Nasan ka na giliw, oh aking kabiyak
Kung ikaw ay wala, silbi ko'y di tiyak
Aking nagunita ang ating pangarap
Na mag-uunahan sa ating paglakad
Nasan ka na liyag, o aking katuwang
Na kasa-kasama sa gabi at araw
Sa bawat sandali, aking kaulayaw
Sa daang malinis o kahit putikan.
Ikaw ang kahati ng aba kong buhay
Sa ulan o init ay subok ang tibay
Ikaw na kapareha at aking karamay
Di ko masumpungan, nasaan ka mahal.
Sa'king pagsisikap na ika'y mahanap
Ang ating tagpua'y aking pinasyalan
Doo'y naroon ka at aking hinagkan
Ngunit bigtal ka na at wala nang buhay.
Ano pang saysay ko kung di ka kapiling?
Hindi ba't patapon ang turing sa akin?
Ang isang tsinelas na walang kabiyak
Ay tulad ng tao na walang pangarap....
