💞💎ياقوت💎💞 ( مكتملة )

الجزء 1

                                   🌛رمضان كريم🌜

                                  💞💎ياقوت💎💞
                                         

وقف الطوبيس فالبلاكة هاز ما هاز قلبي عاااامر بحيث هو آخر طوبيس غايخوي ويمشي لديبو كان عامر والبلاكة عامرة كثر منو كلشي باغي يطلع وشي باغي يهبط كيجيبو الدوخة هبطات منو امرأة كتنفض جلابتها وتعاير بالله يعطيك مصيبة والله يلقيها ليك ومن وراها هبطات بنت تقول كانت كتgاجي حتى هي كتسوس حوايجها شعرها البني هابط معاها كيسوس تاهو كانت لابسة سروال دجين بوي فراند مع قبية بيضاء سخونة فوق منها كبوط اسود ديال شتاء بحكم هذا الفصل ديالها وسبرديلة بيضاء كانت بيضاء أما دبا قهوية بالغيس هزات رأسها ملي سالات بانت ليها المرأة مشات فحالها كتنgر هزات محفظتها من الأرض جبدات منها طاقية دارتها على رأسها سدات المونطو وتوجهات للحي لي ساكنة فيه كان حي شعبي بامتياز الرواج واخا الشتاء والبرد الناس مكبطة وجالسة تدي وتجيب فالخبار وكما العادة غير كتبان ليهم جاية كيسكتو ويبقاو متبعينها بعينيهم كلها وشنو تايقول هالي كتبقا فيه هالي كيقول عليها كابابل هالي كيقول عليها العاهرة(ق***)ها لي باغينها لزواج ها لي باغي يتصاحب معاها لمهم هادا زمان البيرو لي عجبو شي يديرو وهي بحال ايلا صم بكم لا يقشعون كتمشا ولالة مسعودة كتهز وتحط وقلوب وحجور ولاد الدرب كتهز معاها اما صدرها مهزوز واقف حسكة بشرتها قمحية وملامحها بنيين الشعر بني ولكن كيبان بحال ايلا دايرة ليميش حجبانها هلال تحلفي من عليهم مصايبين وهما هكاك مخلوقين عوينات الغزال ولونهم كيف لون العسل جيب الخبز وغمس نيف منgاد وواقف اما الفيم الفريز هكاك محطوط عندها الشفة لي فالاسفل غالبة ولا كبيرة على الفوقانية(السيدة وصلات لعند محماد عرفتوه ياك ايييه مول الحانوتةوانا باقا نوصف فيها)
محماد😆: مرحبا ب ياقوت ااش حب الخاطر ا بنيتي
ياقوت😶: كيما العادة ا با محماد غير هو زيدني نصيترو حليب ورابعة روز
كيجيب با محماد السلعة لي هي خبزة ودرهم سنيدة وليتر ديال الحليب ورابعة روز ويحط ليها فالميكة ومشا دخل جاب ليها ميكة أخرى من دارو لي عندها باب وسط الحانوت حيت دايرو فالgراج
محماد: ها هي سلعتك ا بنيتي وهاد الميكة عطاتها ليك فاضمة ا بنيتي
ياقوت بابتسامة كبيرة وهي كتمد ليه فلوس السلعة لي خدات: جات خالتي فاضمة من لبلاد ربي لما سلم عليها غدا انشاء الله ندوز نشوفها
محماد بادلها الابتسامة وكيرض ليها الصرف: اييه جات يجيك الخير ا بنيتي مرحبا بيك حتى هي تفرح ملي تشوفك
ودعاتو وفاتت جوج ديور ووقفات قدام الباب الثالث دورات الشكارة جنب جبدات سوارت حلات الباب وبدات طالعة كتسمع صوت الغوات من الدروج(نوصف ليكم الدار على ما طلع هي الدار فيها gراج لتحت باها داير فيه مصبنة وجوج طبقات الأولى كاريينها والثانية ساكنين فيها عائلتها والسطح لبرطمة لي ساكنين فيها مع الدخلة كتلقاي على اليسار صالون مغربي مفرش على حقو وطريقو بطلامط بالازرق ملكي والgري هاز جوج طوابل مقابل معاه سيجور فيه دي كانابي بالgري مغلوق ومخيدات بالموطارد والgرونة فيه التلفازة وفيه شرجم كبير كيطل على الزنقة كدخلي مع واحد القوس مقابل مع باب دار كتلقاي على اليمين كوزينة مجهزة مزيان كطل تا هي على الزنقة ومقابل ليها كاين طواليط وحمام كبار جنبها كاين بيت وبيت آخر مقابل ليه حدا الكزينة و2 بيوت البيبان ديالهم في الحيط لي مقابل الباب(المهم كاين 4 بيوت)وديك الباحة لي جات الوسط دايرين فيها صال ا مونجي كبيرة ب 8 الكراسي بالخشب الرفيع فهاد الدار ساكنة فيها عائلة ياقوت لي مكونة من آب ابراهيم متسلط لا شفقة لا رحمة وأم مينة أكثر منو وختها صغر منها سميتها خديجة(مساكناش معاهم دبا نعرفو علاش)وثلاثة جنون بغيت نقول أولاد أسامة رضا وحسام وصلات ياقوت قدام الباب صوت خوتها كاسر دنيا حلات الباب دخلت حيدات سبرديلتها وتقاشر فالباب لبسات بانطوفة هزات رأسها بانت ليها أمها فالقوس لي قلت ليكم لابسة بيجامة بالاسود مقطنة جاياها عبار عندها طاي مقنبلة بحال بنتها غير هي غليظة شعرها بنفس لون شعر بنتها غير هي مقطعاه ومامخلية ليه حتى لون عينيها مكحلاهم ودايرة عكر غوز كيشقشق ضفارها مصبغين بالغوز نيت وواقفة مخنزرة فيها تقول واكلة ليها الورث
                                              
                                  💎💞💎💞💎💞💎💞💎
ايوة يا الياقوتات ديالي اش بان ليكم فهاد البداية