطمة بحالها بحال ختها مزوجة بواحد من بلادها غير الفرق أن عباس راجلها كيموت عليها ظالمة ولا مظلومة الله اعلم واش محبة لله ولا شي حاجة أخرى المهم هو ما كايخليهاش تمشي عند ختها حيت ما كيحملش إبراهيم علاش قولو نتوما من اللخر gاع
مينة: ايييوة شفتي ومالي انا كنجي والله سي إبراهيم ما كيقول ليا لا
فاطمة بانت ليها ياقوت داخلة من جهة الدروج مثقلة: صافي نتي عارفة وانا عارفة بلا ما تحكي على الدبرة(شافت فياقوت)دخلي نتي داكشي للكوزينة انا جايا نوريك اش ديري
ياقوت بلا ما تناقشها مشات دخلات للكوزينة لقات بنت عندها 10سنين لابسة بيجامة كبيرة عليها وحازمين ليها شعرها بزيف حياتي ما كتبان حتى زغبة وكتحك فالماعن الكبار ديال العراضات بانو يديداتها الصغار مجروحين بالماء البارد وجيكس بغات تشوف وجهها حيت كانت عاطياها بجنب كانو فيها آثار ديال الضرب بقات فياقوت ماشي اول مرة تلقا شي بنت قاصر خدامة عند خالتها ولكن هادي صغيرة بزاف قربات منها لبنت مسكينة رضات البال قفزات من بلاصتها
ياقوت: ما تخافيش ا حبيبة ما غادي ندير ليك والو شنو سميتك
البنت تهدنات شوية وجاوباتها برجفة: نصيرة ونتي شنو سميتك
ياقوت بابتسامة خفيفة وهي كتمسد ليها على راسها: ياقوت دبا بلاتي نكمل انا هادشي
كحزاتها ياقوت واخا ما بغاتش فالأول ولكن هدناتها وتولات زمام الأمور وهي عارفة اش غادي دير حتى دخلات خالتها
فاطمة: خليها تكمل داكشي نتي معيطة ليك على الحلوى بغيت 3شكال باباهم ما ضايرينش لي نقدم لنساب نهار الحنة والباقي نكملو بالشرا
ياقوت ما كتشوفش فيها: واخا عطيني المقادير واشمن شكال بغيتي
فاطمة: ايه ماشي هنا فالسطاح(شافت فنصيرة)ونتي سيري معاها لا تبغي تصخرك
مشات ياقوت وجات نصيرة تابعاها حتى شنقات عليها فاطمة جهة الباب

فاطمة: حسك عينك تعاودي ليها شي حاجة نعلقك فالبولة من(قرصاتها فتوتوها)من هنا
نصيرة مسكينة حابسة البكية تابعا ياقوت للسطاح مالقاتهاش بقات شوية حتى بانت ليها ياقوت طالعة فالدروج حيدات جلابتها بقات ببيجامة لقات تما بحال الخيمة وكلشي محطوط باش غادي تخدم شعلات الفران وجلسات كتخدم وتهضر مع نصيرة لي كتجاوبها وخايفة واخا هاكاك لا تجي فاطمة على غفلة
اما لتحت عند مينة وختها فاطمة حاطة صينية اتاي كتقلب فيه: اييوة جات ديك المعوقة ديال زهرة
مينة: ويلي غير سكتي جات يا ختي وخديجة يصحاب ليك كتحن ولاتحس بينا مزال هاد المصيبة لي لفوق راه واخا هاكاك كتحن عليا ملي تشوف إبراهيم كيهرد فيا
فاطمة مدات ليها اتاي: وشدي وجمعي راسك ديك لي الفوق راه هي سباب عذابك عنداك تنساي والله إبراهيم لا عقل عليك انا كنقوليك حالتك لي واصلة ليها بسببها لا ناسك(نسابك)كيبغيوك راجلك ما عارف واش يبغيك ولا يكرهك بسببها الورث مشاليكم وبسبابها لا انا لا خواتاتك البنات كيجيو عندك
مينة بقات ساهية وكترض السينتة اللور وكتفكر gاع ماداز وباقي كيدوز عليها بسبب ياقوت بالنسبة ليهم: عندك الحق ا فاطمة اختي الله يديها عليا نتهنا منها
فاطمة: مالك ما زوجتي الحرامة تهناي منها تعطيك بالتيقار قد ما بقا كيشوف فيها قدامو قد ما يبقى يتفكر زمان ويكرهك
مينة: يا نتي راه هو لي ماباغيش يزوجها داك النهار جا ليها إدريس ولد الحاج عبد الجليل عقلتي عليه هاداك الذهايبي
وئام لي كانت مكونيكطيا عادي حتى سمعات آخر هاد الحوار: طاتي واش خطبها إدريس داك البوgوص لي ساكن حداكم(ميقات)ويلي اش عجبو فيها(قرصاتها أمها حيت عارفة بلي وئام كان كيعجبها داك الولد وكانت كدير أي حاجة باش تعجبو ولكن هيهات)
فاطمة: ايوة ا مينة اختي علاش ما بغاش يعطيها
مينة: تعطاه كحلة زحلة انشاء الله قاليك اشمن رباح عندو هو ايلا تزوجات وبصح نيت ا فاطمة اختي راه هي لي كتشقا هناني الله من فلوس الخدامة عاد زيدي راه كتخلص الكرا ديالها عندنا نخليوها تمشي لعند واحد آخر
فاطمة: يااا تي اش بغاو فيها الراجل دبا باغي وحدة قارية وزوينة وخدامة تهز معاه المصروف هاداك إدريس تلقاي باغي يجيب لأمه خدامة فابور
مينة مابغاتش تقوليها راه ولدك حتى هو باغيها وديما كيقولها ليا وسكتات كملو نهارهم غير بالهضرة لي ما تشري خضرة والتبرgيg حتى وصلات 4العشية