2020/7/17
من هسة اكللكم.. النهاية غير متوقعة والبارت يمكن يجلط البعض.. ونسبة رومانسية تقررف كلش مدري اني اشوفها تقرف لان ما احب الرومانسية 😂😉
المهم علقو على كل فقرة وفرحوني بهذا البارت لان صدك تفاعلكم مؤلم بالرواية واني كلش تعبت بيها لا تبخلون بايمونجي 😢🙏
البارت الاخير...
لازم ننسة..
لازم نترك كلشي اذانا بلحظة او كان من الممكن يأذينا بالمستقبل
مرات الكبرياء يقرب منا الفراق..
ويكسر داخلنة شي حلو ... ونخسر بعدة هواية شغلات بغباء وتصرفات طايشة
نضيع قراراتنا، مثل الي داخل بسباق زمني وية نفسة
بس لازم نتذكر انو الكرامة والعزة اهم من كلشي...
وانو حياتنا ما ممكن تتوقف على شي او على احد
حياتنا تتوقف فقط من نموت
ساعتها صدك خسرنا.. لان الحياة طوويلة كلش
والي يكول انها قصيرة فأكيد هذا شخص عايش نصها.... وما مستغلها بالشي الي يرضي ويرضي ربة
الحب موجود..
وبكل مكان.. الله ينثرة على البشر مثل ما ننثر الحبوب للطيور بحضرة الكاظم عليه السلام...
بس بعض البشر تلصق نفسها ومشاعرها بشخص واحد وتبلش تنسى الكل وتركز عليه وكانو ماكو غيرة بالعالم
زين ليييش؟؟؟!!!
ليش ما يقتنعون انو الله يحبنا اكثر من الناس؟؟...
وانو هو يعوضهم بدال الشخص عشرة او الف او مليون
ليش كابتين مشاعرهم لشخص واحد مع انو الحب مو شعور وانما ( حالة)؟
وانو لازم احنا ما نتمسكت بشخص ما تمسك بحبنا واستهان بمشاعرنا علمود غريزة او حاجة.... او نظرة ناس
ولازم نتذكر انو الي ما يريدنا فهو ما يستاهل لحظة من حياتنا نفكر بي... ميستاهل.. بس ميستاهل 🤷♀️
فتح الباب ودخل وجان بيدة جيس جبير وجنطتة الجلد وباقة ورد بالوان فاتحة
اول ما دخل شافها وكفت من مكانها وانثر فستانها بالهوة ونزل للكاع وغطي اكعب رجليها
كل هذا جان بجف وجمالها بجف.. وجهها جان مختلف تماما عن الي دائما يشوفة
ما جان شاحب ومكياجها الخفيف زيد من جمالها...
شالت قالب الكيك من الميز وشغلت الشموع عليه
ووكفت وابتسامتها جانت واضحة وسنونها مبينة
تراجع شوية ليورة وباوع على رقم الشقة وباوعلها بطرف عينة
عصام : هذا بيتي مووو؟؟
مالت راسها وضحكت وهزتة ب (أي)
سد الباب ودخل وعينة ما نزلت عنها
تقدم بهدوء وحط الغراض بطريقة بالكاع
هديل : كل عام وانت بالف خير...
باوع بعيونها بتمعن ونفخ الشموع
عصام: كل عام وانتي وياية... وقريبة مني.. وكل يوم اشوفج
هديل: كل عام ونتنفس سوة
كملو سهرتهم على الطولة ديتعشون وطبعا عصام ما نزل عينه عنها وفرحته جانت لا توصف
عصام: جبتلج هدية، ما رح تفتحيها؟
هديل: بس المفروض اني اجيبلك هدية اليوم عيد ميلادك، مو صح؟
عصام: جيتج احلا هدية جانت بالنسبة الي
والي سويتي اليوم بعد احلا واحلا
ابتسمت وخجلت من حجية وسئلتة بفضول
هديل: شنو جبتلي؟
عصام: تفضلي
شال الجيس ونطاهيا
هديل: هذا كلة الي؟؟
عصام: اي طبعا.. وتستاهلين اكثر
هديل :زين قبل ما افتح هديتي.. افتح انت هديتك
عصام: تمام...
انطتة العلبة وفتحها
جان يضحك حيل
استغربت وضحكت علية وعلى طريقتة.. ردة فعلة جانت مريبة
هديل: شنو ما عجبتك؟ ليش دتضحك
عصام: فتحي هديتج وتعرفين ليش دا اضحك
انصدمت من شافت العلبة بيها فستان ابيض
ضحكت مستغربة من الي ديصير
هديل: هاي شنو.. متفقين؟
عصام: اي يمكن
بدلت نبرة صوتها وكلتلة
هديل: غايتك من الهدية نفس غايتي؟؟
عصام: شون يعني مفتهمت؟
هديل: يعني اني اريدك تلبس هذا القاط... بعرسنا
توقف كلشي بالنسبة اله وظل ساكت منتظرها تكمل بس ما كلمت
عصام: يعني هاهية؟
رح يتم كلشي؟
هديل: اي.. هاهية
اصلا أني متندمة لان ما تزوجنا بالمهلة الي حطيناها وزيدنا الوكت هيج على الخالي بلاش
عصام: زيادة الوقت مو مهمة بالنسبة الي، بكد ما مهم انج انطيتني فرصة اكبر ووثقتي بيه
مر شوية وكت بهدوء ورفعت راسها اله
هديل: عصام... تتزوجني ؟
انصدم اكثر واكثر لان مدا يستوعب الي ديصير بهذا اليوم الغريب الي كلة مفاجئات
عصام: حبيتيني؟؟
هديل: مو مهم الحب.. الحب لو مهم بالنسبة الي ما جان تخليت عنه
اني اريد الي يشجعني ويوكف بظهري ويكون سند
خلي الحب يجي براحتة من العشرة والمودة الي بيناتنا واني متاكدة حيكون افضل واحسن
عصام: بس اني وعدتج انو تحبيني
هديل: مو مهم... اهم شي اني ما اكرهك او اضوج منك او احاول ابعادك.. لان اكتشفت اني مدا اكدر ابتعد عنك او يمر يوم وما اذكرك
ولا تخاف... يجي الحب بعدين..
عصام: مدري شكول.. كلبي رح يوكف من الي ديصير
هديل: اسم الله عليك
عصام: هذا احلا عيد ميلاد كضيته بحياتي كلها
احلا يوم.. احلا ساعات.. وية احلا وحدة بالكون
.
.
.
.
رجع للبيت بعد غياب شهر ... وكلها التمت عليه وترحب بي وفرحانين بجيتة كالعادة لانه اميرهم
بس رواد مجانت موجودة وهالشي زعجة كلش وظل يدور عليها بين الموجودين ما لكاها فاندار على امه وسئلها
سيف: يمة وين رواد؟ شو ما بينت؟
تبلعمت الام وظلت تتصفن وكلها سكتت ناس تبتسم وناس ضايجة
ام سيف : هااا.. رواد.. ما ادري.. يمكن بغرفتها
باوعلها بطرف عينة وسئلها
سيف: شنو متدرين؟
ليش ما اجتي تسلم عليه؟ مو تدري اليوم اجي
ام سيف: موووو... يمكن ما سمعت
رفع حاجبة وسئلها ببرود
سيف: يمة صاير شي..؟ شو دا احسكم ضامين شي عليه... . رواد بيها شي؟ صاير شي؟
حجة شيخ زهير وملامحة كلش جدية وكانو صايرة كارثة
زهير: ماكو شي ابني.. اصعد للغرفة مرتك فوك منتظرتك
سيف: وليش ما تنزل؟؟
زهير: اني مانعها انو تنزل.. اصعد انت
استغرب لان يدري الشيخ زهير عدة المرة اهم شي بالبيت وخاصة رواد لان مرة سيف فالكل شايتلها بالصلوات
سيف: شكو؟؟ مسوية شي غلط ليش مانعيها تنزل؟؟
زهير: اصعد وهية تسولفلك.. روح ابني
روح ارتاح يم مريتك.. ولا تخاف ماكو شي صاير
سيف: لا اكو شي.. متحجون شصاير ؟؟
شيخ زهير صار عصبي وعاط بي
زهير: سيف دا اكلك ماكو شي... روح اصعد لمرتك وهية تكلك شغلة بيناتكم ولازم هية تحجيلك
سكت وتراجع بس صار عصبي كلش
سيف: صار جدي لا تصير عصبي..
كام من مكانة باس راس جدة واخذ جنطتة وصعد
ووية كل خطوة يتحلفلها بكتلة اذا مسوية شي غلط وية اهلة وعيونة صارت دم من الغضب
فتح الباب بقوة وهو عصبي وصاير بارود
هية طلعت من الحمام اثناء طبتة للغرفة
وبس شافتة ركضت عليه حتى تحضنة جان يبعدها
استغربت من تصرفة وسئلتة مقهورة
رواد: هاي شبيك؟ ما تريدني اسلم عليك؟
سيف: سئلي نفسج.. شمسوية ؟
رواد: ممسوية شي.. ليش دا اسال نفسي؟
هاي شبيك حبيبي؟
سيف: لا مسوية شي.. راجعي روحج
وإلا ليش جدي مانعج من الطلعة من غرفتج وانتي مرتي وتدرين بي شكد يحبج على حبي
وكد ما ضايج منج ما حجالي شي كلي روح اسالها
ضحكت حيل ومن كل كلبها ورادت ترجع تحضنة بس هم منعها
رواد: هااا.. هيج صارت.. ماشي لعد ما اكلك وظل حاير
لا همة يحجون ولا اني احجي... خليك هيج ضايج حبيت الملامح
جر اديها حيل ولزكت بي وكز على سنونة وعكد حواجبة
سيف: لا تظلين تتلوكين.. احجي
تريد تفلت ايدة بس مدا تكدر
رواد: اي اي شبيك هيج عصبت
ايدي دتوجعني سيف على كيفك شوية
ماكو شي لا تخاف
بس الي جنا منتظري صار لذلك جدي ما يقبل اطلع من غرفتي
رخة ايده عن اديها مستغرب
سيف: هو شنو الي صار؟
رواد: رح تصير ابو جواد... مثل ما جنت تتمنى طول عمرك
صفن عليها ديحاول يصدك حجيها بس مدا يكدر
صدمة وخفرحة بخوف ممزوجين بشهكة
سيف: يعني شنو؟
ضحكت وحطت اديها على بطنها
رواد: يعني اني حامل.. واذا زعلتني بيوم من الايام لو ظليت هيج طول بالشغل، اخذ ابني واهج منك
جرها مرة لخ حيل بس هالمرة حضنها وباس راسها والدمعة غرغرت بعيونة وجنة ممصدك
سيف: اروحلج فدوة على هالخبر الحلو هذا
الله لا يحرمني منج ولا من شوفتج
ولا بعد انفاسج عني
رواد: ياريتني اكدر اخليك كل يوم هيج فرحان
سيف: اني افرح من اتذكر الله انطاني هيج مرة تحبني وتريد رضاي
رواد: وليش انت ما تحبني مثل ما اني احبك؟
سيف: وفيتي بوعدج من كلتي رح تنساها
هسة كل ما اتذكرها اريد ابعدها عن مخيلتي وتظلين انتي بس كدام عيني احس دا اسوي غلط من اتذكر شي يخصها
رواد: يعني شنو؟؟
سمعني الحجاية الي جنت منتظرتها صارلي سنتين
الحجاية الي بكلبك ومدا تكدر طلعها
سيف: يعني احبج
احبج يا ام جواد.. احبج يا دواية وفرحة عمري
رواد: اففييشششش يارب لا يحرمني من طلتك عليه
ادري علامة جرحك بعدها.. بس اني فرحانة لانو داويت الجرح الي بيك
سيف: فدوة لربج يبت كلبي
باس راسها وجانت عيونها تلالاء كد ما فرحانة بفرحتة والخبر الي جان منتظرة من سنين
.
.
.
شابك اديها بايدة وكاعدين يباوعون فلم وياكلون
وهية تباوع على اديناتهم وتبتسم من جوة لجوة وهو منتبه عليها بس مغلس
عصام: اكلج... وين تحبين نسوي شهر العسل؟
اندارت علية متحمسة
هديل: بالبيت
باوعلها مستغرب بطرف عينة ومال راسة
عصام: لا شوون بالبيت .. خلينا نسافر الله عليج
هديل: لا ما اريد اسافر
رح اخذ اجازة شهر.. ونأجر بيت بمكان بعيد
تجي نروح للبصرة مثلا او للاهوار؟
وهناك نضل وحدنا كاعدين
لا نسافر ولا نطلع لان احنا اصلا تعرفنا بدبي واني مسافرة هواية اريد شي مميز شوية مختلف عن العالم
عصام : مااشي تدلليين... شكلج حبيتي الكعدة بالبيت
ضحك وضحكت على ضحكتة
هديل: بصراحة اي.. اريد اظل اطول فترة ممكنة بالبيت، لان تدري ورانا شغل وافتتاح ورح نلتهي وما اشوفك هواية
فأريد اظل هذا الشهر وياك نكضي سوة بعيد عن الكل
نسد التلفونات وما نكول لاي احد احنا وين
حتى ما يستجرون يضوجونا
ننسى الدنيا كلها
ابتسم من شافها متحمسة ورمش بعينة
عصام: ماااشي.. تؤمرين
مر الاسبوع ما بين فلم وعشة برة وكعدة حلوة عالشط، سينما، طلعة عادية، مسواك للعرس و هديل تكضي اغلب وقتها بيت خالد وية زوجتة حتى ما تمل
عصام يطلع الصبح للشغل ويرجع العصر ويكضون باقي اليوم سوة
لحد ما اجة اليوم الي لازم يرجعون بي لبغداد
لملمت غراضها وعززلت الشقة لان رح يتركها نهائيا وبعد ما يرجعلها
واستعدو للرجعة
استقبلهم عادل بالمطار بسيارته
اثناء كعدتهم بالسيارة بلشو يسولفون
هديل: هاي شنو شو صايرين اصدقاء واني ما ادري؟
من شوكت تتراسلون واسرار وكذا
عادل : اي لعد شعبالج
غير نسابة وكذا
هديل: اي اي الله يجعلكم
ضحكو وجان يرد عادل
عادل: فضوها وتزوجو ترة مليت اريد ازوج
عصام: وانت شعليك بينا؟؟
عادل: غير امي ما تقبل تروح تخطبلي بت عمك تكول خل نخلص عرس هديل يلة
هديل: معليك بيها.. شنو رئيك نروح نخطبها هالاسبوع ونسوي العرس مشترك
عصام.. شنو رئيك ؟اذا مموافق عادي ما اضوج ترة
عصام: بالعكس اصلا هالشغلة تفيدني
لان اول شي اني ما اعرف ناس هواية هنا واغلب الي بالعرس رح يكونون معارفج
وشي لاخ البنية بت عمي يعني مو غريبة وهم يلتمون كرايبي الي ما شايفهم
باختصار العرس المشترك رح يفيدني اني اكثر واحد
عادل: وامي شيقنعها؟
هديل: معليك بيها.. اني احجي وياها
اذا ما قبلت نروح وحدنا نخطبها ونحدد العرس
عصام: وتتوقعون عمي يقبل بهيج عرس؟
هديل : ليش ما يقبل شنو المشكلة؟
عادل: ما ادري بس اعتقد انتو رح تتضررون عرسكم رح يتاخر شوية
هديل: كدامنا شهر.. بين ما نخطب وينطون الموافقة والمهر يعني سالفتنا تخلص بشهر تقريبا ونحدد العرس
عصام : اني اكلج هو موافق على عادل بس اعتقد ما يوافق على العرس يعني السالفة مو مضمونة فخلو كل الاحتمالات كدامكم
هديل: هاي بقت يمك انت لازم تقنعة بيدك
باوعلها بالمراية وضحك
عصام: مااشي تدللون
مرتي واخوها اتفقو بعد لازم انفذ
ضحك وضحكو وهية باوعت علية خجلانة من كال ( مرتي)
.
.
.
.
.
مثل الي طاير.. او نازل بمظلة من جبل عالي
فرحتة ما تنوصف وابتسامتة ما تتفسر وما الها اي كلمات تعبر عنها
وكفت من شافتة وباوعت علية مبتسمة ووجها احمر من الخجل والفرحة بنفس الوقت
مد ايده وحطت اديها عليها والثانية شالت بيها الثوب مال العرس الي جان كللش ضخم جنها اميرة واحلا بعد
اقترب منها وصوت الزفة بلش يعلى والعالم كلها تركص وفرحانة
باس راسها وحضنها حيل
وراها قدملها باقة الورد مال العرس وباس اديها من الكف
وكف بصفها والكل تركص وهية تباوع علية وتتامل وجهة بابتسامة جانبية وشكلها مثل الربحانة بشي قيم
اقتربت عليه وهمستلة باذنة
هديل: ياريت لو اكدر اطلعلك كلبي وتشوف شنو بي
اندار عليها بسرعة وباوع بعيونها
عصام: ميحتاج.. نظرتج فاضحة كلشي
هديل : احبك...
.
.
.
بدت تودع اهلها وخنكتها العبرة رغم فرحتها
وصلت لحد ابوها وما تحملت اكثر وطكتها ببجية خربت كلشي
حضنها حيل وبجة وياها
هديل: اني احبك بابا.. الله لا يحرمني منك
الاب: والله لا يحرمني منج ولا من حبج الية
وادري كلش زين انو الي وصلتيلة هذا كلة لانك تحبيني
ضحيتي هواية حتى تخليني اشوفج عالية وما فد يوم نزلت راسي لو دنكت من اجيب طاريج
ديري بالج على روحج مثل ما تسوين دائما
وديري بالج على رجلج لان هذا الشاب الي حصلتي علية مستحيل يتعوض
هديل: الله يخليك الي يا تاج راسي بفضل دعوتك اني هنا والله صخالي الزين لانك انت ابوية
لزم اديها وحطها بايد عصام
الاب: بنتي امانة بركبتك
وادري بيك رجال وتصون الامانة وتحملت هواية علمودها
هسة انت صرت تاجها... لا تصير ثكيل عليها
خليها تفتخر وترتاح بيك
عصام: لا تخاف.. اصلا هية تاج راسي واوعدك اصونها بدمي
.
.
.
.
بعد مرور عامين
طب عليها بالمكتب صاير عصبي
عصام: هديل هاي شنو!
هديل: شنو ؟؟
عصام: شجابج لهنا.. اني مو كتلج ابقي بالبيت
ترة مبقى شي واتخبل من وراج
كامت من كرسيها بصعوبة بسبب بطنها الي واصلة لخشمها وهية تضحك وهو ديساعدها
هديل: حبيبي شبيك... لا تخاف علية اني زينة
اصلا لازم اتحرك اني بشهر التاسع علمود تسهل ولادتي
لزمت ايدة واقتربت علية ووجها قريب وجهة ووسعت عينها وهو يحاول ميباوعلها حتى ما يضعف
عصام: شون بيج؟ شووكت تسمعين كلام؟
ترة رح جلطيني، لا تباعين علية هيج تدرين ما اتحمل نظرتج هاي وصايرة سويها هواية حتى تستغليني
هديل: اسم الله عليك حياتي..
لا تخاف علية
اني زينة ولازم اتحرك هواية واشتغل هواية
وهم عندي كم شغلة لازم اكملها قبل ما اخذ اجازة لان حيصير شغل هواية عليك
عصام: لا تخافين علية اني هسة
الشغل ماشي عدل
حسام ممقصر وسرمد مدا يخلي شي كلة اول باول ديكملة بس انتي ابقى بالبيت لحد ما جيبين لخاطر الله
هديل: شبيك صاير ما تتحمل تواجدي يمك
لو ما كاعد تشتغل بذيج الشركة وبعيد عني.
وبعدين منو كلك اني هنا اصلا، شنو مراقبني؟
عصام: زهراء خابرتني وكلتلي انتي هنا
وبعدين اني اذا ما اركض وراج كل يوم ما تمشين عدل
من وراج ابني رح يصير عنودي وما يسمع كلامي
هديل: شحدة... غير اكسر راسة
لا تخاف يلة روح كمل شغلك اني اكمل وارجع
عصام: لا امشي نرجع سوة للبيت
هديل: خل اكلك شغلة صدك
عصام : شنو؟؟
هديل : رح يسوون وياية مقابلة باجر بالتلفزيون
صاح من الفرحة وشهك
عصام: صدك
هديل: من تسوي هيج تخنكني العبرة
حضنها وجان كلش متاثر
عصام: ليش حبيبتي؟
هديل: احسك تفرح اكثر مني من انجح بشي لو اسوي شي زين
كل الجوائز الي حصلتها وشهادات التقدير الي استلمتها مجانت تعنيلي شي بكد ما جانت نظرتك تمَلكني الدنيا
دا اسوي كلشي اكدر علية بس علمود اشوف هاي النظرة بعيونك.. نظرة الفخر الي ما شفتها حتى بعين ابوية
وايدك الي تصفكلي قبل اي ايد ... ووكفتك من الكرسي قبل الكل من استلم جائزة حتى لو جانت بسيطة
عصام: شكو ارتبطت بيج اذا ما اريد افرحج
اني اريدج تكونين سعيدة بكل وكت
وادري سعادتج بشغلج ونجاحج
واذا ما اكون الداعم الج بكل هاي الاشياء فاني ما استحقج..
ضحكتج وسعادتج وفرحتج اهم من كلشي عندي
اهم حتى من الهوة الي اتنفسة
هديل :احبك يا سندي وظهري وابوية الثاني
النهاية.....
2020/7/19
2380